bhalamedia.com

ఆసియా కప్ వేదిక పాకిస్తాన్ నుంచి శ్రీలంకకు మార్చినందుకు ప్రతీకారంగా ఆసియా కప్ తో పాటు వన్డే ప్రపంచ కప్ నుంచి కూడా వైదొలగుతామంటూ పాకిస్తాన్ క్రికెట్ బోర్డు హెచ్చరిస్తోంది. పాకిస్తాన్ లో జరగాల్సిన ఆసియా కప్ ను శ్రీలంకలో నిర్వహించేందుకు ఆసియా క్రికెట్ కౌన్సిల్ తాజాగా నిర్ణయం తీసుకోవటంతో పాకిస్తాన్ క్రికెట్ బోర్డ్ అధ్యక్షుడు నజమ్ సేథి తాము ఆసియా కప్ తో పాటు వన్డే వరల్డ్ కప్ ను బహిష్కరిస్తామంటూ బెదిరింపులకు దిగాడు. దీంతో ఇటు ఆసియా కప్ తో పాటు వచ్చే ప్రపంచ కప్ పై కూడా సంధిగ్ధత నెలకొంది. అసలు ఏం జరిగిందంటే..
సెప్టెంబర్ లో పాకిస్తాన్ వేదికగా ఆసియా కప్ జరగాల్సి ఉండగా దీనిపై భారత్ అభ్యంతరం వ్యక్తం చేసింది. పాకిస్తాన్ లో ఉన్న పరిస్థితుల దృష్ట్యా తాము పాకిస్తాన్ లో పర్యటించటం కుదరదంటూ ఆసియా క్రికెట్ బోర్డుకు స్పష్టం చేసింది. దీనిపై బీసీసీఐని ఏసీసీ పునరాలోచించాలని కోరగా.. ఈ విషయంలో బీసీసీఐ ఏమీ చేయలేదనీ.. దీనిపై తుది నిర్ణయం భారత ప్రభుత్వానిదేనంటూ తేల్చి చెప్పింది. భారత్ నిర్ణయంతో ఆసియా కప్ వేదికను పాకిస్తాన్ నుంచి శ్రీలంకకు మారుస్తూ ఏసీసీ నిర్ణయం తీసుకుంది. దీనిపై పాకిస్తాన్ క్రికెట్ బోర్డు తీవ్ర అభ్యంతరం వ్యక్తం చేసింది. అన్ని మ్యాచ్ లను కాకపోయినా కనీసం తాము ఆడే మ్యాచ్ లను అయినా పాకిస్తాన్ లో నిర్వహించాలంటూ కోరింది. కానీ ఏసీసీ అందుకు అంగీకరించలేదు. కావాలంటే పాకిస్తాన్ ఆడే మ్యాచ్ లను దుబాయ్ లో నిర్వహిస్తామంటూ ఆఫర్ ఇచ్చింది. దీనిపై శ్రీలంక అభ్యతరం చెప్పింది. ఎండాకాలంలో దుబాయ్ లో మ్యాచ్ లు ఆడటం తమ వల్ల కాదని శ్రీలంక స్పష్టం చేసింది. దీంతో కథ మళ్ళీ మొదటికి వచ్చింది. చివరికి ఆసియా కప్ అన్ని మ్యాచ్ లను శ్రీలంకలోనే నిర్వహించాలని నిర్ణయించింది.
అటు తిరిగి ఇటు తిరిగి పాకిస్తాన్ లో జరగాల్సిన టోర్నమెంట్ ను శ్రీలంకకు మార్చటం తమకు ఏమాత్రం నచ్చలేదనీ.. కేవలం భారత్ అభ్యంతరం వల్లనే ఈ నిర్ణయం తీసుకున్నందుకు ప్రతీకారంగా తాము ఆసియా కప్ తో పాటు వన్డే వరల్డ్ కప్ ను బహిష్కరిస్తున్నామని తేల్చి చెప్పింది. పాకిస్తాన్ లో కనీసం తాము ఆడే నాలుగు మ్యాచ్ లైనా నిర్వహిస్తామంటేనే తాము ఈ రెండు టోర్నమెంట్లలో ఆడుతామనీ.. లేదంటే మాత్రం ఈ రెండు మెగా టోర్నీలలో తాము ఆడేది లేదంటూ తుది నిర్ణయం చెప్పింది. కానీ భారత్ మాత్రం పాకిస్తాన్ లో అడుగు పెట్టేదే లేదని.. ఇది కేవలం క్రికెట్ కు సంబంధించిన అంశంగా తాము చూడటం లేదని భారత్ చెప్తోంది. ఇరు దేశాల మధ్య ఉద్రిక్తతలు తీవ్రస్థాయిలో ఉన్న సమయంలో భారత జట్టు పాకిస్తాన్ లో పర్యటించటం సరికాదని.. దీన్ని అంగీకరించబోమని భారత్ స్పష్టం చేసింది. ప్రస్తుత పరిస్థితి చూస్తుంటే.. పంతానికి పోయి పాకిస్తాన్ ఆసియా కప్ తో పాటు ప్రపంచ కప్ ను బహిష్కరించటం ఖాయంగా కనిపిస్తోంది.

మాజీ అధ్యక్షుడు ఇమ్రాన్ ఖాన్ అరెస్టుతో భగ్గుమన్న పాకిస్తాన్ లో పరిస్థితులు రోజురోజుకూ దిగజారుతున్నాయి. ప్రస్తుతం ఆ దేశం అంతర్యుద్ధంతో రణరంగంగా మారింది. ఇమ్రాన్ అనుకూల వర్గం వారు వేలాదిగా రోడ్లపైకి వచ్చి ప్రభుత్వ ఆస్తులు ధ్వంసం చేస్తుండటం.. వారిని అడ్డుకునేందుకు పాకిస్తాన్ పోలీసులు మరియు ఆర్మీ ఎదురుదాడి చేయటంతో పాకిస్తాన్ లో యుద్ధ వాతావరణం నెలకొంది. ఇప్పటికే తీవ్రమైన ఆర్థిక సంక్షోభాన్ని ఎదుర్కుంటున్న పాకిస్తాన్.. ఈ అల్లర్లతో చరిత్రలో కోలుకోలేని స్థితికి దిగజారటం ఖాయమని అంతర్జాతీయ రాజకీయ విశ్లేషకులు చెప్తున్న మాట. అన్నం కోసం తుపాకులతో కాల్చి చంపుకుంటున్న పాకిస్తాన్ ప్రజలు.. త్వరలో ఆకలి చావులు చావటం తప్పదని హెచ్చరిస్తున్నారు. ప్రభుత్వ, ప్రైవేటు ఆస్తులు ధ్వంసం కావటం.. ప్రజల ఆస్తులు కూడా ఈ అల్లర్లలో ధ్వంసం కావటం వల్ల భవిష్యత్తులో పాకిస్తాన్ ఆర్థిక వ్యవస్థ ఎవరూ కాపాడలేనంతగా దిగజారతాయని ఆర్థిక నిపుణుల అంచనా.
ఇమ్రాన్ ఖాన్ పై దాదాపు 85 కేసులు పెట్టారు పాకిస్తాన్ పోలీసులు. ఇమ్రాన్ ప్రధానమంత్రిగా ఉన్న సమయంలో భవిష్యత్తులో ఎలాగో రాజీనామా చేయాల్సి వస్తుందని ముందే భావించి.. ప్రధానమంత్రి కార్యాలయానికి సంబంధించిన కోట్ల రూపాయల వస్తువులను ఎవరికీ తెలియకుండా దొంగతనం చేశాడనేది అతడిపై ఉన్న అతిపెద్ద ఆరోపణ. భూములు కబ్జా చేయటం, సెటిల్మెంట్లకు పాల్పడి భారీగా లంచాలు తీసుకోవటం వంటి ఇతర కేసులు డజన్ల కొద్దీ నమోదు చేశారు ఇమ్రాన్ పై. కానీ ఏ ఒక్క కేసులో కూడా ఇమ్రాన్ కు అరెస్టు వారెంట్ జారీ కాలేదు. కేసులపై కోర్టుకు హాజరై సమాధానం చెప్పాలని మాత్రమే నోటీసులు ఇవ్వగా ఇమ్రాన్ ఆ నోటీసులను తిరస్కరించి కోర్టుకు హాజరు కాకుండా తప్పించుకొని తిరుగుతున్నాడు. ఈక్రమంలో పాకిస్తాన్ ప్రభుత్వం తనను అక్రమంగా అరెస్టు చేసి హత్య చేయాలని చూస్తోందంటూ బహిరంగంగానే ఇమ్రాన్ ఆరోపించేవాడు. ఈ నేపథ్యంలో కోర్టుకు హాజరైన ఇమ్రాన్ ను పోలీసులు ముందస్తు హెచ్చరికలు లేకుండా లాక్కెళ్ళి తమ కస్టడీలో ఉంచుకున్నారు.
ఇమ్రాన్ అరెస్టు తర్వాత అతడి అనుచరులను రెచ్చగొట్టి అల్లర్లను మరింత తీవ్రం అయ్యేలా చేశాడు ఇమ్రాన్ ఖాన్ సన్నిహితుడు పాకిస్తాన్ ఉపాధ్యక్షుడు షా మహ్మద్ ఖురేషీ. దీంతో అతడిని కూడా పోలీసులు అరెస్టు చేయగా.. ఈ రెండో అరెస్టుతో పాకిస్తాన్ లో అల్లర్లు మరింత తీవ్రంగా మారాయి. చాలా చోట్ల కర్ఫ్యూ విధించినప్పటికీ ఇమ్రాన్ మద్దతుదారులు పోలీసులపై దాడులు చేస్తూనే ఉన్నారు. అల్లర్లు ఎంత తీవ్రంగా ఉంటే ఇమ్రాన్ ప్రాణాలతో ఉండేందుకు అంత ఎక్కువ అవకాశాలుంటాయి. ప్రజల దృష్టి ఇమ్రాన్ అరెస్టు నుంచి ఏమాత్రం మారి తమ ఆర్థిక పరిస్థితిపైకి మళ్ళినా అది ఇమ్రాన్ కు ప్రమాదకరమే. ఏది ఏమైనా పాకిస్తాన్ సైన్యం మాత్రం ఇమ్రాన్ ను ప్రాణాలతో ఉంచుతుందనే నమ్మకం తక్కువనే చెప్పాలి. ఇమ్రాన్ ను ఒక చోటు నుంచి మరో చోటుకు తరలించే మధ్యలో అతడిని హత్య చేసి తీవ్రవాద దాడిగా చిత్రీకరించబోతున్నారనే పుకార్లు వినిపిస్తున్నాయి. పాకిస్తాన్ లో ఏ క్షణంలో ఏం జరిగినా ఆశ్చర్యంలేదని అప్ఘనిస్తాన్ దౌత్యవేత్త ఖలీల్జాద్ వ్యాఖ్యానించారు. దీంతో యావత్ ప్రపంచం దృష్టి ఇప్పుడు పాకిస్తాన్ పైనే ఉంది.

పాకిస్తాన్ మాజీ అధ్యక్షుడు ఇమ్రాన్ ఖాన్ ను మంగళవారం పాకిస్తాన్ పారా మిలటరీ రేంజర్లు అరెస్టు చేసి అదుపులోకి తీసుకున్న విషయం తెలిసిందే. కోర్టు ముందే ఇమ్రాన్ ఖాన్ ను కాలర్ పట్టుకొని లాక్కెళ్ళారు రేంజర్లు. ఈ వీడియో ఇప్పుడు సోషల్ మీడియాలో చక్కర్లు కొడుతోంది. మరోవైపు ఇమ్రాన్ ఖాన్ మద్దతు దారుల నిరసనలు, హింసతో పాకిస్తాన్ అట్టుడికిపోతోంది. పాకిస్తాన్ లో ఉన్న తమ ప్రజల కోసం ప్రపంచవ్యాప్తంగా చాలా దేశాలు హెచ్చరికలతో కూడిన గైడ్ లైన్స్ ప్రకటించాయి. గుంపులుగా ఉన్న ప్రదేశాలకు దూరంగా ఉండండి అంటూ అమెరికా, కెనడా దేశాలు పాకిస్తాన్ లోని తమ ప్రజలకు హెచ్చరిక జారీ చేయగా.. పాకిస్తాన్ లో ఈ హింస ఇప్పటితో ఆగేది కాదనీ.. రాను రాను పరిస్థితి అత్యంత తీవ్రంగా మారే అవకాశం ఉందనీ అమెరికా గూఢచారి సంస్థ సీఐఏ ప్రకటించింది. పాకిస్తాన్ లో ప్రస్తుతం పరిస్థితి చూస్తుంటే సీఐఏ చెప్పింది నిజమే అనిపిస్తోంది.
పాకిస్తాన్ సైన్యానికి వ్యతిరేకంగా మారిన వారిని చంపేయటం ఆ దేశ సైనికాధ్యక్షులకు అలవాటు. ప్రధానమంత్రి పదవిలో ఉన్న వాళ్ళను సైతం పదవి నుంచి దింపేసి అరెస్టు చేసి మళ్ళీ ఎన్నికల పేరుతో తమకు అనుకూలంగా ఉన్న వాళ్ళను ప్రధానమంత్రి పదవిలో కూర్చోబెట్టడం పాకిస్తాన్ సైన్యం చేసే పని. కొత్త ప్రధానమంత్రి బాధ్యతలు చేపట్టిన కొద్ది రోజులకే పాత ప్రధానమంత్రి చనిపోవటం ఇక్కడ రివాజు. తీవ్రవాదుల ముసుగులో పాకిస్తాన్ సైన్యమే మాజీ అధ్యక్షులను చంపిన ఘటనలు ఇదివరకు ఎన్నో ఉన్నాయి. సైన్యానికి ఎదురు తిరిగిన అధ్యక్షుడిని విమానం ఎక్కించటం.. ప్రయాణిస్తుండగా ఆ విమానాన్ని కూల్చివేయటం ఇదివరకు రెండు సార్లు జరిగింది పాకిస్తాన్లో. అదృష్టం బాగుంటే సైన్యం చెర నుంచి తప్పించుకొని ఏ అరబ్ దేశానికో పారిపోయి చచ్చేదాకా అక్కడే బతకొచ్చు. పాక్ మాజీ అధ్యక్షుడు పర్వేజ్ ముషార్రఫ్ ఇదేవిధంగా పాకిస్తాన్ సైన్యం నుంచి తప్పించుకొని పారిపోయి ప్రాణాలు దక్కించుకున్నాడు.. ఇటీవలే ముషార్రఫ్ అనారోగ్యంతో మృతి చెందాడు. ఇప్పుడు ఇమ్రాన్ ఖాన్ పరిస్థితి కూడా దాదాపుగా సైన్యం చేతిలో చచ్చిన మాజీ అధ్యక్షులలాగానే కనిపిస్తోంది.
ప్రస్తుతం ఇమ్రాన్ ను అరెస్టు చేసినట్టు మాత్రమే బయటి ప్రపంచానికి తెలుసు.. కానీ.. అతడు ఎంతో కాలం బతికే అవకాశాలు మాత్రం లేవనే చెప్పాలి. కొద్ది రోజుల క్రితమే రోడ్ షో లో ఇమ్రాన్ పై తుపాకులతో కాల్పులు జరిగి హత్యాప్రయత్నం చేసినా.. ఇమ్రాన్ మద్దతుదారులు చుట్టూ ఉండటంతో అతడు ప్రాణాలతో బయటపడ్డాడు. ఈ కేసులో ఇద్దరు యువకులను పాకిస్తాన్ పోలీసులు అరెస్టు చేశారు. కానీ హత్యాయత్నం చేసింది మాత్రం పాకిస్తాన్ ఐఎస్ఐ అనేది బహిరంగ రహస్యం. పదవి పోయినప్పటి నుంచి ఇమ్రాన్ ఖాన్ భారత్ ను, మెడీని ఆకాశానికి ఎత్తేస్తూ పాకిస్తాన్ పాలకులను, సైన్యాన్ని తీవ్రంగా ఆరోపించాడు. అప్పుడే ఇమ్రాన్ ను చంపేయాలని ఐఎస్ఐ నిశ్చయించుకుంది. కాకపోతే.. అవకాశం కోసం ఎదురు చూస్తున్నారు అంతే. కరువు, ఆకలి విలయతాండవం చేస్తున్న ప్రస్తుత పరిస్థితుల్లో ఇమ్రాన్ ను ఏదోరకంగా హతమారుస్తుంది ఐఎస్ఐ. తిండి కోసం అల్లాడుతున్న పాకిస్తాన్ ప్రజలు.. ఇమ్రాన్ ఖాన్ హత్య గురించి ఎక్కువ రోజులు మాట్లాడుకోరు కాబట్టి ఇదే మంచి సమయం అని పాకిస్తాన్ సైన్యం భావిస్తోంది. ఆధారాలు లేని కేసులో నన్ను అరెస్టు చేసి ఆ తర్వాత చంపేస్తారంటూ ఇప్పటికే ఇమ్రాన్ సెల్ఫీ వీడియోలో చెప్పాడు కూడా. ఇప్పుడు ఆ ప్రాసెస్ స్టార్ట్ అయ్యిందన్నమాట. ఇమ్రాన్ ఖాన్ కు సంబంధించిన ఆస్తులు ఆరా తీసి స్వాధీనం చేసుకొని, ఇతడి వద్ద ఉన్న మిలటరీ లేదా ఇతర దేశాల రహస్యాలను రాబట్టే ప్రయత్నం చేస్తుంది ఐఎస్ఐ. ఆ తర్వాత తీవ్రవాద దాడిలోనో లేక విమాన ప్రమాదంలోనో ఇమ్రాన్ ఖాన్ చావటం ఖాయం.. కాకపోతే కాస్త సమయం అటూ ఇటూ.. అంతే..!