bhalamedia.com

ఉత్తర్ ప్రదేశ్ ముఖ్యమంత్రి యోగీ ఆదిత్యనాథ్ ను చంపేస్తామంటూ వచ్చిన ఓ బెదిరింపు ఫోన్ కాల్ తో యూపీ పోలీస్ యంత్రాంగం అప్రమత్తమైంది. పేరుమోసిన గ్యాంగ్ స్టర్ అతీక్ అహ్మద్ హత్య జరిగినప్పటి నుంచి ఇలాంటి బెదిరింపులు వినిపిస్తున్నా.. ఇప్పుడు నేరుగా యోగీనే హతమారుస్తామంటూ వచ్చిన ఫోన్ కాల్ కలకలం రేపింది. అతీక్ ను చంపినందుకు ప్రతీకారంగా భారత్ పైనా.. ఉత్తర్ ప్రదేశ్ పైనా దాడులు చేస్తామంటూ ఇదివరకే పాకిస్తాన్ కేంద్రంగా పనిచేసే తీవ్రవాద సంస్థల నుంచి హెచ్చరిక లేఖలు వచ్చిన విషయం తెలిసిందే. ఇటీవల ప్రధాని మోడీ కేరళ పర్యటనపై కూడా ఇలాంటి లేఖనే బీజేపీ కార్యాలయానికి వచ్చింది. ఇప్పుడు యూపీ సీఎంకు ఇదే తరహా లేఖ వచ్చింది. దీంతో అప్రమత్తమైన ఇంటలిజెన్స్ వ్యవస్థ.. యూపీలో జరిగే చీకటి వ్యవహారాలపై నిఘా పెంచింది. యోగీ చుట్టూ భద్రత వలయాన్ని మరింత కట్టుదిట్టం చేసింది.
ఉమేష్ పాల్ హత్య కేసులో ప్రధాన సాక్షి అయిన రాజుపాల్ ను హత్య చేయించినందుకు గానూ అతీక్ అహ్మద్ ను పోలీసులు అరెస్టు చేశారు. అతడిని కోర్టులో హాజరు పరచగా యావజ్జీవ శిక్ష విధించిన అనంతరం వైద్య పరీక్షల కోసం హాస్పిటల్ కు తరలిస్తున్న సమయంలో మీడియా ప్రతినిథుల ముసుగులో ముగ్గురు వ్యక్తులు అతీక్ తో పాటు అతడి సోదరుడు అష్రఫ్ ను తుపాకీతో కాల్చి చంపేశారు. అయితే.. ఈ హత్య వేరెవరో చేసింది కాదనీ.. యూపీ పోలీసులతో సీఎం యోగీ కలిసి కుట్ర పూరితంగా చంపించాడనీ వార్తలు వచ్చాయి. ఇది అబద్ధమనీ.. అతీక్ మరియు అతడి సోదరుడిని చంపింది అతడితో చీకటి సంబంధాలు కలిగి ఉన్న మాఫియానే అని తర్వాత తెలిసి వచ్చింది. అయినా సరే అతీక్ ను చంపింది యోగీయే అంటూ బెదిరింపు కాల్స్ ఎక్కువయ్యాయి. కశ్మీర్ లో జరగాల్సిన జీ-20 సదస్సుపై కూడా అతీక్ హత్యతో అనుమానాలు మేఘాలు కమ్ముకున్నాయి. యూపీలో శాంతి భద్రతల విషయంలో యోగీ సర్కార్ కట్టుదిట్టమైన చర్యలు చేపడుతున్నప్పటికీ.. కశ్మీర్ లో జరగాల్సిన జీ-20 సదస్సు విషయంలో కేంద్ర ప్రభుత్వం ఏం చేస్తుందనేది ఆసక్తికరంగా మారింది.

మహారాష్ట్ర రాజకీయం మరోసారి రసవత్తరంగా మారుతోంది. మరో 20 రోజుల్లో షిండే ఆధ్వర్యంలోని మహారాష్ట్ర ప్రభుత్వం కూలిపోవటం తథ్యమంటూ శివసేన(థాక్రే) నేత సంజయ్ రౌత్ చేసిన వ్యాఖ్యలు ప్రస్తుతం మహారాష్ట్ర రాజకీయాలను షేక్ చేస్తున్నాయి. తిరుగుబాటు ఎమ్మెల్యేలను ఎత్తుకెళ్ళిపోయి బీజేపీతో కలిపి షిండే ఏర్పాటు చేసిన ప్రభుత్వానికి డెత్ వారెంట్ జారీ అయ్యిందంటూ రౌత్ చేసిన వ్యాఖ్యలు అంత ఆషామాషీగా వచ్చినవి కావని రాజకీయ విశ్లేషకుల అంచనా. శివసేన, ఎన్సీపీ, కాంగ్రెస్ పార్టీల కూటమి ప్రభుత్వం అయిన మహా వికాస్ అఘాడీ కొద్ది నెలల క్రితం కూలిపోయిన విషయం తెలిసిందే. థాక్రే పట్ల అసంతృప్తితో ఉన్న 39 మంది ఎమ్మెల్యేలతో కలిసి ఏక్ నాథ్ షిండే తిరుగుబాటు చేసి బీజేపీతో కలిసి ప్రభుత్వాన్ని ఏర్పాటు చేశాడు. అయితే.. ఇప్పుడు ఈ కొత్త ప్రభుత్వం చిక్కుల్లో పడినట్లు సమాచారం. ఇదే కనుక జరిగితే మహారాష్ట్రలో మళ్ళీ రాజకీయ అనిశ్చితి ఏర్పడినట్టే. ఈ పరిస్థితి బీఆర్ఎస్ పార్టీని విస్తరించేందుకు కేసీఆర్ కు కలగనున్న అనుకోని అవకాశమనే చెప్పాలి.
థాక్రే శివసేన పార్టీపై తిరుగుబాటు చేసి షిండేకు మద్దతిచ్చిన ఎమ్మెల్యేలు మళ్ళీ థాక్రే వర్గంలోకి చేరనున్నారని తెలుస్తోంది. దీనికి కారణం.. తిరుగుబాటు చేసిన ఎమ్మెల్యేలపై సస్పెన్షన్ వేటు పడబోతోందనే వార్తలే. థాక్రేపై తిరుగుబాటు చేసిన ఎమ్మెల్యేలపై అనర్హత వేటు వేయాలంటూ థాక్రే వర్గం కోర్టులో పిటిషన్ దాఖలు చేసింది. ఈ పిటిషన్ పై విచారిస్తున్న కోర్టు ఏ క్షణంలోనైనా 15 మంది ఎమ్మెల్యేలపై అనర్హత వేటు వేయనుందనే వార్త మహారాష్ట్ర రాజకీయాల్లో జోరుగా వినిపిస్తోంది. ఇదే జరిగితే మళ్ళీ ప్రభుత్వం ఏర్పాటు చేయటానికి అన్ని పార్టీలు తమ బలాన్ని నిరూపించుకోవాల్సి వస్తుంది. ప్రస్తుతం ఉన్న పరిస్థితులను బట్టి చూస్తే ప్రభుత్వం కనుక పడిపోయినట్టైతే.. గవర్నర్ అన్ని పార్టీలను బల నిరూపణ కోసం పిలుస్తుందనే నమ్మకం లేదు. గవర్నర్ పాలన లేదా మళ్లీ ఎన్నికలు నిర్వహించవచ్చు అనే ఊహాగానాలు జోరుగా వినిపిస్తున్నాయి. మళ్లీ ఎన్నికలు కనుక మహారాష్ట్రలో జరిగితే బీఆర్ఎస్ కు భారీ శుభవార్త అనే చెప్పాలి.
ఇటీవలి కాలంలో కర్ణాటకను పక్కన పెట్టిన కేసీఆర్.. మహారాష్ట్రపైనే ఫోకస్ చేస్తున్నారు. బహుషా మహారాష్ట్ర రాజకీయ పరిణామాలపై గులాబీ బాస్ కు పూర్తి సమాచారం ఉన్నట్టు కనిపిస్తోంది. ఏ క్షణమైనా ప్రభుత్వం కూలిపోవచ్చనే రాజకీయ విశ్లేషకుల అంచనాల వల్లనే కేసీఆర్ మహారాష్ట్ర రాజకీయాలపై గట్టి ఫోకస్ చేస్తున్నట్టు అనిపిస్తోంది. నిన్న ఔరంగబాద్ లో కేసీఆర్ నిర్వహించిన బహిరంగ సభకు హాజరైన జనం సంఖ్యను చూస్తే కాస్త ఆశ్చర్యంగా అనిపించక మానదు. అసలు ఉనికిలోనే లేని బీఆర్ఎస్ పార్టీ సభకు అంత మంది జనం హాజరు కావటం.. వివిధ పార్టీల నుంచి చాలా మంది యువకులు, అనుభవజ్ఞులు బీఆర్ఎస్ కండువా కప్పుకుంటూ పార్టీలో చేరటం.. ఇవన్నీ చూస్తుంటే కేసీఆర్ మాస్టర్ స్కెచ్ ఉందని నమ్మక తప్పదు. తెలంగాణకు సరిహద్దు ప్రాంతాల ప్రజల్లో బీఆర్ఎస్ పట్ల సొంత పార్టీ అనే ఫీలింగ్ రప్పించటం.. అలాగే స్థిరత్వం లేని ప్రభుత్వాలను నడిపే పార్టీలపై అసహ్యం కలిగేలా చేయటం.. అలాగే తెలంగాణ అభివృద్ధిని చూపించి బీఆర్ఎస్ పార్టీ పట్ల మంచి అభిప్రాయం వచ్చేలా చేయటం.. ఇవన్నీ కేసీఆర్ సభల వెనుక ఉద్దేశ్యాలు అయి ఉండవచ్చు. వాళ్ళూ వాళ్ళూ కొట్టుకు చస్తున్న సమయంలోనే బీఆర్ఎస్ ఎంట్రీ ఇవ్వటం కొత్త ప్రత్యామ్నాయం మేమే అని చెప్పకనే చెప్పటం అన్నమాట.
ప్రస్తుత ప్రభుత్వం కూలిపోయి మళ్ళీ ఎన్నికలు కనుక వస్తే.. కేసీఆర్ ముందు ఓ అద్బుతమైన అవకాశం ఉంది. బీజేపీ వ్యతిరేక పార్టీలన్నింటినీ ఒక్క తాటిపైకి తెచ్చే పని కనుక కేసీఆర్ తన భుజాలపై వేసుకుంటే.. ఖచ్చితంగా ఎన్నికల్లో బీజేపీ ఓటమి పాలయ్యే అవకాశాలు లేకపోలేదు. మహారాష్ట్రలో తరచూ ప్రభుత్వాలు కూలిపోవటానికి కారణం కేవలం బీజేపీయే అనేది గట్టిగా ప్రజల్లోకి తీసుకెళ్ళగలిగితే బీజేపీ వ్యతిరేక కూటమికి భారీ బలం చేకూరినట్టే. అన్ని అనుకున్నట్టు జరిగి బీఆర్ఎస్ కూటమి మహారాష్ట్రలో విజయం సాధిస్తే.. జాతీయ రాజకీయాల్లో సత్తా చాటడానికి కేసీఆర్ కు అతిపెద్ద అవకాశం దొరికినట్టే. సో.. మహారాష్ట్రలో మళ్ళీ ఎన్నికలు వస్తే గులాబీ బాస్ ముందున్న లక్ష్యం ఇదే అయి ఉండవచ్చు. మహారాష్ట్రలోని తెలంగాణ సరిహద్దు ప్రాంతాల్లో తరచూ కేసీఆర్ బహిరంగ సభలు నిర్వహించటం వెనుక సీక్రెట్ కూడా ఇదే కావచ్చు. ఏ రాజకీయం ఎటు తిరిగి ఎక్కడ ఆగనుందో.. ఏం జరగనుందో.. ఎదురు చూడక తప్పదు.

ఉత్తర ప్రదేశ్, బిహార్.. ఈ రెండు రాష్ట్రాల్లో రాజకీయం, రౌడీయిజం అవిభక్త కవలలు. ఒకటి లేకుండా మరొకటి మనుగడ సాగించడం కష్టం. సొంత ప్రయోజనాలకోసం రాజకీయనాయకులకు అండగా మాఫియా, గెలిచిన తర్వాత ఆ నేరప్రపంచానికి సపోర్ట్‌గా అక్కడి ప్రభుత్వాలు వ్యవహరిస్తాయనేది ఎప్పట్నుంచో వినిపిస్తున్న మాట. ఐతే, యూపీలో యోగి ముఖ్యమంత్రిగా బాధ్యతలు చేపట్టిన తర్వాత సీన్ మారింది. రాజకీయానికీ, మాఫియాకీ మధ్య యుద్ధం మొదలైంది. క్రిమినల్స్ అక్రమాస్తులపై బుల్డోజర్లు ఎప్పుడైతే గేరు మార్చి దూసుకెళ్లాయో అప్పుడే యూపీలో రక్తపు మరకలు మాయమవడం మొదలైంది. తాజాగా మాఫియాను మట్టిలో కలిపేస్తామని ముఖ్యమంత్రి యోగి ఆదిత్యనాథ్ ప్రకటన తర్వాత ఆ రాష్ట్రంలో ఏం జరుగుతుందో దేశం మొత్తం చూస్తూనే ఉంది. కానీ, బిహార్‌లో మాత్రం పరిస్థితులు ఇందుకు విరుద్ధంగా కనిపిస్తున్నాయి. ప్రజలు సుశాసన్‌ బాబుగా పిలుచుకునే మిస్టర్ క్లీన్ ఇమేజ్ ఉన్న బిహార్ సీఎం నితీశ్‌ కుమార్‌.. ఓ నటోరియస్ క్రిమినల్‌ను జైల్ నుంచి తప్పించేందుకు చేయని ప్రయత్నం అంటూ కనిపించడం లేదు. ఏకంగా చట్ట సవరణకు కూడా వెనుకాడలేదంటే సీన్ ఏంటో అర్ధం చేసుకోవచ్చు.
ఇంతకీ నితీష్ తెగ ప్రయత్నాలు చేస్తున్న ఆ క్రిమినల్ పేరు ఆనంద్ మోహన్. ఇతడేమీ పొరపాటున క్రైమ్‌ చేసి ఇరుక్కున్న రాజకీయ నేత కాదు. సాక్షాత్తూ ఓ జిల్లా కలెక్టర్‌నే పట్టపగలు నడిరోడ్డుపై నరికిచంపించిన నరరూప రాక్షసుడు. ఆ చనిపోయిన కలెక్టర్ మన తెలుగోడే. 1994లో బిహార్‌ పీపుల్స్‌ పార్టీ నేత, గ్యాంగ్‌స్టర్‌ చోటాశుక్లా పోలీస్‌‌ ఎన్‌కౌంటర్‌ లో చనిపోయాడు. అతడి అంత్యక్రియల సమయంలో బిహార్‌లో పెద్దఎత్తున అల్లర్లు చోటుచేసుకున్నాయి. ఆ సమయంలో గోపాల్‌‌గంజ్‌ కలెక్టర్‌గా తెలుగు దళిత ఐఏఎస్‌ జి.కృష్ణయ్య ఉన్నారు. కారులో వెళుతున్న ఆయన్ను అందరూ చూస్తుండగానే బయటకు లాగి రాళ్లతో కొట్టించి కత్తితో నరికించి మరీ హత్య చేయించాడు ఆనంద్‌మోహన్. ఈ కేసుతో పాటు పలు కేసుల్లో అతడు నిందితుడు. ఫలితంగా కోర్టు అతడికి మరణ శిక్ష విధించింది. తర్వాత దాన్ని యావజ్జీవ కారాగారశిక్షగా మార్చింది. ఆనంద్‌‌మోహన్‌ జైల్లోనే ఉన్నా అక్కడి నుంచే వ్యవహారాలను చక్కబెట్టాడు. రాజకీయాన్ని నడిపాడు. జైలు నుంచే ఎంపీగా పోటీ చేసి మరీ గెలిచాడు. అయితే మరణశిక్ష పడటంతో పోటీకి దూరమయ్యాడు. స్వతంత్ర భారతంలో మరణశిక్ష పడ్డ తొలి రాజకీయ నేత కూడా ఈ నటోరియస్ క్రిమినలే. ఆ తర్వాత తన భార్యను ఎన్నికల బరిలోకి దింపాడు. ఇప్పుడు ఆనంద్‌మోహన్ భార్య, కొడుకు ఇద్దరూ ఎమ్మెల్యేలే.. ఇంతటి నేరచరిత్ర ఉన్న ఆనంద్‌మోహన్‌ను జైలు నుంచి బయటకు తీసుకురావాలన్నది నితీశ్‌ కుమార్ ప్రయత్నం. అందుకే జైలు మాన్యువల్‌ సైతం మార్చేశారు.
ఆనంద్‌మోహన్‌ కోసం నితీశ్ ఇంతలా ఆరాటపడ్డానికి రీజన్ లేకపోలేదు. ఈ నటోరియస్ క్రిమినల్.. తోమర్‌ రాజ్‌పుట్‌ వర్గానికి చెందిన వ్యక్తి. ఆ వర్గంలో ఇప్పటికీ పలుకుబడి కలిగిన నేత. యువతలో నేటీకీ రాబిన్‌హుడ్ ఇమేజ్ ఉంది. వీటన్నింటికీమించి జైలు నుంచే తన నేర సామ్రాజ్యాన్ని ఎలాంటి చీకూ చింతా లేకుండా నడుపుతున్నవాడు. అందుకే, బిహార్ రాజకీయాల్లో ఆనంద్‌మోహన్‌కు అంత డిమాండ్. ఈ ఏడాది జనవరిలో జేడీయూ రాజ్‌పుట్‌ సమ్మేళనాన్ని నిర్వహించింది. ఆ సమయంలో ఆనంద్‌ మోహన్‌ను విడుదల చేయాలని నినాదాలు చేశారు అతడి అభిమానులు. సాధారణంగా ఏ రాజకీయ నేత ఇలాంటి క్రిమినల్‌ గురించి ప్రస్తావించడానికి ఇష్టపడరు. కానీ, బిహార్ సీఎం మాత్రం మీరు ఆందోళన చెందకండి.. నేను చేయాల్సింది చేస్తున్నా అంటూ ఆనంద్‌మోహన్ విడుదల ప్రయత్నాలను బయటపెట్టారు.
ప్రస్తుతం ఈ నటోరియస్ క్రిమినల్ తన కుమారుడి వివాహ వేడుకల కోసం పెరోల్‌పై ఉన్నాడు. అంతకుముందు కూతురి పెళ్లంటూ బయటకొచ్చాడు. ఆనంద్‌మోహన్‌ను జేడీయూ అధ్యక్షుడు కౌగిలించుకుని స్వీట్ తినిపిస్తున్న ఫోటో వైరల్‌ కూడా అయ్యింది. వాస్తవానికి.. ఏ ప్రభుత్వ అధికారిని హత్య చేసినా పెరోల్‌ అనే మాటకే ఆస్కారం ఉండదు. కానీ, వడ్డించేవాడు మనవాడైతే అన్నట్టుగా.. కేవలం ఆనంద్‌ను బయటకు తీసుకురావడానికి ఏకంగా చట్టాన్నే సవరించింది నితీశ్‌ సర్కార్. నిజానికి 2021లో ఆనంద్‌మోహన్‌ శిక్ష రద్దు చేయాలన్న పిటిషన్‌ను నితీశ్‌ తోసిపుచ్చారు. ఎందుకంటే అప్పుడు బీజేపీ మిత్రపక్షం. కానీ ఇప్పుడు ఆర్జేడీతో కాపురం చేస్తున్నారు నితీశ్ కుమార్. ఆనంద్‌మోహన్‌ భార్య, కొడుకు ఇద్దరూ ఆర్జేడీ ఎమ్మెల్యేలే… ఆ మిత్రబంధం కోసం రౌడీషీటర్‌ను బయటకు తీసుకొచ్చేందుకు మిస్టర్ క్లీన్ ఇమేజ్‌ను సైతం రితీశ్ కుమార్ పక్కనపెట్టినట్టు కనిపిస్తోంది.
బీజేపీతో ఉన్నంతకాలం నితీశ్ కుమార్ హిందుత్వాన్ని అడ్డుపెట్టుకున్నారు. అయితే ఇప్పుడు ఆ ముసుగు తొలగిపోయింది. ఓ వైపు రాష్ట్రంలో ప్రభుత్వ వ్యతిరేకత పెరుగుతోంది. మరోవైపు తన సొంత సామాజికవర్గం అయిన కురిమిలో కూడా నితీశ్ ప్రాబల్యం తగ్గుతోంది. బీహార్‌లో వీరి జనాభా కేవలం ఐదుశాతమే. కానీ ఇప్పుడు వారిలో కూడా మార్పు వచ్చింది. ఆ కమ్యూనిటీలో కొంతమేర కమలం వైపు చూస్తున్నారనే విశ్లేషణలు వినిపిస్తున్నాయి. నితీశ్‌కు ఒకప్పుడు నమ్మకమైన మిత్రుడు ఉపేంద్ర కుశ్వాహా పార్టీని వీడి సొంత కుంపటి పెట్టుకున్నారు. ఇది బిహార్ సీఎంకు కోలుకోలేనిదెబ్బ. ఇక బిహార్‌లో బలమైన యాదవ, ముస్లిం వర్గాలు ఆర్జేడీకి మద్దతుగా నిలుస్తున్నాయి. నితీష్‌ను దించేసి తేజస్విని సీఎం సీటులో కూర్చోబెట్టాలని భావిస్తున్న ఆ వర్గాల సపోర్ట్‌ నితీశ్‌కు ఉంటుందని అనుకోవడానికి వీల్లేదు. ఇక ముస్లింలు 2020లో నితీశ్‌కు ఎంత నష్టాన్ని చేసారో ఆయనకు గుర్తుంది. అందుకే, మిస్టర్ క్లీన్ ఇమేజ్‌ను పక్కనపెట్టి పొలిటికల్ ఈక్వేషన్లపై నితీశ్ ఫోకస్ చేశారనే చర్చ జరుగుతోంది. ఇక ఆనంద్‌మోహన్‌ను రిలీజ్ చేసేందుకు జైలు మాన్యువల్ సవరించడాన్ని అక్కడి విపక్షాలు తీవ్రంగా తప్పుబడుతున్నాయి. నితీశ్ ప్రభుత్వ చర్యను దళిత వ్యతిరేకతగా అభివర్ణించారు బీఎస్పీ అధినేత్రి మాయావతి. మిగిలిన వారిదీ అదే మాట.
2024లో విపక్షాల ప్రధాని అభ్యర్థిత్వం కోసం నితీశ్ పరోక్షంగా ప్రయత్నాలు చేస్తున్నారు. విపక్షాల ఐక్యతను కూడా నెత్తికెత్తుకున్నారు. ఇదే సమయంలో యూపీ సీఎం యోగి ఆదిత్యనాథ్ పేరు కూడా ప్రధాని అభ్యర్ధి రేసులో వినిపిస్తోంది. యోగి యాక్షన్‌నే కమలం పార్టీ పెద్దలు ఎన్నికల నినాదాలుగా మార్చుకోవడమే ఇందుకు ఉదాహరణ. బుల్డోజర్, డబుల్ ఇంజిన్ సర్కార్‌ నినాదాలన్నీ యోగి ఆదిత్యనాథ్‌వే. మోడీ ఇమేజ్‌తోనే బీజేపీ ఎన్నికలకు వెళ్లినా ఆ తర్వాత ఎలాంటి మార్పులయినా జరగొచ్చనే చర్చ జరుగుతోంది. ఇలాంటి సమయంలో క్రిమినల్స్‌పై యోగి, నితీశ్ యాక్షన్‌ను కంపేర్ చేస్తున్నారు. ఓ వైపు యోగి నేరగాళ్ల అంతుచూస్తుంటే.. మరోవైపు నితీశ్ వారికి కొమ్ముకాస్తున్నారంటూ విమర్శిస్తున్నారు. దీంతో ఈ పరిణామాలన్నీ బీజేపీకి పాజిటివ్‌గా మారుతుంటే నితీశ్‌ యాక్షన్ విపక్షాలకు కూడా మైనస్ అయ్యే ప్రమాదముందనే చర్చ జరుగుతోంది. మరి ఆనంద్‌మోహన్ ఎపిసోడ్‌లో బిహార్ సీఎం వైఖరి చివరికి ఎలాంటి రిజల్ట్ ఇస్తుందో చూడాలి.