bhalamedia.com

వచ్చే ఎన్నికల్లో బీఆర్ఎస్ కాంగ్రెస్ పొత్తు పెట్టుకుంటాయన్న కోమటిరెడ్డి వెంకట్ రెడ్డి వ్యాఖ్యలు తెలంగాణ రాజకీయాల్లో దుమారం రేపిన విషయం తెలిసిందే. వచ్చే ఎన్నికల్లో హంగ్ అసెంబ్లీ తప్పదనీ.. బీఆర్ఎస్ పార్టీకే కాదు.. అసలు ఏ పార్టీకి కూడా 60 సీట్లు కూడా రావంటూ కోమటిరెడ్డి వ్యాఖ్యానించాడు. ఢిల్లీలో ఈ మాటలు మాట్లాడిన ఆయన.. హైదరాబాద్ వచ్చే సరికి మాట మార్చేశాడు. నేను అలా చెప్పలేదు.. ఇలా చెప్పాను.. అంటూ మాట మార్చేసి.. తన వ్యాఖ్యలను వక్రీకరించారంటూ మీడియా మీద నింద వేశాడు కోమటిరెడ్డి. ఈ వ్యవహారంపై కాంగ్రెస్ నేతలు మండిపడ్డారు. రాహుల్ గాంధీ గతంలోనే వచ్చే ఎన్నికల్లో కాంగ్రెస్ పార్టీ ఏ పార్టీతోనూ పొత్తు పెట్టుకోదని క్లారిటీ ఇచ్చిన తర్వాత కూడా కోమటిరెడ్డి ఇలా మాట్లాడటం సరికాదన్నారు. అయితే.. ఇప్పుడు బీఆర్ఎస్ పార్టీ వైపు నుంచి కూడా పొత్తుపై క్లారిటీ వచ్చింది.
మీడియా సమావేశంలో మాట్లాడిన మంత్రి తలసాని శ్రీనివాస్.. వచ్చే ఎన్నికల్లో హంగ్ అసెంబ్లీ వచ్చే అవకాశమే లేదని చెప్పారు. కేసీఆర్ సారధ్యంలో బీఆర్ఎస్ పార్టీ మళ్ళీ అధికారంలోకి వస్తుందని ధీమా వ్యక్తం చేశారు. బీఆర్ఎస్ ఖచ్చితంగా కాంగ్రెస్ తో పొత్తు పెట్టుకునే ప్రసక్తే లేదని క్లారిటీ ఇచ్చారు. కోమటిరెడ్డి ఏం మాట్లాడాడో తనకే క్లారిటీ లేదనీ.. ఢిల్లీలో ఓ మాట.. హైదరాబాద్ లో ఓ మాట మాట్లాడిన కోమటిరెడ్డిపై తాను కామెంట్ కూడా చేయదల్చుకోలేదనీ అన్నారు.

తెలంగాణ ముఖ్యమంత్రి కేసీఆర్ ప్రస్తుతం కొండగట్టులో పర్యటిస్తున్న విషయం తెలిసిందే. కొండగట్టు అంజన్నను దర్శించుకునేందుకు వెళ్ళిన కేసీఆర్ కు అక్కడి పండితులు పూర్ణకుంభంతో స్వాగతం పలికారు. ఆ తర్వాత కేసీఆర్ అంజన్నను దర్శించుకొని ప్రత్యేక పూజలు నిర్వహించారు. ఆలయాన్ని సందర్శించిన అనంతరం అక్కడి అధికారులతో భేటీ అయిన కేసీఆర్.. కొండగట్టును దేశంలోనే ప్రముఖ ఆంజనేయ స్వామి క్షేత్రంగా తీర్చిదిద్దాలని.. అందుకోసం మరో 500 కోట్లు కేటాయిస్తున్నామనీ చెప్పారు. ఇప్పటికే కొండగట్టు ఆలయాన్ని అభివృద్ధి చేసేందుకు ఇటీవలే వంద కోట్ల నిధులు కేటాయించిన కేసీఆర్.. ఆ నిధులకు అదనంగా మరో 500 కోట్లు కేటాయించారు.
కొండగట్టు దేవాలయాన్ని వీలైనంత త్వరగా అభివృద్ధి చేయాలని.. తెలంగాణ రాష్ట్రానికి దేశంలో గుర్తింపు తెచ్చే స్థాయిలో అభివృద్ధి జరగాలని కేసీఆర్ ఆదేశించారు. ఆగమశాస్త్రం ప్రకారం నిర్మాణాలు జరిపించాలని ఇంజనీర్లకు దిశానిర్దేశం చేశారు. ఇప్పటికే మొదలైన కొండగట్టు దేవాలయ అభివృద్ధి పనులను పరిశీలించారు. హెలీకాప్టర్ ద్వారా ఆలయాన్ని విహంగ వీక్షణం చేశారు.

తెలంగాణలో పోడు భూముల వివాదానికి తెర దించేందుకు తెలంగాణ సర్కార్ కసరత్తు పూర్తి చేసినట్టు సమాచారం. త్వరలోనే పేదలకు పోడు భూములు పంపిణీ చేసేందుకు రంగం సిద్ధం చేసినట్టు తెలుస్తోంది. రాష్ట్ర వ్యాప్తంగా డిజిటల్ సర్వే చేపడతామని ప్రభుత్వం గతంలో ప్రకటించి విరమించుకుంది. అప్పటి నుంచి రాష్ట్రంలో ఎక్కడ సర్వేలు చేపట్టాలన్నా సర్వేయర్లు తక్కువ మంది ఉండడంతో వేచి చూడాల్సిన పరిస్థితి ఏర్పడింది.. ఇదిలా ఉంటే పొడు భూముల పంపిణీ చేపట్టాలని ప్రభుత్వం భావిస్తున్న నేపథ్యంలో సర్వేయర్ల కొరత సర్కారుకు ఆశనిపాతంలా మారింది.. కొద్దిరోజుల క్రితం పోడు భూముల సమస్య కేంద్రం పరిధిలో ఉందని మంత్రి కేటీఆర్ తెలిపారు.. మళ్లీ కొద్దిరోజుల తరువాత రాష్ట్ర ప్రభుత్వమే ఈ సమస్యను పరిష్కరిస్తుందని, పోడు భూముల సమస్యపై కమిటీని నియమించింది ప్రభుత్వం… కానీ ఈ కమిటీ అటవీ హక్కుల చట్టానికి విరుద్ధంగా ఉండడంతో కమిటీ ఎలాంటి పనులు చేయకూడదని కోర్టు స్టే విధించింది.
రాష్ట్రంలో అటవీ భూములకు హక్కు పత్రాలు కావాలని 4 లక్షల 14 వేల దరఖాస్తులు అందాయి.. గతంలో దాదాపు 90 వేల మందికి పట్టాలు ఇచ్చారు.. ఇప్పటికే దాదాపు లక్షకు పైగా పాత దరఖాస్తులు పెండింగ్‌లో ఉన్నాయి. అయితే పాత, కొత్త దరఖాస్తులు కలుపుకొని 4 లక్షలకు పైగా పట్టాలు ఇవ్వడానికి ప్రభుత్వం సిద్ధమయింది. సుమారు 12 లక్షల ఎకరాల భూమిని పంపిణీ చేయాలని ప్రభుత్వం భావిస్తోంది.. ఫిబ్రవరి నెలాఖరులో పోడు భూముల పంపిణీ చేపడతామని అసెంబ్లీలో సీఎం కేసీఆర్ ప్రకటించారు.
ప్రభుత్వం ఏర్పాటు చేసిన కమిటీ కంటే… అటవీ హక్కు చట్టంలోని నిబంధనల మేరకు ఏర్పాటు చేసిన గ్రామ స్థాయి, డివిజన్, జిల్లా, రాష్ట్ర స్థాయి కమిటీలు పోడు భూముల సమస్య పరిష్కరించవచ్చు.. గ్రామాల్లో గ్రామ సభ ఏర్పాటు చేసిన కమిటీలో 2 / 3 వ వంతు గిరిజన మహిళలు ఉండాలి. ఆ కమిటీ గ్రామంలో ఉన్న పోడు భూములు స్వభావం..? ఎంత మంది గిరిజనులు పోడు వ్యవసాయం చేసుకుంటున్నారు..? వారి ఆర్థిక పరిస్థితులు ఏ విధంగా ఉన్నాయో..? చూసి ఆ గ్రామ కమిటీపై ఉన్నత స్థాయి కమిటీలకు రిఫర్ చేసి… గిరిజనులకు పట్టాలు ఇప్పించవచ్చు… కానీ ప్రభుత్వం అటవీ హక్కుల చట్టానికి వ్యతిరేకంగా కమిటీలు ఏర్పాటు చేసి… సమస్యను మరింత జఠిలం చేయాలని ప్రభుత్వం చూస్తుందన్న అభిప్రాయం వ్యక్తం అవుతోంది.
గ్రామ, సబ్ డివిజనల్, డివిజన్, జిల్లా స్థాయి కమిటీల ఏర్పాటులో భాగంగా గ్రామ సర్పంచ్, ఆ అటవీ ప్రాంతంలో నివసిస్తున్న గిరిజన పెద్దలతో పాటు.. వివిధ స్థాయిల్లో పనిచేస్తున్న రెవెన్యూ, సర్వే సిబ్బంది, అటవీశాఖ అధికారులతో సదరు దరఖాస్తులను పరిశీలించిన తర్వాతే హక్కుల ఉత్తర్వులు జారీ చేయాలి. రాష్ట్రంలోని ఉమ్మడి ఖమ్మం, ఆదిలాబాద్, మహబూబ్‌నగర్, వరంగల్ జిల్లాల్లోని గిరిజన రైతులు, ఫారెస్ట్​అధికారుల మధ్య తరచూ యుద్ధ వాతావరణం నెలకొంటోంది. ఖమ్మం, వరంగల్ జిల్లాల్లో కూడా వరుసగా ఆదివాసీ మహిళలపై ఫారెస్ట్ అధికారులు దాడులు చేస్తున్నారు. పంటల సీజన్ వచ్చిన ప్రతిసారీ పంటలు సాగు చేయడానికి వచ్చిన తమపై ఫారెస్ట్ అధికారులు దాడులు చేసి, అరెస్ట్ చేస్తున్నారని ఆదివాసులు వాపోతున్నారు.
పోడు భూములకు పట్టాలు ఇస్తామని అసెంబ్లీలో కేసీఆర్ ప్రకటించి చెప్పిన నేపథ్యంలో… పట్టాలు ఎప్పుడు ఇస్తారోనని గిరిజనులు ఎదురుచూస్తున్నారు.. ఇప్పటికే మూడు సార్లు కమిటీ భేటీ అయింది.. భేటీలు కావడం తప్ప… పంపిణీ తేదీని ఇప్పటి వరకు ప్రకటించలేదు. ఈ నెలలో పంపిణీ చేసే ఆలోచనలో ఉంది ప్రభుత్వం.. అయితే ఎప్పటి నుంచి పంపిణీ చేస్తారో… వేచి చూడాలి.

ప్రముఖ ఇంటర్నేషనల్ మీడియా సంస్థ బ్రిటిష్ బ్రాడ్ కాస్టింగ్ కార్పోరేషన్-బీబీసీపై మంగళవారం ఉదయం నుంచి జరుగుతున్న ఐటీ సోదాలపై మంత్రి కేటీఆర్ స్పందించారు. ఐటీ, ఈడీ, సీబీఐలను పూర్తిగా మోడీ ప్రభుత్వం తన కంట్రోల్ లో ఉంచుకున్నదని కేటీఆర్ విమర్శించారు. “నెక్స్ట్ ఈడీ దాడులు అదానీ కుంభకోణం గురించి చెప్పిన హిండెన్ బర్గ్ పైనేనా ?” అంటూ సెటైర్లు వేశారు కేటీఆర్. తమ ప్రభుత్వానికి ఎదురు తిరిగిన వారిపై ఐటీ,ఈడీ, సీబీఐ దాడులు చేయించటం మోడీ ప్రభుత్వానికి అలవాటైందంటూ విమర్శించారు. ఈ మేరకు ట్విటర్ లో ట్వీట్ చేశారు.
కొద్ది రోజుల క్రితం బీబీసీ సంస్థ.. ప్రధాని మోడీ పై “ఇండియా – ది మోడీ క్వశ్చన్” పేరుతో ఓ డాక్యుమెంటరీని తెరకెక్కించింది. ఇందులో గుజరాత్ అల్లర్ల విషయంలో మోడీని దోషిగా చెప్పే ప్రయత్నం చేసింది బీబీసీ. దీంతో భారత ప్రభుత్వం దీన్ని నిషేధించింది. ఈ డాక్యుమెంటరీ చేసినందుకే ఇప్పుడు బీబీసీపై ఐటీ దాడులు చేస్తోందంటూ కాంగ్రెస్ సహా ప్రతిపక్షాలు మోడీ ప్రభుత్వంపై విమర్శల దాడి చేస్తున్నాయి. అయితే.. ఎన్డీటీవీని అదానీ గ్రూప్ కొనుగోలు చేయటాన్ని సహించలేని ఓ వర్గం.. బీబీసీతో కావాలనే మోడీపై ఇలాంటి డాక్యుమెంటరీ చేయించింది అనేది కొంత మంది వాదన. అంతే కాదు.. అదానీ గ్రూప్ పై హిండెన్ బర్గ్ నివేదిక వెనుక కూడా ఎన్డీటీవీ, కాంగ్రెస్ పార్టీ కుట్ర ఉంది అని కూడా ఓ వాదన ఉంది. ఎన్డీటీవీని అదానీ గ్రూప్ స్వాధీనం చేసుకున్న కొద్ది రోజులకే బీబీసీ మోడీ వివాదాస్ఫద డాక్యుమెంటరీ విడుదల చేయటం.. ఆ వెంటనే హిండెన్ బర్గ్ అదానీ గ్రూప్ పై నివేదిక విడుదల చేయటం జరగటం చూస్తుంటే ఇవి కావాలని చేసినవే అని స్పష్టంగా అర్థమవుతోందని బీజేపీ నేతలు చెప్తున్నారు.