దశాబ్ధాలుగా భారత్ పాకిస్తాన్ దాయాదుల మధ్య ఉన్న పీఓకే సమస్యకు త్వరలోనే శాశ్వత పరిష్కారం లభించనుందా.. పాకిస్తాన్ ఆక్రమిత కశ్మీర్ త్వరలో భారత్ వశం అవ్వనుందా.. భారత్ అవలంబిస్తున్న అంతర్జాతీయ దౌత్య నీతి.. ఈ అసాధ్యాన్ని సుసాధ్యం చేయనుందా.. ప్రస్తుతం ప్రపంచ దౌత్య నిపుణుల్లో చర్చనీయాంశంగా మారిన అంశమిది. ప్రస్తుతం పాకిస్తాన్ పరిస్థితి ఎలా ఉందో మనకు తెలుసు.
అంతర్జాతీయ వాణిజ్యం చేయటం సంగతి పక్కనపెడితే.. కనీసం నిత్యావసరాలు కొనుక్కోటానికి కూడా పాకిస్తాన్ దగ్గర డాలర్లు లేవు. ఉన్న కొద్ది మొత్తం డాలర్లు మరో వారంలో ఖర్చు అయిపోతాయి. ఆ తర్వాత ఇంటర్నేషనల్ మానెటరీ ఫండ్ లోన్ ఇవ్వటమో.. అమెరికా ఆర్థిక సాయం చేయటమో జరిగితే తప్ప పాకిస్తాన్ కు ఊరట కలిగే అవకాశమే లేదు. అయితే.. ఇప్పటికే పాకిస్తాన్ తీసుకున్న లోన్లకు ఈఎంఐ కట్టలేని స్థితిలో ఉందనీ.. నెలవారీ చెల్లింపులు పెండింగ్ లో పెట్టిందనీ ప్రపంచ బ్యాంకు చెప్తోంది. ఇలాంటి సందర్భంలో పాక్ కు కొత్త అప్పులు పుట్టే పరిస్థితి లేదు. అమెరికాలో పరిస్థితులు మారాయి. రిపబ్లికన్ల ఒత్తిడితో అమెరికా అటు ఉక్రెయిన్ కు గానీ.. ఇటు పాకిస్తాన్ కు గానీ ఆర్థిక సాయం చేసే అవకాశం లేదు. ఎందుకంటే.. అమెరికాలో పెరిగిన ద్రవ్యోల్బణం, ఫ్యుయెల్ రేట్ల దృష్ట్యా ఇతర దేశాలకు సాయం చేసే స్థితిలో ఆ దేశం లేదు. అయినా సరే బైడెన్ బ్లాంకు చెక్కులు ఉక్రెయిన్ పాకిస్తాన్ దేశాలకు ఇవ్వటాన్ని రిపబ్లికన్లు వ్యతిరేకిస్తున్నారు. అమెరికా ప్రజలు కూడా ఈ విషయంలో బైడెన్ పై వ్యతిరేకతతో ఉన్నారు. సో.. పాకిస్తాన్ కు డోర్స్ క్లోజ్. ఇక చైనా విషయానికి వస్తే.. పాకిస్తాన్ పై చాలానే ఖర్చు చేసిన చైనా.. ఇప్పుడు మరింత ఖర్చు పెట్టే ఆలోచనలో లేదు. ఎందుకంటే.. పాకిస్తాన్ లో తాలిబన్ల ప్రభావం పెరిగిపోయింది. ఏ క్షణంలో పాకిస్తాన్ ప్రభుత్వం రద్దై ఆర్మీ పాలన వస్తుందో తెలియదు.. ఏ క్షణంలో తాలిబన్లు పాక్ ఆర్మీతో యుద్ధం ప్రకటిస్తారో తెలియదు.. పాకిస్తాన్ లో ఎటు చూసినా సంక్షోభమే. మరో భయానక విషయం ఏమిటంటే.. చైనా ప్రభుత్వం తాలిబన్లతో చేతులు కలిపినట్టు అనధికార సమాచారం. పాకిస్తాన్ కు సాయం చేసినా.. స్నేహం చేసినా చైనాకు పనికిరాదు. కాబట్టి చైనా కూడా పాకిస్తాన్ కు దూరంగానే ఉంటుంది. మొత్తంగా ఇదీ పాకిస్తాన్ పరిస్థితి.
పాక్ పరిస్థితికి.. కశ్మీర్ భారత్ వశం కావటానికి సంబంధం ఏమిటనేదే ప్రశ్న అయితే..
రష్యా ఉక్రెయిన్ పై దండయాత్ర మొదలు పెట్టిన తర్వాత ప్రపంచం మొత్తం రెండు వర్గాలుగా విడిపోయినట్టైంది. కొన్ని దేశాలు అమెరికా వైపు నిలబడితే.. మరి కొన్ని దేశాలు రష్యా వైపు నిలబడ్డాయి. కానీ ఎంతగా అంతర్జాతీయ ఒత్తిళ్ళు వచ్చినా భారత్ మాత్రం తన వైఖరి తటస్థమనే చెప్పింది. తమ దేశానికి కావాల్సిన వాటిని ఎవరి దగ్గరి నుంచి కొనాలో.. ఏ దేశంతో స్నేహం.. ఏ దేశంలో ఎలాంటి దౌత్యం చేయాలో తమకు చెప్పాల్సిన అవసరం లేదంటూ భారత విదేశాంగ మంత్రి ఎస్ జైశంకర్ అన్ని అంతర్జాతీయ వేదికలపై స్పష్టంగా చెప్పారు. భారత్ అంతర్జాతీయ దౌత్యం అద్భుతంగా పనిచేసింది.. ఫలితంగా భారత్ కు హెచ్చరికలు చేసే పెద్దన్న దేశాలన్నీ భారత్ గ్రేట్ అంటూ కితాబులిచ్చే స్థాయికి వచ్చేశాయి. భారత్ ఎటు వైపు నిలబడితే అటే విజయం అన్న విషయాన్ని అన్ని దేశాలు గ్రహించాయి. మొండి మనిషి.. ఎవరి మాటనూ లెక్క చేయని రష్యా అధ్యక్షుడు పుతిన్ భారత ప్రధాని మోడీకి ఇచ్చిన ప్రాధాన్యత వల్ల భారత్ ప్రభ మరింత వెలిగిపోయింది. మొత్తంగా భారత్ ను బెదిరించే దేశాలు ఇప్పుడు బతిమిలాడే స్థితికి వచ్చాయని చెప్పటంలో ఎలాంటి సందేహం లేదు. ఇప్పుడు భారత్ ముందు రెండే రెండు అతి పెద్ద లక్ష్యాలు.. అవి.. ఒకటి ఐక్య రాజ్య సమితి భద్రతా మండలిలో శాశ్వత సభ్యత్వం.. రెండు.. పాకిస్తాన్ ప్రేరేపిత ఉగ్రవాదాన్ని అణచివేయటంతో పాటు కశ్మీర్ సమస్యకు శాశ్వత పరిష్కారం. బహుశా భారత ప్రభుత్వం ఎన్నికల లోపు తీసుకున్న అతిపెద్ద నిర్ణయాలు వీటికి ముడిపడే ఉండనున్నాయేమో. ఇదీ భారత్ పరిస్థితి.
విలయ తాండవం చేస్తున్న కరువును ఎదుర్కోవాలా.. పెంచి పోషించిన తాలిబన్లు పాముల్లా మారి కాటేస్తుంటే ఆ పాము కోరలు పీకేందుకు సిద్ధం కావాలా.. నమ్మించి మోసం చేసిన చైనా ఏ కుట్ర చేస్తుందోనని భయపడాలా.. అప్పు కోసం ఐఎంఎఫ్ చుట్టూ తిరగాలా.. ఆర్థిక సాయం కోసం అమెరికాను ప్రసన్నం చేసుకునే మార్గాలు ఆలోచించాలా.. అసలేం చేయాలో తెలియని గందరగోళ పరిస్థితి పాకిస్తాన్ ది. ఇలాంటి సందర్భంలో పాకిస్తాన్ పై ఒత్తిడి తేవటం ద్వారా కశ్మీర్ సహా పాక్ ప్రేరేపిత ఉగ్రవాదం అనే సమస్యకు ఫుల్ స్టాప్ పెట్టాలి. ఇదే భారత్ ముందున్న అత్యంత క్లిష్టమైన.. అత్యంత ముఖ్యమైన లక్ష్యం. ఈ లక్ష్యాలు కూడా యుద్ధంతో కాకుండా కేవలం దౌత్యపరమైన ఎత్తులు పై ఎత్తులతోనే సాధించాలి. ఇది బీజేపీ ప్రభుత్వానికి ఖచ్చితంగా చాలా పెద్ద సవాల్. ఎన్నికలు సమీపిస్తున్న సమయంలో ఉచిత పథకాలతో ప్రజలను ప్రలోభపెట్టడం కంటే.. భారత చిరకాల ఆకాంక్షలను నెరవేర్చటం ద్వారా అదే ప్రజలను ప్రసన్నం చేసుకోవటమే బీజేపీకి ఉత్తమ మార్గం. చూద్దాం.. ఏం జరగబోతోందో..!
