bhalamedia.com

ప్రతి సంవత్సరం లాగానే ఈసారి బడ్జెట్ వల్ల కొన్ని వస్తువుల ధరలు పెరిగితే మరికొన్ని వస్తువుల ధరలు తగ్గనున్నాయి. అవేంటో ఓ సారి చూస్తే..
ముబైల్ ఫోన్లు, ల్యాప్ టాప్ ల ధరలు కాస్త తగ్గే అవకాశం ఉంది. అలాగే కెమెరా లెన్సులపై యేడాదిపాటు 2.5 శాతం పన్ను మినహాయింపు వల్ల కెమెరాలు, లెన్సుల ధరలు తగ్గే అవకాశం ఉంది. లిథియం అయాన్ బ్యాటరీలపై పన్ను మినహాయింపు లభించింది. దీంతో ఎలక్ట్రిక్ వాహనాల ధరలపై ప్రభావం పడుతుంది. ఎలక్ట్రిక్ టూవీలర్ల ధరలు కాస్త తగ్గే అవకాశం ఉంది. అలాగే రొయ్యలు, రొయ్యల ఉత్పత్తుల ధరలు తగ్గుతాయి. ఇక వజ్రాలు, వజ్రాల నగలపై కూడా పన్ను మినహాయింపు లభించింది. ఇకపోతే.. బంగారం, వెండి, ప్లాటినం వంటి వాటి ఉత్పత్తులపై పన్నులు పెరిగాయి కాబట్టి ఆయా వస్తువుల ధరలు పెరిగే అవకాశం ఉంది. ప్రతి సంవత్సరం లాగానే ఈసారి కూడా సిగరెట్లపై ట్యాక్స్ పెరిగింది. రబ్బరు, టైర్లు, రాగి వంటి వాటిపై కూడా పన్నులు పెంచారు.

బడ్జెట్ 2023-24లో కేంద్ర ప్రభుత్వం సామాన్యుడిపై జాలి చూపించింది. సంవత్సరానికి 7 లక్షల వేతనం కంటే ఎక్కువ ఉన్న వారు మాత్రమే ఇకపై ఆదాయపన్ను చెల్లించాల్సి ఉంది. 7 లక్షల లోపు వార్షికాదాయం ఉన్న వాళ్ళకు ఆదాయపన్ను నుంచి మినహాయింపు లభించింది. ఇది సగటు వేతన జీవికి భారీ ఉరట అని చెప్పాలి. పెట్రోల్, డీజిల్, గ్యాస్.. ఇలా విపరీతమైన ధరల పెరుగుదలతో ఇంతకు ముందు కంటే రెట్టింపు పన్నులు చెల్లిస్తున్న మధ్య తరగతి మనుషులు.. సంపాదించే కాస్త సంపాదనపై కూడా ఆదాయపు పన్ను చెల్లించాల్సి రావటం భారత పన్నుల వ్యవస్థలో ఉన్న అతి పెద్ద తప్పు. ఇప్పుడు ఈ ప్రభుత్వం దాన్ని సవరించింది. కనీసం ఈసారైనా ఆదాయపు పన్ను స్లాబ్ ను భారీగా పెంచి ఊరటనిచ్చింది.
అలాగే కొత్త బడ్జెట్ లో కేంద్ర ప్రభుత్వం భారీ నిర్ణయాలే తీసుకుందని చెప్పాలి. అంతర్జాతీయంగా భారత్ పలుకుబడి పెరిగిన వేళ.. భారతదేశాన్ని సందర్శించాలనుకునే వాళ్ళ సంఖ్య పెరుగుతుంది. కాబట్టి ఇండియా టూరిజం కోసం కొత్త ప్రణాళికలు తీసుకురావాలన్న ఆలోచన కేంద్ర ప్రభుత్వానికి రావటం గొప్ప విషయమే. “దేఖో అప్నా దేశ్” పేరిట కేంద్రం కొత్త పథకాన్ని ప్రవేశపెట్టింది. ఇక ప్రపంచాన్ని మాంద్యం కమ్ముకొస్తున్న వేళ కొత్త సంస్కరణలు భారత బ్యాంకింగ్ కు బలం చేకూరుస్తాయి. దేశంలో ఏ లావాదేవీ జరిగినా చివరకు అది బ్యాంకుకు ముడిపడే ఉంటుంది కాబట్టి.. దీని వల్ల మిగతా రంగాలలో మార్పులు జరుగుతాయి. వ్యవసాయ రంగానికి కేటాయింపులు పెరిగాయి. మహిళల కోసం ప్రత్యేక కేటాయింపులు జరిగాయి. ప్రపంచం ఎలక్ట్రిక్ వాహనాల వెంట పడుతున్న వేళ.. లిథియం అయాన్ బ్యాటరీపై పన్నుల తగ్గింపు ఆ రంగానికి ఊరటనిస్తుంది. ఏదిఏమైనా ఈ బడ్జెట్ లో సామాన్యుడికి మేలు చేసే నిర్ణయాలు మాత్రం తీసుకున్నారని చెప్పొచ్చు.

మైనర్ బాలిక అత్యాచారం కేసులో ఈ రోజు ఉదయం కోర్టు ఆశారాం బాపూ అనే దొంగ బాబాకు జీవితఖైదు విధించిన విషయం తెలిసిందే. 2013లో సూరత్ కు చెందిన ఓ మహిళ ఆశారాం బాపూ తనపై అత్యాచారం చేశాడంటూ ఓ మహిళ కేసు పెట్టింది. కేసు నమోదు చేసిన పోలీసులు 2014లో చార్జి షీట్ దాఖలు చేసిన పోలీసులు ఏడుగురిని సాక్షులుగా చేసి విచారణ చేపట్టగా.. చాలా పరిణామాల తర్వాత 2018లో జోధ్ పూర్ కోర్టు జీవితకాల కారాగార శిక్ష విధించింది. మళ్ళీ కొన్ని పరిణామాల తర్వాత నేడు ఆశారాంకు శిక్ష ఖరారైంది. శిక్షకు గురైన ఆశారాం ఆస్తులపై ఇప్పుడు పెద్ద చర్చే జరుగుతోంది.
1941లో పాకిస్తాన్ లోని సింధ్ ప్రాంతంలో పుట్టిన ఆశారాం అసలు పేరు అసుమల్ హర్పలానీ. 1947 తర్వాత అహ్మదాబాద్ లో స్థిరపడింది ఆశారాం కుటుంబం. 1960లో లీలాషా అనే ఆధ్యాత్మిక గురువు వద్ద శిష్యుడిగా చేసిన ఆశారాం.. ఆ తర్వాత సబర్మతి నది ఒడ్డున సొంత ఆశ్రమాన్ని నిర్మించటం.. ఆ తర్వాత ఏకంగా 400 ఆశ్రమాలు నిర్మించే స్థాయికి చేరుకోవటం చాలా వేగంగా జరిగిపోయాయి. ఉచిత అన్నదానాలు.. ఆశ్రమాలతో కోట్లాది మంది భక్తులను సంపాదించుకున్న ఆశారాం పేరిట కోట్లాది రూపాయల ఆస్తులు ఉన్నాయి. ఒక్క గుజరాత్ లోనే కాదు దేశవ్యాప్తంగా చాలా రాష్ట్రాల్లో ఆశ్రమ భ‌వనాలు, వాటి పేరిట ట్రస్టులు, వాటి అకౌంట్లలో కోట్లాది రూపాయలు ఉన్నాయి. విదేశాల్లో కూడా ఆస్తులు కూడబెట్టాడు ఆశారాం. ఒక్క గుజరాత్ లోని ఆస్తుల విలువే 10 వేల కోట్ల పైమాటే. అంటే మొత్తం ఆస్తుల విలువ కనీసం లక్ష కోట్లు ఉండొచ్చని అంచనా.
ఆశారాం పెద్ద మాఫియా అనే ఆరోపణలు కూడా ఉన్నాయి. ఎందుకంటే ఆశారాం కేసు విచారణ జరుగుతున్నన్ని రోజులూ ఎన్నో సంచలనాలు నమోదయ్యాయి. కేసు విచారణ సమయంలో సాక్ష్యం చెప్పేందుకు వచ్చే వాళ్ళలో చాలా మంది అయితే కనిపించకుండా పోయేవాళ్ళు.. లేదంటే సడన్ గా మరణించేవారు. ఇదంతా ఆశారాం మాఫియానే చేస్తుందని ఆరోపణలు వచ్చినా రుజువులు దొరకలేదు. దేశవ్యాప్త నెట్ వర్క్ నిర్మించుకున్న ఆశారాం.. చాలా నేరాలకు పాల్పడేవాడు. కానీ బయటకు రాలేదు సరికదా.. ఎవ్వరికీ అనుమానం కూడా కలగలేదు. మాజీ ప్రధానమంత్రి అటల్ బిహారీ వాజ్ పేయి సహా ప్రస్తుత ప్రధాని నరేంద్ర మోడీ కూడా ఈ ఫేక్ బాబాను నమ్మి సందర్శించే వాళ్ళు. నేటితో ఈ కేసు ముగిసింది.. ఎట్టకేలకు ఆశారాం శిక్షకు గురయ్యాడు.

కరోనా కల్లోలం నుంచి కోలుకునే పనిలో డ్రాగన్ బిజీబిజీగా ఉందనే అందరూ అనుకుంటున్నారు. బీజింగ్ బిజీగానే ఉంది కానీ, కోవిడ్‌ నివారణ చర్యల్లో కాదు. ప్రత్యర్ధులపై పావులు కదపడంలో. ఔను.. ఇదే విషయాన్ని అగ్రరాజ్యం అమెరికాకు చెందిన ఎయిర్‌ఫోర్స్‌లో టాప్ జనరల్ అంచనా వేసినట్టు వాషింగ్టన్ పోస్ట్ తెలిపింది. తైవాన్‌ ఆక్రమణకు, అమెరికాపై యుద్ధానికీ ఒక్కసారే సిద్ధమయ్యేలా బీజింగ్ గ్రౌండ్‌వర్క్‌ చేస్తున్నట్టు ఆ జనరల్ అంచనా వేశారట. “డ్రాగన్ ఏ క్షణానైనా దండెత్తే ఛాన్స్‌ ఉంది.. యుద్ధానికి సిద్ధం కావాలంటూ అధికారులకు అంతర్గతంగా లేఖలు సైతం పంపినట్టు వాషింగ్టన్ పోస్ట్ తన కథనంలో రాసింది.
మైక్ మినిహాన్ అనే అమెరికన్ ఎయిర్ ఫోర్స్ టాప్ జనరల్ దీనిపై సైన్యాధికారులకు లేఖలు రాశాడు. ఆ లేఖల్లోని సారాంశమేంటంటే.. బీజింగ్ ఏ క్షణానైనా అమెరికాపై దండెత్తొచ్చని. ఫలితంగా యుద్ధానికి సిద్ధంగా ఉండాలని చెప్పారు. ఈ యుద్దం లక్ష్యం చైనాను అడ్డుకోవడమేనని.. లేదంటే డ్రాగన్‌ను ఓడించడమేనని లేఖలో పేర్కొన్నారు. ఒకవేళ తన అంచనా తప్పు కావొచ్చంటూనే.. 2025లో బీజింగ్‌తో కచ్చితంగా పోరాడుతామని తన సిక్స్త్‌ సెన్స్ చెబుతోందని ఆ లేఖలో చెప్పుకొచ్చారు.
ఎయిర్‌ ఫోర్స్‌లోని ఎయిర్‌ మబైలిటీ కామాండ్‌ హెడ్‌ ఈ జనరల్‌ మైక్‌ మినిహాన్‌.. అతడి కింద 50వేల మంది సైనికులు, 500 యుద్ధ విమానాలు ఉంటాయి. ఎయిర్‌ ఫోర్స్‌లో టాప్‌ అధికారి కావడంతో ఇప్పుడు మినిహాన్‌ లేఖలు అమెరికాతోపాటు ప్రపంచవ్యాప్తంగా సంచలనం సృష్టిస్తున్నాయి.
తైవాన్‌ను టార్గెట్ చేయడం వరకూ ఓకే. కానీ, అగ్రరాజ్యం అమెరికాను బీజింగ్ ఎందుకు లక్ష్యం చేసుకుంటుంది? ఇదేం సమాధానం దొరకని భేతాళ ప్రశ్నేం కాదు. తైవాన్‌ కావాలంటే బీజింగ్ కచ్చితంగా అమెరికాను ఓడించాలి. లేదంటే తైవాన్‌ను హస్తగతం చేసుకునేలోపే అమెరికా మిస్సైళ్లు బీజింగ్‌ను ధ్వంసం నామరూపాల్లేకుండా తుడిచిపెట్టేస్తాయి. ఇటీవల తైవాన్‌, చైనా ఉద్రిక్తతల సమయంలో ఇదే మాట వైట్‌హౌస్ పదే పదే చెబుతూ వచ్చింది. దీనికితోడు జిన్‌పింగ్ సేనలు తైవాన్‌‌ను చుట్టుముట్టిన క్షణాల్లోను అమెరికా అంతకుమించిన యాక్షన్‌ను షురూ చేసింది. తైవాన్ తమదే అనీ, అందులో వేలు పెట్టొద్దంటూ బీజింగ్ పదే పదే హెచ్చరించినా లెక్కచేయకుండా యుద్ధ నౌకలు, ఫైటర్ జెట్లను మోహరిస్తూ కవ్వించింది. అంతటితో ఆగకుండా ఉద్రిక్తతలు తీవ్రమైన వేళ ఏకంగా అమెరికా స్పీకర్ నాన్సీ పెలోసీ తైపీలో పర్యటించి డ్రాగన్‌కు సవాల్ చేసింది. ఆ సమయంలో పెలోసీ తైపీలో అడుగుపెడితే తమ యుద్ధ విమానాలు రంగంలో దిగుతాయని హెచ్చరించిన చైనా.. చివరికి ఆ సాహసం కూడా చేసింది. అయితే, పెలోసీ పర్యటనను అడ్డుకోలేక ప్రపంచం ముందు అభాసుపాలైంది. అప్పట్నుంచే తైవాన్‌తో పాటూ అమెరికాను టార్గెట్ చేయడం మొదలైంది.
నిజానికి.. గతేడాది ఆగస్ట్‌లోనే తైవాన్‌ విషయాన్ని తేల్చేయాలని బీజింగ్ భావించింది. కానీ, అధ్యక్ష ఎన్నికలు జిన్‌పింగ్‌ను ఆపేశాయి. చైనా గత చరిత్రను తిరగరాస్తూ మూడోసారి అధ్యక్షుడిగా ఎన్నిక కావడంపైను దృష్టి సారించడంతో తైవాన్ అంశాన్ని కాస్త పక్కనపెట్టారనే వార్తలు వినిపించాయి. చివరికి జిన్‌పింగ్ మూడోసారి అధ్యక్షుడిగా బాధ్యతలు చేపట్టిన వెంటనే యుద్ధానికి సిద్ధం కావాలని ఆదేశించడం, అలాగే త్రివిధ దళాల్లో అమెరికాను దాటేసేందుకు ఆయుధాలపై ఫోకస్ చేయడం లాంటి నిర్ణయాలు బీజింగ్ తీసుకుంది. మొదట ఈ పరిణామాలన్నీ భారత్‌పై యుద్ధానికే అని భావించినా.. మైక్ లేఖతో తైవాన్‌, అమెరికాపై యాక్షన్‌ కోసమే అనే వాదనలు వినిపిస్తున్నాయి. సరిగ్గా ఇలాంటి సమయంలోనే దక్షిణ చైనా సముద్రంలో అమెరికా తన సైనిక విన్యాసాలు నిర్వహించడం లాంటి పరిణామా లు చూస్తుంటే మైక్ అనుమానాలే నిజమవుతాయేమో అంటున్నారు మిలటరీ ఎక్స్‌పర్ట్స్ ఏదేమైనా చైనా దూకుడుతో మరో యుద్ధానికి సమయం ఆసన్నమైనట్టే కనిపిస్తోంది.