bhalamedia.com

భారత ప్రధాన మంత్రి నరేంద్ర మోడీ పాపులారిటీ గురించి కొత్తగా చెప్పాల్సింది ఏమీ లేదు. ఆయన ఎక్కడికి వెళ్ళినా ప్రపంచం మొత్తం అటు వైపే చూస్తుంటుంది. సోషల్ మీడియాలో సుమారు 9 కోట్ల మంది ఆయనను ఫాలో అవుతుంటారు నిత్యం. భారత్ లోనే కాదు విదేశాల్లో కూడా మోడీపై విపరీతమైన అభిమానం కనిపిస్తూ ఉంటుంది. చాలా దేశాల ప్రధానమంత్రులు, అధ్యక్షులు మోడీ పాపులారిటీ చూసి ఆశ్చర్యపోతుంటారు. గతంలో భారతదేశానికి ప్రధానమంత్రిగా పనిచేసిన ఏ ఒక్కరికీ ఇంత పాపులారిటీ రాలేదనేది ఒప్పుకోవాల్సిన వాస్తవం. అమెరికాకు చెందిన ప్రముఖ వార్తా సంస్థ న్యూయార్క్ టైమ్స్.. మోడీకి ఇంత పాపులారిటీ ఎందుకు వచ్చింది అనే దానిపై ఓ ఆసక్తికరమైన కథనాన్ని ప్రచురించింది. మోడీకి ఇంత పాపులారిటీ ఎందుకు వచ్చిందో.. ప్రపంచ వ్యాప్తంగా భారత్ మరియు మోడీకి ఇంతటి ప్రాధాన్యత ఎందుకు ఉన్నదో కథనంలో వివరించింది న్యూయార్క్ టైమ్స్.

ప్రధాని హోదాలో ఆయన భారత్ లో ప్రతి నెలా నిర్వహించే మన్ కీ బాత్ కార్యక్రమం ఆయనకు పాపులారిటీ రావటానికి ప్రధాన కారణం అని న్యూయార్క్ టైమ్స్ విశ్లేషించింది. ఈ కార్యక్రమం ద్వారా ఆయన నేరుగా ప్రజలతో మాట్లాడటం.. ఆయన మాట్లాడే విధానంలో ఉండే వాక్చాతుర్యం.. ఎంచుకునే అంశం.. ఇలా ప్రతీదీ ఆయనకు ఉన్న ప్రజాదరణను పెంచేశాయట. డిజిటల్ పద్ధతులను, సోషల్ మీడియాను మోడీ ఆండ్ టీమ్ వాడుకునే పద్ధతి కూడా ఇంత పాపులారిటీ రావటానికి కారణమయ్యాయట. భారతదేశంలో జరిగే అన్ని పరిణామాలపై మోడీకి చాలా లోతైన అవగాహన ఉంటుందంటూ రాసుకొచ్చింది న్యూయార్క్ టైమ్స్. భారతదేశాన్ని ప్రపంచంతో మోడీ కనెక్ట్ చేసిన విధానం మరియు ప్రపంచ దేశాలతో భారత్ కు మోడీ ఇచ్చిన అత్యంత అద్భుతమైన విదేశాంగ విధానం.. భారత్ పేరు మారుమోగి పోయేలా చేయటం.. ఇలా చాలా అంశాలు మోడీని ప్రపంచంలో అత్యంత ప్రజాదరణ ఉన్న నేతగా నిలబెట్టాయట.
రాహుల్ గాంధీ లాంటి నేతలు అమెరికా పర్యటనలో మోడీ గురించి నోటికొచ్చినట్టు మాట్లాడిన నేపథ్యంలో.. అమెరికా వార్తా సంస్థలు ఇలాంటి కథనాలు ప్రచరించటం గమనార్హం. మోడీ అమెరికా పర్యటనకు ముందే అమెరికాలో వివిధ ప్రదేశాల్లో మీటింగులతో ఊదరగొట్టిన రాహుల్.. భారత్ పరిస్థితి దిగజారిందనీ.. మోడీ పాలన బాగాలేదనీ.. ఇలా చాలా మాటలే మాట్లాడాడు. కానీ ఆ మాటలు ఎక్కడా ప్రభావం చూపలేకపోయాయి. పనిగట్టుకొని మోడీ పై దుష్ప్రచారం చేసినప్పటికీ పాపం రాహుల్ ఆండ్ టీమ్ కు చుక్కెదురైంది. ప్రస్తుతం మోడీకి ఉన్న పాపులారిటీ అనేది ఓ హాట్ టాపిక్.. టాక్ ఆఫ్ ది వరల్డ్..!!

భారత ప్రధాన మంత్రి నరేంద్ర మోడీ ప్రస్తుతం అమెరికాలో పర్యటిస్తున్న విషయం తెలిసిందే. ముందే ఊహించినట్టుగానే మోడీ పర్యటనలో భారత్-అమెరికా చరిత్రలోనే ఇప్పటి వరకూ సాధ్యం కాని ఎన్నో ఒప్పందాలు కార్యరూపం దాల్చుతున్నాయి. భారత్-అమెరికా దౌత్య అధికారులు కలిసి కొన్ని వ్యాపార ఒప్పందాలపై సంతకాలు చేయగా.. మోడీ-బైడెన్ సమావేశంలో చారిత్రక ఒప్పందాలు కార్యరూపం దాల్చనున్నాయి. జెట్ ఇంజన్ల తయారీ ఒప్పందం అన్నింటికంటే కీలకం కానుంది. ఈ ఒప్పందం పూర్తి అయితే భారత్ స్థాయి వంద మెట్లు పైకెక్కినట్టే. అమెరికా, రష్యా, ఫ్రాన్స్, బ్రిటన్ నాలుగు దేశాల వద్ద మాత్రమే ఉన్న జెట్ ఇంజన్ తయారీ టెక్నాలజీ భారత్ కు లభిస్తుంది. ఇదే జరిగితే ప్రపంచంలో అత్యంత వైమానిక దళం కలిగిన ఐదో దేశంగా భారత్ నిలుస్తుంది. ఇప్పటి వరకూ జెట్ ఇంజన్ తయారీ టెక్నాలజీని భారత్ కు అందించేందుకు ఏ దేశం కూడా అంగీకరించలేదు. కావాలంటే జెట్ ఇంజన్లు తయారు చేసి ఇస్తామే తప్ప టెక్నాలజీని బదలాయించటానికి కుదరదని పై నాలుగు దేశాలు తేల్చి చెప్పాయి. కానీ ఇప్పుడు అమెరికా మాత్రం జెట్ ఇంజన్ల తయారీ టెక్నాలజీని భారత్ ఇవ్వటమే కాకుండా భారత్ లోనే జెట్ ఇంజన్ల తయారీ యూనిట్ ఏర్పాటు చేసేందుకు అంగీకరించింది.

జీఈ-ఎఫ్-414 జెట్ ఇంజన్లు ఇకపై భారత్ లో తయారు కానున్నాయి. అయితే.. చాలా యేళ్ళ క్రితం నుంచే భారత్ లో జెట్ ఇంజన్ల తయారీకి ప్రయత్నాలు జరుగుతూనే ఉన్నాయి. వేల కోట్ల రూపాయలు రీసెర్చ్ ఆండ్ డెవలప్మెంట్ కోసం ఖర్చు చేసినప్పటికీ భారత్ ఈ మైలురాయిని చేరుకోలేకపోయింది. 1986 నుంటి భారత ప్రభుత్వం ఆపరేషన్ కావేరి పేరిట జెట్ ఇంజన్ల తయారీ కోసం ప్రయత్నిస్తున్నా అది నెరవేరలేదు. ఇప్పుడు భారత్-అమెరికా మధ్య ఒప్పందంతో భారత్ లో ఎఫ్414 యుద్ధ విమానాల జెట్ ఇంజన్లు తయారీ జరగనుంది. హిందుస్తాన్ ఏరోనాటికల్ లిమిటెడ్ కంపెనీ ఈ ప్రాజెక్టు స్వీకరించనుంది. ఇదే జరిగితే భారత్ లో వేలాది కొత్త ఉద్యోగాలు పుట్టుకొస్తాయి.

యుద్ధం అంటూ జరిగితే అందులో యుద్ధ విమానాలదే కీలకమైన పాత్ర. యుద్ధ ట్యాంకర్లు లేదా ఆర్మీ చేయలేని పనిని యుద్ధ విమానాలు చేస్తాయి. గాలిలో ఎగురుతూ శతృవుపై భీకర దాడి చేసి సర్వనాశక విధ్వంసం సృష్టించగలవు యుద్ధ విమానాలు. క్షణాల్లో శతృదేశ ఆర్మీ శిబిరాలను, ఆయుధాగారాలను బూడిద చేయవచ్చు. గాలిలో నుంచి మిసైల్ లాంచ్ చేయగల యుద్ధ విమానాలు.. వేల కిలో మీటర్లను నిముషాల్లో ప్రయాణించి శతృవును నిర్వీర్యం చేయగలవు. అత్యాధునిక యుద్ధ విమానాలు ఎవరి దగ్గర ఉంటే యుద్ధంలో విజయం వారిదే. అందుకే భారత్ రఫేల్ యుద్ధ విమానాల కోసం అంతగా ఖర్చు చేసింది. ఫైటర్ జెట్ విమానాల తయారీ కనుక భారత్ లో జరిగితే.. అంతర్జాతీయ యుద్ధ విమానాల వ్యాపారంలో భారత్ రారాజుగా వెలుగొందనుంది. యుద్ధ విమానాల ఇంజన్లు తయారీ టెక్నాలజీ ఏ దేశం వద్ద ఉంటుందో ఆ దేశాన్ని యుద్ధంలో ఓడించటం దాదాపు అసాధ్యం. అందుకే ఇన్ని సంవత్సరాలుగా ఏ దేశం కూడా భారత్ తో ఈ టెక్నాలజీని పంచుకోటానికి అంగీకరించలేదు. ఈ ఒప్పందం ఇంత కీలకం కనుకనే.. మోడీ అమెరికా పర్యటనను ప్రపంచ దేశాలు అత్యంత ఆసక్తితో గమనిస్తున్నాయి. భారత్ ను అమెరికా వాడుకుంటున్నది అంటూ చైనా వ్యాఖ్యానించటం వెనుక ఉన్నది.. ఈ కడుపు మంట మాత్రమే. ఇప్పుడు చైనా భారత్ పై ఆక్రమణ ప్రయత్నం చేసే ధైర్యం చేయలేదు. ఇంకా మోడీ పర్యటనలో చాలా కీలక ఒప్పందాలు జరగనున్నాయి.. అయితే.. అవి ఏమిటనేది ప్రస్తుతానికి పూర్తి సమాచారం లేదు.

సముద్రంలో మునిగిన టైటానిక్ షిప్ శకలాలను చూడటానికి వెళ్ళిన ఓషియన్ గేట్ సబ్ మెరైన్ ఆచూకీ ఇప్పటికీ దొరకలేదు. అందుబాటులో ఉన్న సమచారం ప్రకారం ఇందులో ప్రయాణిస్తున్న ఐదుగురు ప్రాణాలు పోయినట్టే. సబ్ మెరైన్ లో ఐదుగురికి కలిపి గురువారం ఉదయం దాకా సరిపోయేంత ఆక్సిజన్ అందుబాటులో ఉందని ఓషియన్ గేట్ సంస్థ అధికారులు చెప్తున్నారు. ఈ లెక్కన గురువారం ఉదయం కల్లా సబ్ మెరైన్ ఆచూకీ లభించని పక్షంలో వారు ప్రాణాలతో ఉండే అవకాశమే లేదు. ఇప్పటికే అమెరికా నావికా దళానికి చెందిన నిపుణుల బృందాలు సముద్రం మొత్తం జల్లెడ వేసి గాలిస్తున్నాయి. అయినా ఓషియన్ గేట్ గురించి చిన్న సమాచారం కూడా సేకరించలేకపోయాయి. అప్పుడప్పుడు సముద్రం నుంచి కొన్ని శబ్ధాలు వస్తున్నాయనీ.. ఆ శబ్దాలు ఓషియన్ గేట్ సబ్ మెరైన్ నుంచే వెలువడుతున్నాయని తాము భావిస్తున్నామనీ.. కానీ దానిని చేరుకోలేకపోతున్నామనీ అమెరికా నేవీ ప్రకటించింది.

పాకిస్తాన్ బిలియనీర్ షెహజాదా దావూద్, అతడి కుమారుడు సులేమాన్, బ్రిటిష్ వ్యాపారవేత్త హమీష్ హార్డింగ్ తో పాటు యాత్ర నిర్వాహకుడు మరియు ఓషియన్ గేట్ సంస్థ ఓనర్ స్టాక్టన్ రష్, ఫ్రెంచ్ మాజీ నేవీ ఆఫిసర్ పాల్ హెన్రీ ఓషియన్ గేట్ సబ్ మెరైన్ లో ఉన్నారు. కెనడా, అమెరికా నేవీకి సంబంధించిన నిపుణుల బృందాలు సముద్రం మొత్తం గాలిస్తున్నా ఆచూకీ మాత్రం లభించటం లేదు. సబ్ మెరైన్ ఒక్కసారి అదుపుతప్పితే అది వెళ్ళే మార్గం కనుక్కోవటం కష్టం. నావిగేషన్ గనుక మిస్ గైడ్ అయితే అది అదుపుతప్పి సముద్రజలాల్లో చక్కర్లు కొడుతూ ఉంటుంది. అయితే.. అసలు సబ్ మెరైన్ ఎలా అదుపుతప్పింది.. సముద్రం లోతున ఏం జరిగింది అనేది మాత్రం ఇప్పటి వరకూ ఓషియన్ గేట్ అధికారులు వెల్లడించటం లేదు. ఎప్పుడు ఏ వార్త వినాల్సి వస్తుందోనని అమెరికా అధికారులు టెన్షన్ పడుతున్నారు. అందులో ఉన్న వాళ్ళు మాత్రం ప్రాణాలతో ఉండే అవకాశం ఒక్క శాతం కూడా లేవని నిపుణులు చెప్తున్నారు.

ఉక్రెయిన్ అధ్యక్షుడు వోలోదిమిర్ జెలెన్ స్కీ కి బ్రిటన్ ప్రధానమంత్రి రుషి సునక్ ఇండియన్ బర్ఫీని తినిపించాడు. ఇందుకు సంబంధించిన వీడియోను రుషీ తానే స్వయంగా ఇన్ స్టాగ్రామ్ వేదికగా షేర్ చేయగా.. ప్రస్తుతం వరల్డ్ న్యూస్ లో ఈ వీడియో ట్రెండ్ అవుతోంది. జెలెన్ స్కీకి రుషీ స్వీట్ తినిపించటాన్ని అందరూ మెచ్చుకుంటున్నారు. రుషీ ఫ్యామిలీ మ్యాన్ అంటూ కామెంట్లు చేస్తున్నారు. మరి కొందరు.. భారతీయులు ఎక్కడ ఉన్నా ఇలానే ఉంటారు.. అంటూ కామెంట్లు చేస్తున్నారు. ఈ వీడియో గురించి ఓ ఇంటర్వ్యూలో రుషి క్లియర్ గా చెప్పాడు. కొద్ది రోజుల క్రితం తమ ఇద్దరి మధ్య ఓ సమావేశం జరిగిందనీ.. జెలెన్ స్కీతో మాట్లాడుతున్న సమయంలో అతడు ఆకలితో ఉన్నట్టు అనిపించి తన వద్ద ఉన్న బర్ఫీని ఆయనకు ఇచ్చాననీ చెప్పారు రుషీ. తన తల్లి గారు భారతీయ స్వీట్లను ఇంట్లోనే చేస్తుంటుందనీ.. అవి చాలా రుచికరంగా ఉంటాయనీ చెప్పాడు రుషీ. స్వీట్ తిన్న జెలెన్ స్కీ ఆ స్వీట్ గురించి అడిగి తెలుసుకొని చాలా బాగుందని మెచ్చుకున్నాడని కూడా రుషీ చెప్పాడు. ఈ విషయం తెలిసిన రుషీ తల్లి ఎంతో సంతోషించిందట.

రష్యా ఉక్రెయిన్ యుద్ధం నేపథ్యంలో ఉక్రెయిన్ అధ్యక్షుడు జెలెన్ స్కీని చంపేస్తామంటూ రష్యా ఆర్మీ క్లియర్ వార్నింగ్ ఇచ్చిన విషయం తెలిసిందే. దీంతో ఉక్రెయిన్ లో ఉండటం సేఫ్ కాదని భావించిన జెలెన్ స్కీ యూరప్ దేశాల అండదండలతో దేశం విడిచి ఎక్కడో రహస్యంగా దాక్కొని యుద్ధాన్ని నడిపిస్తున్నాడు. తమకు సాయం కావాలంటూ వీలైనప్పుడల్లా విదేశాలకు వెళ్తూ ఆయా దేశాల ప్రధాన మంత్రులతో సమావేశమవుతున్నాడు. ఈక్రమంలోనే జెలెన్ స్కీ బ్రిటన్ ప్రధానమంత్రి రుషి సునక్ తో సమావేశమయ్యాడు. కొద్ది రోజల క్రితం భారత ప్రధానమంత్రి మోడీతో సమావేశమైన జెలెన్ స్కీ.. తమకు ఆర్థిక, ఆయుధ సాయం చేయాలని కోరటంతో పాటు పుతిన్ ను యుద్ధం ఆపేలా ఒప్పించాలంటూ కోరిన విషయం తెలిసిందే.