bhalamedia.com

కర్ణాటక ఎన్నికల ఫలితాలు వచ్చి వారం రోజులు గడుస్తున్నా ఇప్పటికీ ముఖ్యమంత్రి కుర్చీపై కూర్చునేది ఎవరు అనే దానిపై కాంగ్రెస్ పార్టీలో క్లారిటీ లేకుండా పోయింది. వారం రోజుల పాటు క్యాంపు రాజకీయాలు గట్టిగా నడిచిన తర్వాత మొత్తానికి డీకే శివకుమార్ అధిష్టానం ఒత్తిడికి తలొగ్గి సిద్దరామయ్యకు ముఖ్యమంత్రి పదవి ఇచ్చేందుకు ఒప్పుకున్నాడు. తనకు సీఎం పదవి ఇవ్వకపోతే క్లిష్టమైన పరిణామాలు ఎదుర్కోవాల్సి వస్తుందని బహిరంగంగానే కాంగ్రెస్ అధిష్టానానికి అల్టిమేటం జారీ చేసిన డీకే.. చివరకు సోనియా గాంధీ బుజ్జగింపులకు, ఆఫర్లకు సరే అన్నాడు. దీంతో కర్ణాటక సీఎం కుర్చీ పంచాయతీకి తెరపడినట్టైంది. రేపు.. అంటే శుక్రవారం నాడు సిద్దరామయ్య కర్ణాటక ముఖ్యమంత్రిగా ప్రమాణ స్వీకారం చేయనున్నట్టు కాంగ్రెస్ జాతీయ అధిష్టానం ప్రకటించింది. ఇక డీకే మాత్రం తనకు ఆఫర్ చేసిన డిప్యూటీ ముఖ్యమంత్రి పదవిని కూడా వద్దని చెప్పినట్టు సమాాచారం. ఏ మంత్రి పదవి కూడా లేకుండా కేవలం సాధారణ ఎమ్మెల్యేగా కొనసాగేందుకు డీకే నిర్ణయించుకోవటం ఆయన అనుచరులతో పాటు అందరినీ ఆశ్చర్యానికి గురి చేస్తోంది.
కాంగ్రెస్ పార్టీకి ఒక్కలిగ కులం ఓట్లు పడటానికి ఒకే ఒక్క కారణం డీకే శివకుమార్ మాత్రమే. ఈ వర్గం ఓట్లు రాకపోయి ఉంటే ఖచ్చితంగా ఓట్ల చీలిక ఏర్పడి బీజేపీకి మెజార్టీ వచ్చేది. అంటే.. మొత్తం పొలిటికల్ పిక్చర్ తారుమారు అయ్యేది. అలాంటి ఒక్కలిగ ఓట్లను సంపాదించిన పెట్టిన డీకే శివకుమార్ కు కాకుండా సిద్దరామయ్యకు ముఖ్యమంత్రి పదవి ఇవ్వటం ఒక్కలిక వర్గానికి ఏమాత్రం రుచించదు. అయితే.. ప్రస్తుతానికి తల ఊపిన డీకే శివకుమార్.. ఎప్పుడు ఎదురు తిరిగి ప్రభుత్వాన్ని పడగొడతాడో అనే అనుమానం కూడా అధిష్టానానికి ఉంది. డీకే సీఎం పదవిలో లేకపోతే భవిష్యత్తులో ఈడీ, సీబీఐ నుంచి కేసులు ఎదుర్కోవాల్సి రావటంతో పాటు అక్రమాస్తుల కేసు రుజువైతే జైలుకు వెళ్ళాల్సి ఉంటుంది. పైగా.. ఎందుకూ పనికిరాడు అని బహిరంగంగా డీకే శివకుమార్ తిట్టిపోసిన కర్ణాటక మాజీ డీజీపీ ప్రవీణ్ సూద్.. ఇప్పుడు సీబీఐ కొత్త డైరెక్టర్ గా బాధ్యతలు తీసుకున్నాడు. సో.. డీకే శివకుమార్ త్యాగం చేసింది ముఖ్యమంత్రి కుర్చీని మాత్రమే కాదు.. తన భవిష్యత్తును కూడా. ఇప్పుడు డీకే ఏం చేయబోతున్నాడు అనేది దేశవ్యాప్తంగా సస్పెన్స్ థ్రిల్లర్ సినిమా అన్నమాట.

కర్ణాటకలో కాంగ్రెస్ పార్టీ అనూహ్య విజయం తర్వాత పలువురు బీజేపీ నేతలు పార్టీని వీడి కాంగ్రెస్ పార్టీ తీర్థం పుచ్చుకోబోతున్నారంటూ తెలంగాణలో వార్తలు జోరుగా వినిపించాయి. కర్ణాటక తరహాలోనే వచ్చే ఎన్నికల్లో తెలంగాణలో కాంగ్రెస్ విజయం సాధిస్తుందంటూ కాంగ్రెస్ నేతలు జోష్యం చెప్తున్నారు. ఈ నేపథ్యంలోనే బీజేపీ సీనియర్ నేతలు సహా చాలా మంది టీఆర్ఎస్ నేతలు కాంగ్రెస్ పార్టీలో చేరబోతున్నారని ప్రచారం జరుగుతోంది. వారిలో బీజేపీ ఎమ్మెల్యే, మాజీ మంత్రి ఈటెల రాజేందర్ పేరు కూడా గట్టిగానే వినిపించింది. త్వరలోనే ఈటెల బీజేపీకి రాజీనామా చేసి కాంగ్రెస్ పార్టీలో చేరబోతున్నారని సోషల్ మీడియా వేదికగా ప్రచారం జరిగింది. దీనిపై ఎట్టకేలకు ఈటెల స్పందించాడు. తాను బీజేపీని వదిలి మరో పార్టీలో చేరబోతున్నాననే వార్తల్లో నిజంలేదని క్లారిటీ ఇచ్చారు.
ట్విటర్ వేదికగా దీనిపై ఈటెల స్పష్టమైన సమాధానం ఇచ్చారు. తాను బీజేపీ సిద్ధాంతాన్ని నమ్మి పార్టీలో చేరాననీ.. కేసీఆర్ ను గద్దె దించటమే లక్ష్యంగా పనిచేస్తున్నాననీ చెప్పిన ఈటెల.. తాను ఎప్పటికీ బీజేపీని వీడే ప్రసక్తే లేదని స్పష్టం చేశాడు. ఈటెలతో పాటు కోమటిరెడ్డి రాజగోపాల్ రెడ్డి కూడా పార్టీ మార్పు వార్తలపై స్పందించాడు. తాను బీజేపీలో చేరిన తర్వాత మరో పార్టీలోకి వెళ్ళే ఆలోచనే లేదని చెప్పాడు. కాంగ్రెస్ తెలంగాణలో ఎన్నటికీ అధికారంలోకి రాదనీ.. నాలుగు వర్గాలున్న కాంగ్రెస్ లో అందరూ ముఖ్యమంత్రి పదవి కోసం పోటీ పడే వాళ్ళేనంటూ చురక అంటించాడు. కర్ణాటకలో కాంగ్రెస్ పార్టీ విజయం సాధించిన తర్వాత తెలంగాణ కాంగ్రెస్ లో జోష్ కనిపిస్తోంది. కర్ణాటక రాజకీయ పరిస్థితులకు, తెలంగాణ రాజకీయ పరిస్థితులకు ఏమాత్రం పోలిక లేకపోయినా.. వచ్చే ఎన్నికల్లో ఇక్కడ కూడా కాంగ్రెస్ అధికారంలోకి రావటం ఖాయమంటూ టీకాంగ్రెస్ నేతలు గాలిలో మేడలు కడుతున్నారు.

కర్ణాటక ఎన్నికల యుద్ధం చివరి అంకానికి వచ్చింది. దాదాపు కాంగ్రెస్ పార్టీ అధికారం చేపట్టే సూచనలు స్పష్టంగా కనిపిస్తున్నాయి. ఈ ఎన్నికలను 2024 సార్వత్రిక పోరుకు సెమీఫైనల్‌గా భావించినా.. ఇక నుంచి జరిగే ప్రతి ఎన్నికా అంతకుమించే ఉంటుంది. మరీ ముఖ్యంగా బీజేపీని ఓడించాలని కంకణం కట్టుకున్న కాంగ్రెస్‌కు 2024 సార్వత్రిక ఎన్నికల్లో చివరి ఓటు పోలయ్యే వరకూ చావో రేవో తేల్చుకునేలానే యుద్ధం చేయాల్సి ఉంటుంది. కర్ణాటకలో కాంగ్రెస్ పార్టీకి అనుకూలంగా పరిణామాలు సంభవించినప్పటికీ.. ఆ పార్టీకి అసలైన సవాల్ మాత్రం ఎడారి రాష్ట్రం రాజస్థాన్‌లోనే. కర్ణాటకలో ఓడినా అక్కడ అధికారంలో లేం కాబట్టే అని సరిపెట్టుకోవచ్చు. కానీ, రాజస్థాన్‌లో అధికారంలో ఉండికూడా ఓడితే దాని ప్రభావం ఖచ్చితంగా వచ్చే సార్వత్రిక ఎన్నికలపై పడుతుంది. ఇదే సమయంలో ఇప్పటికే తిరుగులేని శక్తిగా ఉన్న కమలం పార్టీ మరింత స్ట్రాంగ్‌గా మారుతుంది. ఈ విషయాలన్నీ ప్రత్యర్ధులకంటే గ్రాండ్ ఓల్డ్ పార్టీకి ఇంకాస్త ఎక్కువగానే తెలుసు. ఎందుకంటే మధ్య ప్రదేశ్, పంజాబ్‌లో తగిలిన ఎదురు దెబ్బలను మరిచిపోవటం హస్తం పార్టీకి అంత తేలిక కాదు.
ఈ ఏడాది చివరినాటికి రాజస్థాన్‌లో అసెంబ్లీ ఎన్నికల నగారా మోగబోతోంది. దీనికోసం కమలం పార్టీ ఆల్రెడీ గ్రౌండ్‌లెవెల్‌ యాక్షన్‌లోకి కూడా దిగిపోయింది. ఇప్పటికే ప్రధాని మోడీ రాజస్థాన్‌లో అభివృద్ధి యాక్షన్‌ షురూ చేశారు. అయితే, అధికారంలో ఉన్న హస్తం పార్టీ పరిస్థితే అంతగా బాలేదు. సీనియర్, జూనియర్ పంచాయితీలో టాప్‌లో ఉండే హస్తం పార్టీని రాజస్థాన్‌లోనూ అవే సమస్యలు వెంటాడుతున్నాయి. గతంలో ఎన్నికల్లో గెలిచిన తర్వాత అశోక్ గెహ్లట్, సచిన్ పైలెట్ మధ్య సీఎం కుర్చీ వివాదం రాజుకుంది. అప్పుడు కాంగ్రెస్ అధిష్టానం పిలిచి ఇద్దరిని కన్విన్స్ చేసి అశోక్‌గెహ్లట్‌ను సీఎంగా ప్రకటించింది. సీనియారిటీకే ప్రధాన్యత ఇచ్చింది. కానీ, సచిన్ పైలట్ కారణంగానే రాజస్థాన్‌లో హస్తం పార్టీ గెలిచిందనే వాదన ఉంది. సచిన్ పైలట్ సైతం కష్టం తనది, సీఎం కుర్చీ మాత్రం అశోక్‌దీ అన్నట్టుగా చాలా సందర్భా ల్లో వ్యతిరేకతను బయటపెడుతూనే ఉన్నారు. ఇటీవల నిరాహార దీక్షలు సైతం నిర్వహించిన సచిన్.. ఇప్పుడు జన్ సంఘర్ష్ యాత్ర అంటూ జనంలోకి వెళ్లిపోయారు. అదికూడా అధిష్టానం మాట లెక్కచేయకుండానే.
తమ గళాన్ని వినిపించడానికి, ప్రజల గొంతులను తెలుసుకోడానికీ, తాను ప్రజల గళంగా మారడానికీ ఈ యాత్ర చేపట్టినట్టు సచిన్ పైలట్ తెలిపారు. అవినీతిపై పోరాటం అగ్ని నదిని దాటడం లాంటిదని, మనం ఆ నదిని ఈదాల్సిందేనని తన మద్దతు దారులకు పిలుపునిచ్చారు. ఇదే సమయంలో వేలాది మంది మద్దతుదారులు ఈ యాత్రలో సచిన్ పైలట్‌ను అనుసరించారు. ప్రభుత్వ ఉద్యోగాల నియామక పరీక్ష పేపర్ల లీకేజీ గురించి కూడా ఈ యాత్రలో పైలట్‌ ప్రస్తావించారు. రాజస్థాన్‌లో అవినీతిని అరికట్టాలని ఏడాది కాలంగా తాను సీఎంకు లేఖలు రాస్తున్నా, ఎలాంటి చర్యలు చేపట్టలేదని మరోసారి పునరుద్ఘాటించారు. సచిన్ జన్‌సంఘర్ష్‌ ఎలాంటి రిజల్ట్ ఇస్తుందో ఓ అంచనాకు వచ్చిన హస్తం పార్టీ.. పరిస్థితులను చక్కదిద్దే ప్రయత్నాలు చేసింది. తాజా యాత్ర పూర్తి‌గా సచిన్ వ్యక్తిగతమని, పార్టీతో దీనికి ఎలాంటి సంబంధం లేదని రాజస్థాన్‌ కాంగ్రెస్‌ లీడర్ గోవింద్‌ స్పష్టం చేశారు. పార్టీ గుర్తు, కాంగ్రెస్‌ అగ్రనేతల ఫొటోలతో చేపడితేనే అది కాంగ్రెస్‌ యాత్ర అవుతుందని, సచిన్ యాత్ర అలాంటిది కాదన్నారు.
ఓ వైపు సచిన్ పైలట్ తాను ఎవరినీ టార్గెట్ చేసేందుకు యాత్ర చేయడం లేదని స్పష్టంగా చెబుతుంటే.. మరోవైపు ఆ రాష్ట్ర కాంగ్రెస్ నేతలు మాత్రం సచిన్‌ను టార్గెట్ చేస్తూ జన్ సంఘర్ష్‌ యాత్రకు లేనిపోని మైలేజ్ ఇస్తున్నట్టు కనిపిస్తోంది. ఇదే సమయంలో ప్రధాని మోడీ సైతం ఇటీవల తన రాజస్థాన్ పర్యటన లో ఇదే అంశాన్ని ప్రస్తావించారు. రాజస్థాన్ కాంగ్రెస్‌లో ఐక్యత లేదనీ, వారిలో వారు తన్నుకోవడానికి టైం సరిపోవడం లేదనే అర్ధం వచ్చేలా సెటైర్లు వేశారు. సీఎం కుర్చీ కోసమే తప్ప ప్రజల ప్రయోజనాలు హస్తం పార్టీ నేతలకు పట్టవంటూ ఫైర్ అయ్యారు. ఫలితంగా మధ్య ప్రదేశ్, పంజాబ్‌లో జరిగినట్టే రాజస్థాన్‌లోనూ జరుగుతోందా? అనే ప్రశ్నలు మొదలయ్యాయి.
గతంలో మధ్య ప్రదేశ్‌లో జరిగిందే ఇప్పుడు రాజస్థాన్‌లోనూ జరుగుతున్నట్టు స్పష్టంగా కనిపిస్తోంది. మధ్య ప్రదేశ్‌లో కూడా జ్యోతిరాధిత్య సిందియాకు సంబంధించిన విషయంలో సీఎం పదవి ఇస్తామని చెప్పి కాంగ్రెస్ ఇవ్వలేదు. దీంతో విసిగి వేసారిపోయిన జ్యోతిరాధిత్య సింధియా బీజేపీలో చేరి కేంద్ర మంత్రి పదవి చేపట్టారు. మరో రాష్ట్రం పంజాబ్‌లోనూ ఇంచుమించు ఇలాంటి పరిస్థితులే తలెత్తాయి. అక్కడ కెప్టెన్ అమరీందర్ సింగ్, సిద్ధు మధ్య జరిగిన అంతర్గత రచ్చతోనే అధికారాన్ని కోల్పోవాల్సి వచ్చింది. ఈ రెండు రాష్ట్రాల్లోనూ అధికారంలో ఉండి కూడా దారుణంగా ఓటమి పాలయ్యారు. సింపుల్‌గా చెప్పాలి అంటే పంజాబ్, మధ్య ప్రదేశ్ లాంటి ఇంపార్టెన్స్ ఉన్న ప్రాంతాల్లో కాంగ్రెస్ తనకు తానే ఓటమి కొనితెచ్చుకుంది. ఇదే సమయంలో ఆయా ప్రాంతాల్లో బీజేపీ పుంజుకుంటోంది. ఇప్పుడు రాజస్థాన్‌లోనూ అదే జరిగేలా కనిపిస్తోంది.
మరోవైపు.. రాజస్థాన్‌లో రాజకీయ పరిణామాలు కూడా చాలా వేగంగా మారిపోతున్నాయి. అసాధ్యం అనేచోట కమలం పార్టీ బూస్టింగ్ ఇచ్చే విజయం సాధించింది. స్థానిక లోకల్ బాడీ ఎన్నికల్లో 14 స్థానాల్లో బీజేపీ 8 చోట్ల విక్టరీ కొట్టింది. ఇదే సమయంలో అధికారంలో ఉన్న హస్తం పార్టీ కేవలం నాలుగు అంటే నాలుగు స్థానాలకే పరిమితమైంది. ఇప్పటివరకు జరిగిన ఉప ఎన్నికల్లో ఎక్కడా కూడా కాంగ్రెస్ ఓడి పోలేదు. కానీ, ఇప్పుడు స్థానిక సంస్థల ఎన్నికల్లో వెనకబడటం ఊహించని పరిణామం. ఇలాంటి టైంలో సచిన్ పైలట్ గేర్ మార్చడం కాంగ్రెస్‌ను కష్టాల్లోకి నెట్టడం మాత్రమే కాదు. అంతకుమించిన ఫలితాలనే ఇవ్వబోతోందనే విశ్లేషణలు మొదలయ్యాయి. అదే నిజమై మధ్య ప్రదేశ్, పంజాబ్‌ను చేజార్చుకున్నట్టే రాజస్థాన్‌ను కూడా కోల్పోవాల్సి వస్తే మాత్రం 2024లో గ్రాండ్ ఓల్డ్ పార్టీ ఆశించిన ఫలితం ఎంతమాత్రం రాదంటున్నారు రాజకీయ విశ్లేషకులు. సింపుల్‌గా చెప్పాలంటే సచిన్ వర్సెస్ గెహ్లాట్ ఎపిసోడ్‌కు ముగింపు ఇవ్వగలిగితేనే హస్తం పార్టీకి అవకాశాలుంటాయి. ఆ విషయంలో కాంగ్రెస్ పెద్దలు ఎంతవరకూ సక్సెస్ అవుతారో చూడాలి.

కర్ణాటక ఎన్నికలు పూర్తైన వేళ ఎగ్జిట్ పోల్స్ ఫలితాలు దేశవ్యాప్తంగా చర్చనీయాంశంగా మారాయి. జాతీయ స్థాయిలో దాదాపు తుడిచిపెట్టుకుపోయిన కాంగ్రెస్ పార్టీ.. కర్ణాటకలో మాత్రం 120 సీట్లు సాధిస్తుందంటూ ఎగ్జిట్ పోల్స్ ఫలితాలు రావటమే ఇందుకు కారణం. కానీ ఈ సర్వే ఫలితాలు తప్పు అనీ.. అన్ని సర్వేలు తప్పుడు ఫలితాలనే చెప్పాయనీ బల్లగుద్ది చెప్తున్నాడు జేడీఎస్ అధినేత కుమారస్వామి. అటు కాంగ్రెస్ పార్టీకి గానీ, ఇటు బీజేపీకి గానీ సొంతంగా ప్రభుత్వాన్ని ఏర్పాటు చేసేందుకు సరిపడే సీట్లు ఖచ్చితంగా రావని చెప్తున్న కుమారస్వామి.. తన మద్దతు లేకుండా ఏ పార్టీ కూడా ప్రభుత్వాన్ని ఏర్పాటు చేయలేదని ధీమా వ్యక్తం చేస్తున్నాడు. 40 సీట్లతో తన పార్టీయే కింగ్ మేకర్ గా అవతరిస్తుందని.. కర్ణాటక ముఖ్యమంత్రి కుర్చీలో కూర్చోబోయే కింగ్ తానేననీ బహిరంగంగానే చెప్పేస్తున్నాడు కుమారస్వామి. ఎంత ప్రయత్నించినా కాంగ్రెస్, బీజేపీ సొంతంగా ప్రభుత్వాన్ని ఏర్పాటు చేయటం సాధ్యం కాదని కుమారస్వామి ఫీలింగ్.
2018లో కూడా కాంగ్రెస్, జేడీఎస్ కలిసి ప్రభుత్వాన్ని ఏర్పాటు చేశాయి. కానీ.. సిద్దరామయ్య కాంగ్రెస్ ఎమ్మెల్యేలను తాయిలాల కోసం ఆశపెట్టి బీజేపీకి మద్దతిచ్చేలా చేయటంతో కాంగ్రెస్-జేడీఎస్ ఉమ్మడి ప్రభుత్వం కుప్పకూలి బీజేపీ చేతికి అధికారం చిక్కింది. ఎప్పుడు ఎదురు తిరుగుతారో తెలియని జేడీఎస్ తో పొత్తు పెట్టుకుంటే మళ్ళీ ఇలాంటి పరిస్థితే వస్తుందేమోనని కాంగ్రెస్ భయపడుతుండగా.. తమతో పొత్తు తప్ప కాంగ్రెస్ కు మరో మార్గం లేదని జేడీఎస్ సవాల్ చేస్తోంది. ఇప్పటికే కాంగ్రెస్ పార్టీ వాళ్ళతో పాటూ బీజేపీ నేతలు కూడా తనను సంప్రదించారంటూ కుమారస్వామి చెప్తుండగా.. తాము ఎవరినీ కలుపుకోబోమనీ.. సొంతంగా ప్రభుత్వాన్ని ఏర్పాటు చేస్తామని కాంగ్రెస్, బీజేపీ నొక్కి చెప్తున్నాయి. కేంద్రంలో అధికారంలో ఉన్న బీజేపీతో పొత్తు పెట్టుకుంటేనే జేడీఎస్ కు లాభం కాబట్టి ఈసారి జేడీఎస్ బీజేపీతో పొత్తు కలిపి ప్రభుత్వాన్ని ఏర్పాటు చేయటం ఖాయమనే అంచనాలు వినిపిస్తున్నాయి. మరి కొద్ది గంటల్లో ఓట్ల కౌంటింగ్ ప్రారంభం కానుంది. మరో 24 గంటల్లో ఫలితాలు దాదాపుగా తెలిసిపోతాయి. అప్పుడు మొదలవుతుంది అసలు పొత్తుల రాజకీయం. ఈసారి కర్ణాటకలో కనుక కాంగ్రెస్ పార్టీ ప్రభుత్వాన్ని ఏర్పాటు చేయకపోతే.. వచ్చే పార్లమెంట్ ఎన్నికల్లో ఖర్చు చేయటానికి సరిపడే నిధులు సమకూర్చుకోవటం అసాధ్యం. అలాంటప్పుడు పార్లమెంట్ ఎన్నికల్లో కాంగ్రెస్ కు మరో భారీ పరాజయం తప్పదు. ఇది కాంగ్రెస్ ఉనికికే ప్రమాదం.. కాబట్టి కర్ణాటక ఫలితం కాంగ్రెస్ కు జీవన్మరణ సమస్య.