bhalamedia.com

ఒడిశా రాష్ట్రంలోని బాలాసోర్ వద్ద జరిగిన రైలు ప్రమాదం విషయంలో సంచలన విషయాలు వెలుగు చూస్తున్నాయి. ఇక్కడ జరిగింది రైలు ప్రమాదం అస్సలే కాదనీ.. ముందస్తు కుట్రతోనే భారీ విధ్వంసానికి ప్లాన్ చేసి అమలు చేశారనీ కేంద్ర రైల్వే శాఖ మంత్రి అశ్వనీ వైష్ణవ్ వెల్లడించారు. రైల్వే ఇంటర్ లాకింగ్ వ్యవస్థ ఫెయిల్ కావటం వల్లనే ప్రమాదం జరిగింది అనేది వాస్తవమేననీ.. కాకపోతే అది యాధృచ్ఛికంగా జరిగింది కాదనీ.. ఇంటర్ లాకింగ్ సిస్టమ్ లోని సెట్టింగ్స్ ను ఎవరో కావాలని మార్చేశారనీ ఆయన చెప్తున్నారు. ఇందుకు సంబంధించిన బాధ్యులను కూడా గుర్తించాని చెప్తున్న రైల్వే మంత్రి.. ఇంత కంటే ఎక్కువ వివరాలు వెల్లడించటం మంచిది కాదంటూ దాటవేశారు. ఘటనపై మీడియాకు వివరాలు వెల్లడించేందుకు ఏర్పాటు చేసిన ప్రెస్ మీట్ లో మంత్రి ఈ విధమైన వ్యాఖ్యలు చేయటం తీవ్ర చర్చనీయాంశంగా మారింది. ఈ సందర్భంగా చాలా విషయాలపై క్లారిటీ ఇచ్చారు రైల్వే మంత్రి.
ప్రమాదం జరిగిన సమయంలో రైళ్ళు నడుపుతున్న లోకో పైలెట్ల తప్పు అసలు లేదనీ.. అలాగే అందరూ వేగం పరిమతిలోనే రైళ్ళను నడిపిస్తున్నారనీ స్పష్టంగా చెప్పారు. ఇంటర్ లాకింగ్ వ్యవస్థ ఆటోమేటిక్ గా పని చేస్తుందనీ.. దాన్ని మెషీన్ సెట్టింగ్స్ లో రాకూడని మార్పులు వచ్చాయనీ.. అయితే ఆ మార్పులు వాటంతట అవి వచ్చిన కావనీ.. ఎవరో కావాలనే ఈ దారుణానికి ఒడిగట్టారనీ చెప్పారు అశ్వనీ వైష్ణవ్. ఇంటర్ లాకింగ్ వ్యవస్థలో ఏవైనా తప్పులు జరిగితే అన్ని రైల్వే ట్రాక్ లపై రెడ్ సిగ్నల్ పడిపోతుందనీ.. ఎక్కడి రైళ్ళు అక్కడే నిలిచి పోతాయనీ చెప్పారు. కానీ తప్పు జరిగినప్పటికీ రెడ్ సిగ్నల్స్ పడకుండా వ్యవస్థను మార్చేశారన్నారు. దీనిపై సీబీఐ విచారణ మొదలైందనీ.. త్వరలోనే పూర్తి వివరాలను ప్రజల ముందు పెడతామని చెప్పారు.

ప్రమాదంలో ప్రాణాలు కోల్పోయిన సుమారు 3 వందల మంది రక్త సంబంధీకులకు ఇప్పటికే 10 లక్షల నష్ట పరిహారాన్ని అందజేశామనీ.. గాయపడిన వారికి 2 లక్షల నష్టపరిహారంతో పాటు వైద్యం అందిస్తున్నామనీ చెప్పారు. ప్రమాదం జరిగినప్పటి నుంచీ ఇది ఎవరో కావాలని చేశారన్న వాదన వినిపిస్తూనే ఉన్నది. వందే భారత్ రైళ్ళ విషయంలో విమర్శలు చేసిన వారే ఈ కుట్రకు పాల్పడ్డారంటూ సోషల్ మీడియాలో వార్తలు గుప్పుమన్నాయి. ఇది తీవ్రవాదుల కుట్ర అయి ఉండొచ్చన్న అభిప్రాయం కూడా వినిపించింది. ఎట్టకేలకు స్వయంగా కేంద్ర రైల్వే మంత్రి ఇది యాధృచ్ఛికం కాదనీ.. ప్రమాదం వెనుక కుట్ర ఉందనీ చెప్పటం భయాందోళనలు కలిగిస్తోంది.

రెజ్లింగ్ ఫెడరేషన్ చీఫ్ బ్రిజ్ భూషణ్ శరణ్ సింగ్ తమపై లైంగిక వేధింపులకు పాల్పడ్డాడని ఆరోపిస్తూ గత కొద్ది రోజులుగా పలువురు రెజ్లర్లు ఆందోళన చేస్తున్న విషయం తెలిసిందే. బ్రిజ్ భూషణ్ అరెస్టు కోసం కేంద్ర ప్రభుత్వానికి 5 రోజుల గడువు ఇచ్చిన రెజ్లర్లు ప్రస్తుతం శాంతియుతంగా నిరసన చేస్తున్నారు. ఏ క్షణాన ఏం జరుగుతుందో అని సర్వత్రా ఉత్కంఠ నెలకొని ఉన్న తరుణంలో కేంద్ర హోం మంత్రి అమిత్ షా రెజ్లర్లతో రహస్యంగా సమావేశం కావటం సంచలనంగా మారింది. మీడియా కంట పడకుండా.. బయటకు రాకుండా రెజ్లర్లతో అమిత్ షా భేటీ అవుతాడని ఎవరూ ఊహించలేదు. ఆరోపణలు ఎదుర్కుంటున్న బ్రిజ్ భూషణ్ బీజేపీ ఎంపీ కావటం.. మోడీ, అమిత్ షాల మద్దతు అతనికి ఉందని ఆరోపణలు వినిపిస్తున్న నేపథ్యంలో అమిత్ షా రెజ్లర్లతో సమావేశం కావటం ఆసక్తికరంగా మారింది. అయితే వీళ్ళతో అమిత్ షా ఏం మాట్లాడాడు అనేది మాత్రం వెల్లడి కాలేదు.

కొత్త పార్లమెంట్ భవనం ప్రారంభోత్సవం సమయంలో రెజ్లర్లు పార్లమెంట్ దిశగా ర్యాలీ చేస్తున్న సమయంలో ఢిల్లీ పోలీసులు రెజ్లర్లను అడ్డుకున్నారు. ఈ క్రమంలో రెజ్లర్లతో పోలీసులు ప్రవర్తించిన తీరుపై విమర్శలు వ్యక్తమయ్యాయి. ఆ తర్వాత రెజ్లర్లు తమ ఒలంపిక్ మెడల్స్ ను గంగలో కలిపేస్తామని హెచ్చరించటం.. రైతు సంఘాల నాయకుడు టికాయత్ వాళ్ళను అడ్డుకొని ప్రభుత్వానికి 5 రోజుల గడువు ఇవ్వటం.. జరిగిపోయాయి. అప్పటి నుంచి కేంద్ర ప్రభుత్వం తరఫున ఎలాంటి సమాధానం లేని సమయంలో అమిత్ షా రెజ్లర్లతో సమావేశం అయ్యారు. చట్టం దృష్టిలో అందరూ సమానమేననీ.. సాక్ష్యాధారాలు కోర్టుకు సమర్పించి న్యాయపరంగా పోరాటం చేయమనీ అమిత్ షా రెజ్లర్లకు సూచించాడని సమాచారం. ఇకపై రోడ్లపై ధర్నాలు, ర్యాలీలు చేయటం మానుకోవాలనీ.. అంతర్జాతీయ రెజ్లింగ్ సమాఖ్య దృష్టిలో భారత్ పరువు పోవటం ఎవరికీ మంచిది కాదనీ రెజ్లర్లకు అమిత్ షా కాస్త గట్టిగానే చెప్పినట్టు తెలుస్తోంది. అమిత్ షా సూచనల మేరకు త్వరలోనే రెజ్లర్లు ఆందోళన ఆపేస్తారని సమాచారం.

బీఆర్ఎస్ పార్టీ నుంచి బహిష్కరించబడిన తర్వాత ఇప్పటికీ పొంగులేటి శ్రీనివాస్ రెడ్డి ఏ పార్టీలో చేరతాడు అనే దానిపై స్పష్టత రాలేదు.
ఓసారి కాంగ్రెస్ అగ్రనేతలను కలిసి చర్చించాడు.. ఆ తర్వాత బీజేపీ నేతలతో మంతనాలు జరిపాడు.. వైఎస్ షర్మిళ తల్లిని కలిసి మాట్లాడాడు.. ఇలా అన్ని పార్టీల అగ్రనేతలతో కలుస్తున్నాడే తప్ప ఏ పార్టీకి వెళ్తాడనేది మాత్రం ఇప్పటికీ చెప్పింది లేదు. ఇవన్నింటికీ మించి కొత్త పార్టీ పెట్టాలనే ఆలోచన ఉందంటూ ఆ మధ్య బాంబు పేల్చాడు పొంగులేటి. ఇప్పుడు మళ్ళీ కొత్త పాట అందుకున్నాడు. తాను ఏ పార్టీలో చేరితే ఆ పార్టీ అధికారంలోకి రావటం పక్కా అంటూ అతి విశ్వాసం వ్యక్తం చేస్తున్నాడు పొంగులేటి. ఖమ్మం జిల్లా మొత్తం తన హవా ఉందనీ.. తాను ఎవరి పేరు చెప్తే వాళ్ళకే ఓట్లు పడతాయనీ తరచూ వ్యాఖ్యానిస్తుంటాడు.

ఆ మధ్య రాహుల్ గాంధీ స్వయంగా పొంగులేటిని కలిసి కాంగ్రెస్ పార్టీలో చేరమని అడిగితే.. ఖమ్మంలోని అన్ని నియోజకవర్గాల్లో తాను చెప్పిన వారికే టిక్కెట్ ఇవ్వాలనీ.. హైదరాబాద్ లో కూడా కొన్ని నియోజకవర్గాల్లో టిక్కెట్లు తను చెప్పిన వాళ్ళకే ఇవ్వాలనీ అడిగాడట. పొంగులేటి కోరిన కోరికను చూసి అవాక్కైన రాహుల్ గాంధీ.. మీరు మీరు తేల్చుకోండి అంటూ రేవంత్ రెడ్డికి అప్పజెప్పి ఢిల్లీ విమానం ఎక్కేశాడు. బీజేపీలోకి రావాలంటే కూడా ఇలాంటి కండిషన్లే పెడుతున్నాడట ఈయన. పొంగులేటి వ్యవహార శైలితో చిర్రెత్తుకొచ్చిన బీజేపీ ఎమ్మెల్యే ఈటెల రాజేందర్.. పొంగులేటి బీజేపీలోకి రాడు.. అంటు బహిరంగంగా స్టేట్మెంట్ ఇచ్చేశాడు. ఇంత జరిగినా పొంగులేటి మాత్రం వెనక్కి తగ్గటం లేదు సరికదా.. తాను ఏ పార్టీలో చేరితే ఆ పార్టీ పక్కా అధికారంలోకి వస్తుందంటూ గొప్పలకు పోతున్నాడు. ఇప్పటికీ తన అనుచరులు, కార్యకర్తలతో ఆత్మీయ సమ్మేళనం అంటూ తరచుగా మీటింగులు పెట్టి తన బలం చాటుకునే ప్రయత్నం చేస్తున్నాడు. ఎన్నికలకు ఎక్కవ సమయంలేని ఈ తరుణంలో పొంగులేటి త్వరగా ఏదో ఓ నిర్ణయం తీసుకోకపోతే.. ఆ తర్వాత తానే వస్తానన్నా ఏ పార్టీ చేర్చుకోదేమో ఆలోచించుకుంటే మంచిది. ఏది ఏమైనా.. ఈయన ఓవర్ కాన్ఫిడెన్స్ కు దండం పెట్టాలి.

తమను లైంగికంగా వేధించాడని ఆరోపిస్తూ రెజ్లింగ్ ఫెడరేషన్ ఆఫ్ ఇండియా చీఫ్ బ్రిజ్ భూషణ్ శరణ్ సింగ్ ను అరెస్టు చేయాలన్న రెజ్లర్లకు ఊహించని విధంగా మద్దతు పెరుగుతోంది. తమ మెడల్స్ ను గంగలో కలిపేస్తామంటూ వెళ్ళిన రెజ్లర్లకు రైతు సంఘాలు మద్దతిచ్చిన విషయం తెలిసిందే. తాజాగా వీరికి మద్దతుగా ఛత్తీస్ ఘడ్ లో నక్సల్స్ పోస్టర్లు వెలిశాయి. వెంటనే బ్రిజ్ భూషణ్ శరణ్ సింగ్ ను అరెస్టు చేయాలంటూ నక్సల్స్ పోస్టర్ల ద్వారా డిమాండ్ చేస్తున్నారు. నక్సల్స్ పోస్టర్లు ఛత్తీస్ ఘడ్ రాష్ట్రవ్యాప్తంగా కలకలం సృష్టించాయి. అటు ఢిల్లీలో కూడా పరిస్థితి ఇంకా ఉద్రిక్తంగానే కనిపిస్తోంది. ప్రస్తుతానికి శాంతించిన రెజ్లర్లు.. కేంద్ర ప్రభుత్వానికి 5 రోజుల గడువు ఇచ్చారు బ్రిజ్ భూషణ్ ను అరెస్టు చేయటానికి. అప్పటికీ అరెస్టు చేయని పక్షంలో తమ ఆందోళన ఉధృతం చేయటంతో పాటు తాము సాధించిన ఒలింపిక్ మెడల్స్ ను గంగలో కలిపేస్తామని హెచ్చరిస్తున్నారు.

ఇప్పటికే ఢిల్లీ పోలీసులు బ్రిజ్ భూషణ్ పై 2 ఎఫ్ఐఆర్ లు నమోదు చేశారు. లైంగిక వేధింపులకు సంబంధించిన చట్టాల ప్రకారం కేసులు నమోదు చేసి విచారణ చేస్తున్నారు. కానీ.. ఇప్పటి వరకూ రెజ్లర్ల ఆరోపణలు బలపరిచే విధంగా ఒక్క సాక్ష్యం కూడా తమకు లభించలేదనీ.. కనీసం సాక్ష్యాలను బ్రిజ్ భూషణ్ నాశనం చేసేందుకు ప్రయత్నించినట్టు కూడా ఎక్కడా ఆధారాలు లభించలేదనీ పోలీసులు కోర్టుకు తెలిపారు. బ్రిజ్ భూషణ్ కూడా మొదటి నుంచీ ఒక్కటే మాట చెప్తున్నాడు. ఎవరైతే తనపై ఆరోపణలు చేస్తున్నారో వాళ్ళు నేరుగా పోలీస్ స్టేషన్లో ఫిర్యాదు చేసి తనపై కేసు ఫైల్ చేయించి విచారణ చేయించాలనీ.. తమ వద్ద ఉన్న సాక్ష్యాలు, ఆధారాలు పోలీసులకు అప్పగించాలనీ బ్రిజ్ భూషణ్ చెప్తున్నాడు. తాను నేరం చేసినట్టు నిరూపణ అయితే తానే స్వయంగా ఉరి వేసుకుంటానంటూ చాలెంజ్ చేస్తున్నాడు బ్రిజ్ భూషణ్.

2015 లో టర్కీ పర్యటనకి వెళ్ళినప్పుడు మహిళా రెజ్లార్ల మీద లైగింక దాడి జరిగిందని అది కూడా బ్రిజ్ భూషణ్ చేశాడు అని ఆరోపిస్తున్నారు రేజ్లర్లు. కానీ 2015 లో బ్రీజ్ భూషణ్ టర్కీ వెళ్ళలేదు అని అతని పాస్పోర్ట్ లో ఎలాంటి స్టాంపింగ్ లేదు అని ఇమ్మిగ్రేషన్ శాఖ చెప్తున్నది. ఒక వేళ బ్రిజ్ భూషణ్ కనుక టర్కీ వెళ్లి ఉంటే అతని పాస్పోర్ట్ లో ఎంట్రీ స్టాంప్ ఉండాలి.. కానీ అలాంటిది ఏమీ లేదు. ఢిల్లీ పోలీసులు విచారణ లో బ్రిజ్ భూషణ్ 2015 లొ టర్కీ వెళ్ళలేదు అని అధికారిక రికార్డ్ ని సేకరించారు. 2016 లో మంగోలియా దేశ పర్యటనకి వెళ్ళినప్పుడు బ్రిజ్ భూషణ్ మమ్మల్ని లైంగికంగా వేధించాడు అని ఫిర్యాదు చేశారు మహిళా రేజ్లార్లు కానీ 2016 లో బ్రిజ్ భూషణ్ మంగోలియా వెళ్ళలేదు మరియు ఆతని పాస్పోర్ట్ లో ఎలాంటి ఎంట్రీ లేదు .ప్రముఖ బాక్సింగ్ క్రీడాకారిణి ‘ మేరీ కోమ్ ‘ అధ్యక్షతన ఏర్పాటు చేసిన విచారణ కమిటీ 2016 లో బ్రిజ్ భూషణ్ మంగోలియా పర్యటనకి వెళ్ళలేదు అని తేల్చి చెప్పింది. రెజ్లర్లు బలమైన ఆరోపణలు చేస్తున్నప్పటికీ వారి ఆరోపణలకు బలం చేకూర్చే ఒక్క ఆధారం కూడా లేకపోవటం గమనార్హం.

2 వేల నోటును చలామణీ నుంచి ఉపసంహరిస్తూ కొద్ది రోజుల క్రితం ఆర్బీఐ కీలక నిర్ణయం తీసుకున్న విషయం తెలిసిందే. ఆర్బీఐ ప్రకటన వచ్చిన నాటి నుంచీ 2 వేల నోట్ల బ్లాక్ మార్కెట్ దందా విపరీతంగా పెరిగిపోయింది. 2 వేల నోట్లు 5 వందల నోట్లలోకి మార్చటం ఇప్పుడు దేశవ్యాప్తంగా పెద్ద లాభసాటి దందాగా మారిపోయింది. చిట్ ఫండ్ కంపెనీలు, వడ్డీలకు డబ్బులిచ్చే వ్యాపారులు ముఖ్యంగా ఈ దందాను నడిపిస్తున్నారు. బ్లాక్ మనీ కాకుండా కొద్దిపాటి 2 వేల నోట్లు ఉన్నవారు చాలా తక్కువ సంఖ్యలో బ్యాంకుల్లో డిపాజిట్ చేస్తున్నారు. చాలా మంది సూపర్ మార్కెట్లు, షాపింగ్ మాల్స్ లో వస్తువులు కొని బిల్లు రూపంలో 2 వేల నోట్లను చెల్లించి భారం దించుకుంటున్నారు. 2 వేల నోట్ల బ్లాక్ దందా ఇప్పుడు పెద్ద చిక్కులు తెచ్చి పెడుతోంది. 2 వేల నోట్లు ఎలాగోలా బ్లాక్ మార్కెట్లో 5 వందల నోట్ల రూపంలోకి మార్చేసుకుంటున్న బ్లాక్ మనీ వ్యాపారులు.. ఆ నోట్లను దాచి పెట్టేస్తున్నారు. దీంతో ప్రస్తుతం దేశవ్యాప్తంగా 5 వందల నోట్లకు భారీ కొరత ఏర్పడుతోంది. సుమారు గత 2 వారాల నుంచి బ్లాక్ మార్కెట్ దందా వల్ల 5 వందల నోట్లు కనిపించకుండా పోతున్నాయి. దీంతో ఒక కొత్త ప్రచారం చక్కర్లు కొడుతోంది. 2 వేల నోట్లు బ్యాంకులో డిపాజిట్ అయిన తర్వాత టైమ్ చూసి 5 వందల నోట్లను కూడా ఆర్బీఐ బ్యాన్ చేయబోతోందనేది ఆ ప్రచారం సారాంశం.
దేశవ్యాప్తంగా ప్రస్తుతం 5 వందల నోట్లకు భారీ కొరత ఉంది. ఈ కొరతను దృష్టిలో ఉంచుకొని ఆర్బీఐ కొత్తగా 5 వందల నోట్లను ప్రింట్ చేయకపోవటం వల్ల అనేక ఇబ్బందులు ఎదురవుతున్నాయి. వేల కోట్ల రూపాయల 5 వందల నోట్లు ఇప్పటికే దాచిపెట్టబడి ఉన్నాయి. రానున్న రోజుల్లో ఈ కొరత మరింత తీవ్రం అవుతుందని తెలిసినా ఆర్బీఐ 5 వందల నోట్లు ముద్రించకపోవటానికి కారణం.. భవిష్యత్తులో ఈ నోటును కూడా రద్దు చేయటమే అని ప్రచారం జరుగుతోంది. అయితే.. ఆర్బీఐ నుంచి ప్రభుత్వం నుంచి గానీ దీనిపై అధికారిక ప్రకటన ఏమీ రాలేదు. 5 వందల నోట్లు ఉన్న వాళ్ళు ఇప్పడు మార్కెట్లో రారాజులు అయిపోయారు. 10 లక్షల రూపాయల 2 వేల నోట్లు 5 వందల నోట్లలోకి మార్చితే 2 లక్షలు కమిషన్ తీసుకుంటున్నారట. అలా సేకరించిన 2 వేల నోట్లను వేర్వేరు వ్యక్తుల అకౌంట్లలో చిన్న చిన్న మొత్తాలుగా డిపాజిట్ చేసి.. మళ్ళీ వాటిని డ్రా చేసి మళ్ళీ 2 వేల నోట్లు మార్చటానికి ఉపయోగిస్తున్నారు. ఇలా ఒక వంద 2 వేల నోట్లు బ్యాంకులో డిపాజిట్ అయితే వాటి బదులు ఐదారు రెట్లు 5 వందల నోట్లు బ్యాంకుల నుంచి బ్లాక్ మార్కెట్ ద్వారా బ్లాక్ మనీ కలిగి ఉన్న వాళ్ళ సూట్ కేసుల్లోకి వెళ్ళిపోతున్నాయి. ఆర్బీఐ 2 వేల నోట్ల ఉపసంహరణ నిర్ణయం వల్ల 2 వేల నోట్లు లేని సామాన్యుడికి ప్రస్తుతానికి ఏ ఇబ్బందీ లేకపోయినా.. బ్లాక్ మార్కెట్ దందా ఇలాగే కొనసాగితే 5 వందల నోట్లు కూడా దొరకటం కష్టమైపోతుంది.