bhalamedia.com

5 లక్షల దాకా నో టాక్స్

చిన్న చిన్న ఉద్యోగాలు చేసే మధ్య తరగతి వారికి భారీ ఊరటనిచ్చే వార్త ఇది. సంపాదించే అరకొర సంపాదనలో కూడా పన్నులు చెల్లించాలా అని బాధపడే వారికోసం ప్రభుత్వం పెద్ద బహుమతి ఇవ్వబోతోంది. వచ్చే బడ్జెట్ లో ఇన్ కమ్ ట్యాక్స్ స్లాబ్ లలో భారీ ఊరట ఇవ్వనుంది. ప్రస్తుతానికి 2.5 లక్షలుగా ఉన్న పరిమితి ఇకపై 5 లక్షలు కానుంది. రెండున్నర లక్షల నుంచి 5 లక్షల మధ్య వార్షిక ఆదాయం ఉన్న వారు వారి ఆదాయంలో 5 శాతాన్ని ఇన్ కమ్ టాక్స్ గా ప్రభుత్వానికి చెల్లించాల్సి ఉంటుంది. ఇప్పుడు ఆ లిమిట్ 5 లక్షలు కానుంది. 5 లక్షల లోపు వార్షిక ఆదాయం ఉన్న వాళ్ళు ఎలాంటి పన్నులు చెల్లించాల్సిన అవసరం లేదు. మే నెలలో ఈ విషయాన్ని ప్రభుత్వం బడ్జెట్ లో పొందుపరిచి ప్రకటన చేయనుందని సమాచారం.

పెట్రోల్ గ్యాస్ తో పాటు నిత్యావసర వస్తువుల ధరలు విపరీతంగా పెరిగిపోవటంతో దేశంలో కాస్ట్ ఆఫ్ లివింగ్ గత పదేళ్ళలో భారీగా పెరిగింది. సంవత్సరానికి రెండున్నర లక్షల సంపాదన అనేది ఈ రోజుల్లో చాలా తక్కువ అయిపోయింది. ఈ సంపాదనతో అప్పుల బాధ లేకుండా బతకటమే కష్టంగా మారిన తరుణంలో ఇదే సంపాదనలో పన్ను కట్టాల్సి రావటం సామాన్యుడికి గుదిబండగా మారింది. మారిన కాలానికి అనుగుణంగా ప్రభుత్వం ఇలాంటి నిర్ణయం తీసుకోవటం మధ్య తరగతి వారికి ఊరటనిచ్చే విషయమే కాకుండా దేశ ఆర్థిక వ్యవస్థకు బలం ఇచ్చేదనే చెప్పాలి. పన్ను కట్టాల్సిన అవసరం లేనప్పుడు ఆ సొమ్మును రకరకాల పెట్టుబడులుగానూ లేదంటే కొనుగోళ్ళ కోసమైనా వెచ్చిస్తారు. దీని వల్ల మార్కెట్ లో మనీ ఫ్లో పెరిగి ఆర్థిక వ్యవస్థ విలువ పెరుగుతుంది. త్వరలోనే ఈ శుభవార్తను ప్రభుత్వమే స్వయంగా ప్రకటించనుంది.

ఎన్నికలు సమీపిస్తున్న వేళ.. కనీసం సంవత్సరం సమయం కూడా లేని సమయంలో.. భారతీయ జనతా పార్టీ కీలక నిర్ణయం తీసుకుంది. బీజేపీ జాతీయ అధ్యక్షుడిగా ప్రస్తుత అధ్యక్షుడు జేపీ నడ్డానే కొనసాగనున్నట్టు అమిత్ షా ప్రకటించారు. ప్రస్తుతం బీజేపీ జాతీయ కార్యవర్గ సమావేశాలు జరుగుతున్న విషయం తెలిసిందే. ఈ సమావేశాల్లో దేశవ్యాప్తంగా పార్టీకి సంబంధించిన కీలక విషయాలపై చర్చించి నిర్ణయాలు తీసుకుంటున్నారు. నడ్డా పార్టీ కోసం ఎంతో చేశారనీ.. దేశవ్యాప్తంగా ఒక లక్ష 30 వేల బూత్ కమిటీలు ఏర్పాటు చేశారనీ.. బూత్ స్థాయిలో బీజేపీని బలోపేతం చేయటంలో ఆయన విజయం సాధించారనీ అమిత్ షా అన్నారు.

తెలంగాణ వంటి ప్రాంతాల్లో కూడా బీజేపీ పుంజుకున్నదనీ.. దక్షిణ భారత దేశంలో బీజేపీ మరింత బలోపేతం అవుతుందని చెప్పారు. కరోనా సమయంలో కూడా బీజేపీ కార్యకర్తలకు కావాల్సిన సాయాన్ని నడ్డా పార్టీ ద్వారా అందజేశారనీ.. అందుకే ఆయన నేతృత్వంలోనే బీజేపీ మరోసారి ఎన్నికలకు వెళ్ళాలని నిర్ణయించుకున్నదని చెప్పారు. జేపీ నడ్డా వచ్చే సంవత్సరం జూన్ వరకు అధ్యక్షుడిగా కొనసాగనున్నారు. ఈ విషయంలో పార్టీ ఏకగ్రీవ నిర్ణయం తీసుకుందన్నారు.

రాహుల్ గాంధీ మరోసారి సంచలన వ్యాఖ్యలు చేశారు. పంజాబ్ లో భారత్ జోడో యాత్ర నిర్వహిస్తున్న రాహుల్ గాంధీ.. అక్కడే జరిగిన మీడియా సమావేశంలో ఓ ప్రశ్నకు సమాధానంగా.. భారీ స్టేట్మెంట్ ఇచ్చారు. ఆర్ఎస్ఎస్ కార్యాలయంలో అడుగుపెట్టడం కంటే తల నరుక్కోవటం మేలనీ.. తనకు అలాంటి పరిస్థితి వస్తే తల నరుక్కుంటాననీ చెప్పారు. దేశవ్యాప్తంగా కాంగ్రెస్ పార్టీని బలోపేతం చేసి.. వచ్చే ఎన్నికల్లో అధికారంలోకి తేవటమే లక్ష్యంగా రాహుల్ భారత్ జోడో యాత్రకు శ్రీకారం చుట్టారు. కాంగ్రెస్ ను ప్రక్షాళన చేయాలని నిర్ణయించుకున్న సోనియా గాంధీ.. మొదటిసారిగా గాంధీ వారసులకు కాకుండా బయటి వారికి ఏఐసీసీ పగ్గాలు అప్పజెప్పారు. ప్రస్తుతం ఏఐసీసీ అధ్యక్షుడిగా మల్లికార్జున్ ఖర్గే ఉన్న విషయం తెలిసిందే.

బీజేపీ రహిత భారత దేశాన్ని సాధిస్తామంటూ రాహుల్ గాంధీ పదే పదే చెప్తుంటాడు. ఎక్కడ మీడియా సమావేశంలో పాల్గొన్నా రాహుల్ అలాగే ఏదో ఒక వివాదాస్ఫద వ్యాఖ్యలు చేయటం గమనార్హం. మహారాష్ట్రలో జోడో యాత్ర నిర్వహిస్తున్న సమయంలో దామోదర్ సావర్కర్ ఓ దేశద్రోహి అంటూ చేసిన వ్యాఖ్యలు దుమారాన్ని రేపాయి. రాహుల్ వ్యాఖ్యలతో మహారాష్ట్ర ప్రజల్లో కాంగ్రెస్ పట్ల ఉన్న కాస్తో కూస్తో ప్రేమ కూడా లేకుండా పోయిందని ఆ తర్వాత కాంగ్రెస్ నేతలు అభిప్రాయపడ్డారు.

కాంగ్రెస్ పార్టీకి పునర్వైభవం తీసుకొచ్చే సంకల్పంతో రాహుల్ గాంధీ భారత్ జోడో యాత్ర చేపట్టిన విషయం తెలిసిందే. ప్రస్తుతం పంజాబ్ లోని హోషియాపూర్ లో జోడో యాత్ర నిర్వహిస్తున్నాడు. ఈ యాత్రలో భద్రతా వైఫల్యం బయటపడింది. రాహుల్ ను కౌగిలించుకోటానికి ఓ యువకుడు గుంపు లో నుంచి రాహుల్ వైపు దూసుకువచ్చాడు. వెంటనే అలర్ట్ అయిన సెక్యూరిటీ సిబ్బంది ఆ యువకుడిని పక్కకు తీసుకెళ్ళారు. రాహుల్ తో పాటు ఉన్న పంజాబ్ కాంగ్రెస్ నేతలు ఆ యువకుడిని ఆపేసి పక్కకు పంపించి వేశారు. రాహుల్ ఢిల్లీలో భారత్ జోడో యాత్ర నిర్వహిస్తున్న సమయంలో సెక్యూరిటీ సరిగ్గా లేదంటూ కేంద్ర హోం మంత్రి అమిత్ షా కు కాంగ్రెస్ నేతలు లేఖ రాశారు.

పంజాబ్ లో ఈ ఘటన జరగటం పట్ల అక్కడి ప్రభుత్వం స్పందించింది. రాహుల్ యాత్రకు ప్రభుత్వం పూర్తి సెక్యూరిటీ అందజేస్తున్నదని చెప్పింది. అనుకోకుండా జరిగిన ఘటన వెనుక ఏదైనా కుట్ర ఉన్నదా అనేది గుర్తించేందుకు విచారణకు ఆదేశిస్తున్నట్టు చెప్పింది. ఇటీవల ప్రధానమంత్రి మోడీ రోడ్ షో లో కూడా ఇదే విధంగా ఓ వ్యక్తి మోడీ వైపు చేతిలో పూలదండతో దూసుకొచ్చాడు. వెంటనే అలర్ట్ అయిన సెక్యూరిటీ సిబ్బంది.. ఆ వ్యక్తిని అదుపులోకి తీసుకున్నారు.

భారత్ పట్ల ఎప్పుడూ విద్వేషాన్ని వెల్లగక్కే పాకిస్తాన్ ప్రధాన మంత్రి షహబాజ్ షరీఫ్ నోట మొదటిసారి శాంతి మంత్రం వినిపించింది. భారత్ తో శతృత్వం ఇక తమ వల్ల కాదనీ.. స్నేహాన్ని కోరుకుంటున్నామనీ బహిరంగంగానే ఓ పత్రికకు ఇచ్చిన ఇంటర్వ్యూలో వ్యాఖ్యానించాడు. ఇమ్రాన్ ఖాన్ రాజీనామా చేసిన తర్వాత ప్రధాన మంత్రిగా ప్రమాణ స్వీకారం చేస్తున్న సమయంలో ఇదే షరీఫ్.. తలతిక్క వ్యాఖ్యలు చేశాడు. తను ప్రధాన మంత్రిగా దేశాన్ని అభివృద్ధి బాటలో పయనింపచేస్తాననీ.. అలాగే పాక్ చిరకాల స్వప్నమైన కశ్మీర్ యాపిల్ ను తాను సాకారం చేస్తాననీ వ్యాఖ్యానించాడు. అప్పటి నుంచి పాకిస్తాన్ లో ఆకలి అల్లకల్లోలం సృష్టించింది. కరువు విలయ తాండవం చేసింది. పెట్రోల్, గ్యాస్ కోసం క్యూలో నిలబడటం.. ఒక్క గోధుమ రొట్టె కోసం తుపాకీకి ఎదురెళ్ళాల్సిన పరిస్థితి వచ్చేసింది. అప్పుకోసం ఏ గడప తొక్కినా నిరాశ ఎదురుకావటంతో ఇక పాకిస్తాన్ కు భారత్ తప్ప మరో ప్రత్యామ్నాయం లేకుండా పోయింది. చివరకు భారత్ ముందు మోకాళ్ళపై నిలుచోవాల్సిన పరిస్థితి వచ్చింది ఆ దేశ ప్రధాన మంత్రికి.

ఓ డైలీకి ఇచ్చిన ఇంటర్వ్యూలో భారత్ తో మూడు యుద్ధాలు చేసిన తర్వాత గానీ తమకు గుణపాఠం రాలేదంటూ వ్యాఖ్యానించాడు. భారత్ తో శతృత్వం వల్ల తమకు మిగిలింది పేదరికం, ఆకలి తప్ప ఇంకేం లేదనీ.. భారత నాయకత్వం ప్రస్తుతం తమతో స్నేహం గురించి ఆలోచించాలని విజ్ఞప్తి చేశాడు. కశ్మీర్ సమస్య పరిష్కారం కోసం భారత్ పాకిస్తాన్ చర్చలు జరిపితే బాగుంటుందని వ్యాఖ్యానించాడు. యుద్ధం వల్ల బాంబులు, బుల్లెట్లు వృధా అవుతాయే తప్ప పాకిస్తాన్ కు ఒరిగేది ఏమీ లేదన్నాడు. పాక్ కు సాయం చేయటానికి ఏ దేశమూ ముందుకు రాకపోవటమో.. లేక మరోటో తెలియదు గానీ.. షరీఫ్ వ్యాఖ్యలు అంతర్జాతీయంగా చర్చనీయాంశంగా మారాయి.