ప్రస్తుతం పాకిస్తాన్ పరిస్థితి ఎలా ఉందో మళ్లీ చెప్పాల్సిన అవసరం లేదు. ఒక్క రొట్టె కోసం యుద్ధం చేయాల్సిన పరిస్థితి. ప్రభుత్వం రేషన్ ద్వారా సప్లై చేస్తున్న గోధమల బస్తాను ఇంటికి తెచ్చేలోపు ప్రాణాలతో ఉంటామా లేదా గ్యారంటీ లేని దారుణమైన స్థితి. తుపాకీలు చూపించి బెదిరించి మరీ గోధమల బస్తాలను ఎత్తుకెళ్తున్నారు. అంటే.. తిండి కోసం ప్రాణాలు పణంగా పెట్టాల్సి వస్తోంది. ఇటు ఆకలి.. అటు తీవ్రవాదుల బెదిరింపులు.. సైన్యం అరాచకాలు.. తాలిబన్ల దాడులు.. ఇలా ఒక్కటి కాదు.. అనేక సమస్యలతో పాకిస్తాన్ జనాలు దినదిన గండంగా బతుకుతున్నారు. ఇక ఇక్కడ బతకలేమని భావించిన పాక్ ప్రజలు కార్గిల్ రోడ్డును తెరిచి భారత్లో కేంద్ర పాలిత ప్రాంతం లఢఖ్ పరిధిలోని కార్గిల్ జిల్లాలో కలపాలని కోరుతూ నిర్వహించిన భారీ ర్యాలీ వీడియోలు ట్విట్టర్లోకి చేరాయి.
ముఖ్యంగా గడిచిన 12 రోజులుగా ఆ ప్రాంతంలో నిరసన ప్రదర్శనలు ముమ్మరంగా సాగుతున్నాయి. గోధుమ, ఇతర ఆహారోత్పత్తులపై సబ్సిడీలను పునరు ద్ధరించాలని కోరుతున్నారు. పాకిస్థాన్ ఆర్మీ, ప్రభుత్వానికి వ్యతిరేకంగా ప్రజలు నినాదాలు చేస్తున్నారు. దీనికి కారణం ఏంటో ప్రత్యేకించి చెప్పాల్సిన అవసరమే లేదు. ప్రస్తుతం పాక్ తన చరిత్రలోనే అత్యంత దుర్భర పరిస్థితులను ఎదుర్కొంటోంది. ముఖ్యంగా అక్కడి ఆర్థిక వ్యవస్థ కుప్పకూలిపోవడంతో, పాక్ ప్రజల జీవన పరిస్థితులు మరింత దిగజారాయి. నిత్యావసరాలను కొనుగోలు చేయలేని పరిస్థితి నెలకొంది. ఇలాంటి టైంలో పాకిస్తాన్ ఆహార సంక్షోభానికి సంబంధించిన వీడియోలే కాదు.. మరో అంశానికి సంబంధించిన వీడియోలు కూడా వైరల్ అవుతున్నాయి.
ముక్తదర్ ఖాన్ అనే భారత సంతతికి చెందిన అమెరికన్ పౌరుడు, డెలావేర్ యూనివర్సిటీ ప్రొఫెసర్గా పనిచేస్తున్నారు. తాజాగా ఈయన చేసిన విశ్లేషణ విపరీతంగా వైరల్ అవుతోంది. ఇప్పుడున్న పరిస్థితుల్లో పాకిస్తాన్ మీద భారత్ దాడి చేసి, నాశనం చేసే అవకాశమున్నా ఆ పని భారత పాలకులు చేయరని చెప్పారు. అదే సమయంలో పాకిస్తాన్లో ఉన్న దుర్భర పరిస్థితులు భారత్లో కనుక ఉండి ఉంటే పాకిస్తాన్ ఇప్పటికే దాడి చేసేదని అంచనా వేశారు. ఒకవేళ పాకిస్తాన్ తరహా పరిస్థితులు భారత్లో ఉంటే, ఇండియాలో మనీ లేదని, ఆర్థిక వ్యవస్థ పడిపోతోందని, తమిళనాడు విడిపోతోందని, అస్సాం విభజనను కోరుకుంటోందని.. ఇప్పుడు మనం దాడి చేసి కశ్మీర్ను తీసుకోవచ్చని పాకిస్తాన్ దాడి చేసి ఉండేదని ఖాన్ అన్నారు. నిజానికి.. ముక్తదర్ ఖాన్ చెప్పింది అక్షరాల నిజం. పాకిస్తాన్ ఇలాంటి అవకాశాల కోసమే ఎదురు చూస్తుందనడంలో అనుమానమే లేదు. కానీ, శత్రువు బలహీనంగా ఉన్న సమయంలో ఓడించడం రాజనీతి కాదన్న విషయం ఇండియాకు తెలుసు.
