bhalamedia.com

ఓ నియంత భయపడుతున్నాడు. వింత వ్యాధితో బెంబేలెత్తిపోతున్నాడు. నిత్యం అణ్వస్త్ర ప్రయోగాలతో ప్రపంచదేశాలను గడగడలాడించిన ఉత్తర కొరియా అధ్యక్షుడు కిమ్ జోంగ్..ఇప్పుడు ఓ వింత వ్యాధితో తెగ బాధపడుతున్నాడట. వారానికో అణ్వస్ర్త ప్రయోగం చేసి అగ్రరాజ్యం అమెరికానే వణికించిన కిమ్..ఇప్పుడు అంతకుమించిన భయంతో గజ గజా వణికిపోతున్నాడట. ఒంటి చేత్తో ఏకచత్రాధిపత్యంగా దేశాన్ని ఏలుతున్న కిమ్‌కు ఇప్పుడు కొంతంత కష్టం వచ్చిందట. తాను చెప్పిందే వేదం, చేసిందే శాసనం అన్నట్లుగా ఇన్నాళ్లూ వ్యవహరించిన కిమ్..ఇప్పుడు కుక్కిన పేనులా ఇంట్లో ఓ మూలన కూర్చొని గుక్కపట్టి ఏడుస్తున్నాడట. ఒక్కోసారి నిద్ర పట్టక..అర్థరాత్రి వరకు పెగ్గు మీద పెగ్గు తెగ తాగేస్తూ బోరున విలపిస్తున్నాడట. ఈ విషయాలన్నీ చెప్పింది మరెవరో కాదు..మిర్రర్ అనే ఓ పత్రిక తన కథనంలో కిమ్ గురించి ఆసక్తికరమైన విషయాలను పూసగుచ్చినట్లు వివరించింది.

ఉత్తర కొరియా డిక్టేటర్ కిమ్ జోంగ్ ఉన్ మిడ్ లైఫ్ సంక్షోభంతో బాధపడుతున్నారని, రోజంతా ఏడుస్తూ, మద్యం తాగుతూ గడుపుతున్నారంటూ ఓ నివేదిక తాజాగా వెలుగులోకి వచ్చి సంచలనం సృష్టిస్తోంది. ఈ వారంలో 40వ వడిలోకి ప్రవేశించిన ఆయన ప్రజలకు దూరంగా గడుపుతుండడం ఈ ఊహాగానాలకు ఊతమిస్తోంది. ఆయన తీవ్ర అనారోగ్యంతో బాధపడుతున్నట్టు రకరకాల ఊహాగానాలు విన్పిస్తున్నాయి. ఉత్తర కొరియా అధ్యక్షుడు కిమ్..ప్రస్తుతం మిడ్ లైఫ్ సంక్షోభం’తో బాధపడుతున్నాడని ‘మిర్రర్’ ఓ కథనంలో పేర్కొంది.
ఉత్తర కొరియా అధ్యక్షుడు కిమ్ జోంగ్ ఉన్‌ మిడ్ లైఫ్ సంక్షోభంతో బాధపడుతున్నట్లు వార్తా కథనాలు రావడంతో..అసలు మిడ్‌ లైఫ్ సంక్షోభం అంటే ఏంటి అన్నది ఇప్పుడు అందరిలోనూ ఆసక్తికరంగా మారింది. మిడ్ లైఫ్ సంక్షోభం అంటే మరేదో కాదని..ఇది ఒక నిర్దిష్ట మానసిక అనారోగ్యమని వివరించారు. మగవాళ్లు మధ్య వయసులోకి మారినప్పుడు కలిగే అసంతృప్తి, ఆందోళన, నిరాశ, పశ్చాత్తాపం వంటివి మెదడును చుట్టుముట్టి మనిషిని ఉక్కిరి బిక్కిరి చేస్తాయట. దీనినే ‘మిడ్ లైఫ్ క్రైసిస్’ అంటారని వైద్య నిపుణులు చెప్తున్నారు. కిమ్ 40 ఏళ్ల వయసులోకి ప్రవేశించారని, అందుకే ఆయన ఇలాంటి వింత పరిస్థితులను ఎదుర్కొంటున్నారని సియోల్‌కు చెందిన నార్త్ కొరియన్ విద్యావేత్త ఒకరు చెప్తున్నారు. కిమ్ రోజులో చాలా వరకు మద్యం తాగుతూ ఏడుస్తున్నట్టు వివరించారు. పెగ్గుల మీద పెగ్గులు తాగుతున్నాడట. అంతేకాదు..ఒక్కోసారి ఒంటరిగా గడుపుతూ తీవ్ర మానసిక ఒత్తిడిని ఎదుర్కొంటున్నట్టు వివరించారు. అయితే ఇలాంటి మానసిక సంబంధిత సమస్య నుంచి బయటపడాలంటే నిత్యం వ్యాయామం చేయాలని వైద్యులు సూచిస్తున్నారు. అయితే కిమ్ మాత్రం..డాక్టర్లు చెప్పిన సలహాలు, సూచనలను పెడచెవిన పెడుతున్నారని ‘మిర్రర్’ నివేదించింది. తన అనారోగ్య వార్తలపై కిమ్ ఆందోళన చెందుతున్నట్టు పేర్కొంది. అంతేకాదు, కిమ్ విదేశాలకు వెళ్తున్నప్పుడు కూడా సొంత టాయిలెట్‌ను తీసుకెళ్తున్నట్టు ‘మిర్రర్’ ఆ కథనంలో పేర్కొంది. తన ఆరోగ్య సమస్యలు తెలుసుకోవడానికి గూఢచారులు తన మలమూత్ర విసర్జాల కోసం వెతకకుండా ఉండేందుకే ఆయన ఈ నిర్ణయం తీసుకున్నట్టు వివరించింది. కిమ్ తన వ్యక్తిగత జీవితాన్ని చాలా రహస్యంగా ఉంచుతారు.

గతేడాది తొలిసారి కిమ్ తన కుమార్తెతో కలిసి బహిరంగంగా కనిపించారు. ఆ సమయంలో కిమ్ ఎంతో ఉల్లాసంగా, ఉత్సాహంగా, ఆరోగ్యంగా కన్పించారు. తన వ్యక్తిగత జీవితాన్ని ఎంతో గోప్యంగా ఉంచే ఉత్తర కొరియా అధినేత కిమ్ జోంగ్ ఉన్ మొట్టమొదటి సారి బహిరంగంగా కనిపించడం అప్పట్లో పెను సంచలనం రేపింది. తెల్లటి జాకెట్ ధరించిన కుమార్తె చేతులు పట్టుకొని నడుస్తూ కిమ్ జోంగ్ కనిపించినట్లు మీడియా వెల్లడించింది. క్షిపణి ప్రయోగం సందర్భంగా కిమ్ తన వెంట కుమార్తెను తీసుకొచ్చినట్లు అప్పట్లో పలు కథనాలు వెలువడ్డాయి. అంతకుముందు కొన్ని నెలల క్రితం కిమ్ జోంగ్ తన భార్య సోల్ జుతో కలిసి బహిరంగంగా కనిపించారు. అప్పుడు కూడా కిమ్ ఎంతో యాక్టీవ్‌గా కన్పించారు. కానీ ప్రస్తుతం కిమ్..ఎందుకిలా వింతలా ప్రవర్తిస్తున్నారు అనేది కొంత ఆసక్తికరంగా మారింది. మిడ్‌ లైఫ్ క్రైసిస్‌తో బాధపడుతున్నట్లు వైద్యులు తెలిపినా…దీని వెనుక ఇంకా ఏదైనా సీక్రెట్ ఉందా అన్నది ఇప్పుడు ఉత్కంఠగా మారింది. గతంలోనే కిమ్‌ అనారోగ్యానికి గురైనట్లు స్వయంగా ఆయన సోదరే మీడియా సాక్షిగా ప్రకటించడం అప్పట్లో పలు ఊహాగానాలకు ఊతమిచ్చింది. కరోనా సోకినట్లు కిమ్ సోదరి ప్రకటించినా..అంతకు మించిన అనారోగ్య సమస్యలేవో కిమ్‌ను వెంటాడుతున్నాయనే అనుమానాలు తలెత్తాయి.

మొత్తానికి ఉత్తర కొరియా అధ్యక్షుడు కిమ్‌కు ఏమైందన్న సందేహాలు సర్వత్రా తలెత్తుతున్నాయి. నిత్యం క్షిపణి పరీక్షలతో ప్రపంచ దేశాలకు వణుకు పుట్టించిన కిమ్..ఇప్పుడు కిమ్మనకుండా ఇంట్లోనే కాలం వెల్లదీస్తుండడంపై అనేక అనుమానాలు, సందేహాలు వెల్లువెత్తుతున్నాయి. పరిమితికి మించి మద్యం తాగుతుండడం, నిద్రలేని రాత్రులు గడుపుతుండడం, ఇంట్లో ఒంటరిగా ఏడవడం వంటి క్రియలు దేనికి సంకేతమన్న అనుమానాలు తలెత్తుతున్నాయి. కిమ్ ప్రస్తుతం మధ్య వయసుతో బాధపడుతున్నట్లు వైద్యులు ప్రకటించినా..అసలు కిటుకు ఇంకేదో ఉందనే సంకేతాలు విన్పిస్తున్నాయి. కిమ్ ఆరోగ్యంపై గతంలో ఎన్నో వార్తలు పుకార్లు, షికార్లు చేశాయి. ప్రస్తుతం కిమ్‌కు తలెత్తిన అనారోగ్య సమస్య కూడా ఇప్పుడు హాట్‌ టాపిక్‌గా మారింది.

పరారీలో ఉన్న మోస్ట్ వాంటెడ్ క్రిమినల్ అండర్ వరల్డ్ గ్యాంగ్‌స్టర్ దావూద్ ఇబ్రహీం నెక్ట్స్ టార్గెట్ ఏంటనే సంచలన విషయాన్ని అతని మేనల్లుడు అలీషా పార్కర్ బయటపెట్టాడు. దేశంలోని పలు ప్రాంతాల్లో ఎన్ఐఏ అధికారులు దాడులు చేసి దావూద్ ఇబ్రహీం ఉగ్రవాద నెట్‌వర్క్‌కు సంబంధించి పలువురిని అరెస్టు చేశారు. అందులో భాగంగా ఉగ్రవాదులకు నిధులు సమకూర్చాడన్న కేసులో అరెస్ట్ అయిన దావూద్ సోదరి హసీనా పార్కర్ కుమారుడు అలీషాను..NIA అధికారులు విచారించారు. అయితే విచారణలో దావూద్‌కు సంబంధించిన అనేక కీలక విషయాలను వెల్లడించాడు. అలీషా తెలిపిన వివరాలు ఇప్పుడు సంచలనం రేకెత్తిస్తున్నాయి. భారత్‌లోని అనేక మంది ప్రముఖ నేతలు, వ్యాపారవేత్తలపై దాడులు చేసేందుకు దావూద్ ప్రత్యేక బృందాన్ని ఏర్పాటు చేసుకున్నాడని…ఈ గ్యాంగ్ పెద్ద పెద్ద నగరాల్లో అనేక హింసాత్మక ఘటనలకు పాల్పడుతుందని అలీషా NIA విచారణలో బయటపెట్టాడు. ప్రస్తుతం కరాచీలో ఉంటున్న దావూద్ కుటుంబంతో పాటు మరో ప్రాంతానికి తన మకాం మర్చాడని వివరించాడు. ప్రస్తుతం అండర్ వరల్డ్ డాన్ దావూద్ ఇబ్రహీం..అతని సన్నిహితులు అనీస్ ఇబ్రహీం షేక్, ముంతాజ్ రహీమ్ ఫకీ తదితరులు తమ కుటుంబాలతో సహా పాకిస్తాన్‌లోని కరాచీ డిఫెన్స్‌ కాలనీలో అబ్దుల్లా ఘాజీ బాబా దర్గ వెనుక నివసిస్తున్నాడని తెలిపాడు.
అంతేకాదు..దావూద్‌కు నలుగురు సోదరులు, సోదరీమణులు ఉన్నారని అలీషా తెలిపాడు. దావూద్‌కు ముగ్గురు కుమార్తెలు, ఒక కుమారుడు ఉన్నట్లు వివరించాడు. జాతీయ దర్యాప్తు సంస్థ..NIA విచారణలో దావూద్ మొదటి భార్య మెహజబీన్ గురించీ అలీషా అనేక కీలక విషయాలను బయటపెట్టాడు. అండర్ వరల్డ్ డాన్ దావూద్ ఇబ్రహీం 2022 సెప్టెంబర్ నెలలో రెండో పెళ్లి చేసుకున్నాడని వివరించాడు. తన మొదటి భార్యకు ఇంకా విడాకులు ఇవ్వలేదని అలీషా చెప్పాడు. దావూద్ రెండవ వివాహం మెహజబీన్ నుంచి దర్యాప్తు సంస్థల దృష్టిని మరల్చడానికి చేసిన ప్రయత్నం కూడా కావచ్చని NIA అధికారులు అనుమానిస్తున్నారు. 2022 జులై నెలలో తాను దావూద్ ఇబ్రహీం మొదటి భార్యను దుబాయ్‌లో కలిశానని, రెండో మహిళతో దావూద్ వివాహం గురించి ఆమె తనకు చెప్పిందని అలీ షా వివరించాడు. మెహజబీన్ షేక్ వాట్సాప్ కాల్స్ ద్వారా భారతదేశంలోని బంధువులతో దావూద్ సంబంధాలు కొనసాగిస్తున్నాడని అలీషా తెలిపాడు.

అనేక నేరాలకు పాల్పడి అండర్ వరల్డ్ డాన్‌గా ముద్రపడిన దావూద్ ఇబ్రహీం నేర చరిత్రను చూస్తే కళ్లు బైర్లు కమ్మాల్సిందే. షేక్ దావూద్ ఇబ్రహీం, హాజీ మస్తాన్ గ్యాంగ్‌తో తన నేర సామ్రాజ్యాన్ని ప్రారంభించాడు. ఆ తర్వాత కొద్ది కాలంలోనే ముంబై అండర్ వరల్డ్‌లో కీలకంగా ఎదిగాడు. అయితే మస్తాన్ రాజకీయాల్లోకి వచ్చిన తర్వాత ఆ గ్యాంగ్‌ను స్వాధీనం చేసుకొని ముఠాను మరింత పెద్దదిగా మార్చాడు. ప్రపంచంలోనే లార్జెస్ట్ క్రైమ్ సిండికేట్లలో ఒక దాన్ని దావూద్ నడుపుతున్నడంటే..ఇతని నెట్‌వర్క్‌ ఎంతలా వ్యాపించిందో అర్థం చేసుకోవచ్చు. 1993 ముంబై పేలుళ్ల సూత్రదారి అయిన దావూద్ ఇబ్రహీం 12 చోట్ల పేలుళ్లతో 257 మంది అమాయకులను పొట్టనపెట్టుకున్నాడు. అంతేకాదు ఈ దాడుల్లో దాదాపు 700 మంది తీవ్ర గాయాలయ్యాయి. దీంతో గ్లోబల్ టెర్రరిస్టుగా ఐక్యరాజ్యసమితి భద్రతా మండలి దావూద్‌ను గుర్తించింది. అంతేకాదు 2003లో దావూద్ ఇబ్రహీంను, భారత దేశం, అమెరికాలు గ్లోబల్ టెర్రరిస్టుగా గుర్తించాయి. అంతేకాదు దావూద్‌పై 25 మిలియన్ డాలర్ల రివార్డును సైతం ప్రకటించాయి. దీంతో అరెస్ట్‌ను తప్పించుకోవడానింకి దావూద్ పాకిస్తాన్‌లో తల దాచుకుంటున్నాడు. ఈ విషయాన్ని 2018లో భారత్ సైతం ధృవీకరించింది. ఆయుధాల స్మగ్లింగ్, నార్కో టెర్రరిజం, అండర్ వరల్డ్ క్రిమినల్ సిండికేట్, నకిలీ భారతీయ కరెన్సీ నోట్లను అక్రమంగా తరలించడానికి పాకిస్తాన్ ఏజెన్సీలు, ఉగ్రవాద సంస్థల సహాయంతో ఉగ్రవాద దాడులను నిర్వహించడానికి దావూద్ ఇబ్రహీం డీ కంపెనీ పేరుతో భారత్‌లో ఒక యూనిట్‌గా ఏర్పాటు చేసిందని గతంలోనే ఎన్ఐఏ దర్యాప్తులో తేలింది. పాక్ కేంద్రంగా పనిచేస్తున్న లష్కరే తోయిబా, అల్‌ఖైదా, జైషే మహ్మద్ వంటి అంతర్జాతీయ ఉగ్ర ముఠాలకు ఈ డీ కంపెనీ కీలక సమాచారం అందిస్తోంది. అంతేకాదు..ఆఫ్రికా దేశాలను డీ కంపెనీ పట్టి పీడిస్తోంది. నైజీరియాకు చెందిన బోకో హరమ్ ఉగ్ర సంస్థలో కూడా డీ కంపెనీ పెట్టుబడులు పెట్టినట్లు విచారణలో తేలింది. ముంబై బాంబు పేలుళ్ల కేసు, పలు ఉగ్ర సంబంధింత కార్యకలాపాలతో పాటు దోపిడీలు, హత్యలు, స్మగ్లింగ్ కేసుల్లో నిందితుడిగా దావూద్‌పై అనేక కేసులు నమోదయ్యాయి. 2008లో ముంబైలో జరిగిన ఉగ్ర దాడుల్లో..దావూద్ తాజ్ మహల్ హోటల్‌తో సహా నగరంలో పేలుళ్లకు ఉగ్రవాదులను తరలించాడు. 2013 ఐపీఎల్ సమయంలో తన సోదరుడు అనీస్ సాయంతో బెట్టింగ్ రాకెట్‌ను సైతం దావూద్ నడిపించాడనే ఆరోపణలున్నాయి.

దావూద్ మేనల్లుడు అలీషా చెప్పిన వివరాల ప్రకారం అండర్ వరల్డ్ డాన్..పాకిస్తాన్‌లోని కరాచీలోనే ఉన్నట్లు స్పష్టమవుతోంది. ఉగ్రవాదులకు పుట్టినిల్లుగా మారిన పాకిస్తాన్‌లోనే ఉంటూ తన నేర సామ్రాజ్యాన్ని ఇంకా నడిపిస్తున్నాడు. పాక్‌లో ఉంటూనే భారత్‌లోని తన బంధువులతో నిత్యం వాట్సాప్‌ కాల్స్‌లో టచ్‌లో ఉంటున్నాడు. అయితే అండర్ వరల్డ్ డాన్‌ను ఎలాగైనా అంతమొందించాలన్న లక్ష్యంతో ఇటు భారత్‌తో పాటు అమెరికా, ఐక్యరాజ్యసమితి సంయుక్తంగా వేట ప్రారంభించాయి. దావూద్‌ను అంతమొందించేందుకు అమెరికా సీక్రెట్ ఏజెన్సీలు రంగంలోకి దిగినట్లు సమాచారం.