రిలీజ్ కు ముందే దేశవ్యాప్తంగా హాట్ టాపిక్ గా మారిన ది కేరళ స్టోరీ విషయంలో రోజుకోసారి బ్రేకింగ్ న్యూస్ లో ఉంటూ వస్తోంది. లేటెస్ట్ గా ది కేరళ స్టోరీ సినిమాపై నిషేధం విధించాల్సిన అవసరం ఏమొచ్చిందంటూ సుప్రీంకోర్టు పశ్చిమ బెంగాళ్ ప్రభుత్వాన్ని సూటిగా ప్రశ్నించింది. అంతే కాదు.. సినిమాపై నిషేధం ఎత్తివేసి భద్రత కల్పించి మరీ సినిమాను థియేటర్లలో విడుదల చేయాలంటూ మమతా బెనర్జీ ప్రభుత్వానికి ఊహించని షాక్ ఇచ్చింది. ఓ వర్గం మనోభావాలు దెబ్బతినేలా ఉన్నాయని అభ్యంతరం చెప్తూ మమతా బెనర్జీ ప్రభుత్వం పశ్చిమ బెంగాల్ రాష్ట్ర వ్యాప్తంగా ది కేరళ స్టోరీ సినిమాను నిషేధించింది. కానీ తాజా సుప్రీం నిర్ణయం మమతకు పెద్ద ఎదురుదెబ్బగా మారింది. ది కేరళ స్టోరీ సినిమాపై నిషేధం ఎత్తివేయాలంటూ సినిమా నిర్మాతలు సుప్రీంకోర్టును ఆశ్రయించగా ఈ కేసును విచారించిన సుప్రీం ధర్మాసనం ఈ సందర్భంగా సంచలన వ్యాఖ్యలు చేసింది.
విచారణ సందర్భంగా సుప్రీం సొలిసిటర్ జనరల్ హరీష్ సాల్వే మమతా బెనర్జీ ప్రభుత్వానికి కొన్ని ప్రశ్నలు వేశారు. ఒక్కసారి సెన్సార్ బోర్డు సినిమాను పూర్తిగా చూసి అవసరం లేని సన్నివేశాలు తొలగించాలని చెప్పిందనీ.. ఆ తర్వాత రెండోసారి సినిమాను సెన్సార్ బోర్డు సభ్యులు పూర్తిగా చూసి అనుమతి ఇచ్చారనీ సాల్వే పేర్కొన్నారు. సెన్సార్ సర్టిఫై చేసిన తర్వాత మళ్ళీ దానిపై రాష్ట్రాలు సొంత నిర్ణయాలు తీసుకోవాల్సిన సందర్భాలు ఎందుకు వస్తున్నాయంటూ ఆయన బెంగాల్ ప్రభుత్వాన్ని ప్రశ్నించారు. శాంతి భద్రతల సమస్యల పేరుతో సినిమాల విడుదలను ఆపటం కాకుండా.. శాంతి భద్రతలను రక్షించేందుకు చర్యలు తీసుకోవచ్చు కదా అంటూ మరో ప్రశ్న సంధించారు. వెంటనే సినిమాపై నిషేధం ఎత్తివేసి విడుదలకు ఏర్పాట్లు చేయాలని స్పష్టమైన ఆదేశాలు జారీ చేశారు. దీనిపై మమతా బెనర్జీ ప్రభుత్వం ఎలా స్పందిస్తుందో చూడాలి.
