bhalamedia.com

సర్జికల్ స్ట్రైక్స్ కు ఎలాంటి ఆధారాలు లేవనీ.. అది కేవలం బీజేపీ ప్రభుత్వం కల్పన మాత్రమేనంటూ కాంగ్రెస్ సీనియర్ నేత చేసిన వ్యాఖ్యలు దేశ రాజకీయాల్లో మరోసారి అలజడి సృష్టించిన విషయం తెలిసిందే. దిగ్విజయ్ సింగ్ వివాదాస్ఫద వ్యాఖ్యలపై బీజేపీ నేతలు తీవ్రంగా రియాక్ట్ అయ్యారు. భారత సైన్యంపై పిచ్చి ప్రేలాపనలు పేలవద్దనీ.. ఇలాంటి వాటితో రాజకీయం చేసి ఓట్లు సంపాదించటం కాంగ్రెస్ కు అలవాటైందనీ బీజేపీ నేతలు విరుచుకుపడ్డారు. కానీ రాహుల్ గాంధీ మాత్రం దిగ్విజయ్ సింగ్ వ్యాఖ్యల పట్ల ఊహించని విధంగా స్పందించాడు. దిగ్విజయ్ చేసిన వ్యాఖ్యలు ఆయన వ్యక్తిగతమేననీ.. వాటితో తనకు సంబంధం లేదని చెప్పాడు రాహుల్. తనకు భారత సైన్యంపై పూర్తి నమ్మకం ఉందనీ.. వారు చేసిన పని రుజువులు చూపించాల్సిన అవసరం వాళ్ళకు లేదనీ చెప్పాడు రాహుల్.
అయితే.. ఇదే రాహుల్ గాంధీ గతంలో దిగ్విజయ్ చేసిన వ్యాఖ్యలే చేశాడు. సర్జికల్ స్ట్రైక్స్ చేశామని మోడీ చెప్పటంపై తనకు నమ్మకం లేదని వ్యాఖ్యానించిన రాహుల్.. సర్జికల్ స్ట్రైక్స్ కు రుజువేంటని ప్రశ్నించాడు. దీంతో అప్పట్లో పెద్ద దుమారమే రేగింది. బీజేపీ నేత ఒకరు.. రాహుల్ మీ తండ్రి రాజీవ్ అని చెప్పేందుకు రుజువు ఉందా అంటూ అభ్యంతరకరమైన విమర్శ చేయగా.. అది కూడా రాద్ధాంతంగా మారింది. గతంలో సర్జికల్ స్ట్రైక్స్ గురించి వివాదాస్ఫద వ్యాఖ్యలు చేసిన రాహుల్.. ఇప్పుడు మాట మార్చాడు. అయితే.. దిగ్విజయ్ వ్యాఖ్యల పట్ల కాంగ్రెస్ లో కూడా వ్యతిరేకత వ్యక్తమైంది. ఎప్పుడో ముగిసిన వివాదాన్ని మళ్ళీ రాజేసి కాంగ్రెస్ పార్టీని విమర్శల పాలు చేయవద్దని దిగ్విజయ్ కు అధిష్టానం చెప్పినట్టు సమాచారం.

రాజధాని ఢిల్లీ-ఎన్సీఆర్ ప్రాంతంలో మంగళవారం ఉదయం భూకంపం సంభవించింది. సుమారు 30 సెకన్ల పాటు భూమి కంపించటంతో జనం ఇళ్ళను వదిలి వీధుల్లోకి పరుగులు తీశారు. ఎప్పుడు ఏం జరుగుతుందోనని చాలా సేపు వీధుల్లోనే జనం నిల్చుండిపోవటం కనిపించింది. నేపాల్ లో 5.8 తీవ్రతతో భూకంపం సంభవించిందనీ.. దాని ప్రభావంగానే ఢిల్లీలో స్వల్ప భూకంపం సంభవించిందనీ అధికారులు చెప్తున్నారు. 20 రోజుల క్రితం జనవరి 5వ తేదీన అప్ఘనిస్తాన్ లోని హిందూకుష్ ప్రాంతంలో కూడా ఇదే తరహా భూకంపం సంభవించగా.. దాని ప్రభావం వల్ల కూడా ఢిల్లీలో ప్రకంపనలు కనిపించాయి.
సోమవారం నాడు ఇండోనేషియాలో మరోసారి భూకంపం సంభవించింది. ఇండోనేషియాలోని టొబెలోకు 162 కిలోమీటర్ల దూరంలో సముద్ర మట్టానికి 12 కిలోమీటర్ల లోతున భూకంప కేంద్రాన్ని గుర్తించినట్టు యునైటెడ్ స్టేట్స్ జియోలాజికల్ సర్వే అధికారులు చెప్తున్నారు.

2022 పోతూ పోతూ శాంటాక్లాజ్ ద్వారా సాఫ్ట్ వేర్ ఉద్యోగులకు బోలెడన్ని కష్టాలను క్రిస్మస్ గిఫ్ట్ గా ఇచ్చిపోతే.. 2023 సంవత్సరం వస్తూ వస్తూనే ఆ కష్టాలను వంద రెట్లు చేసింది. ప్రపంచం మొత్తం ఐటీ సంక్షోభం ఆవహిస్తోంది. ఇప్పటికే దిగ్గజ కంపెనీలన్నీ లేఆఫ్స్ పేరిట ఉద్యోగులను ఇంటికి పంపించేస్తుంటే.. ఇక ఇప్పుడు చిన్న కంపెనీల వంతు కూడా వచ్చేసింది. మల్టీ నేషనల్ కంపెనీలే ప్రాజెక్టులు లేక ఉద్వాసన పర్వం కొనసాగిస్తుంటే.. ఆ కంపెనీల ప్రాజెక్టులను ఔట్ సోర్సింగ్ పేరుతో పూర్తి చేసి పెట్టే డొమెస్టిక్ కంపెనీల పరిస్థితి మరింత దిగజారుతోంది. ఇక ఐటీ ప్రపంచాన్ని శాసించే అమెరికాలో ఐటీ రెసిషన్ విలయ తాండవం చేస్తోంది. గూగుల్, అమేజాన్ సహా అనేక కంపెనీలు ప్రస్తుతం ఉద్యోగులను తగ్గించుకుంటోంది. ఇదే అమెరికాలోని ఇండియన్ సాఫ్ట్ వేర్ ఇంజనీర్లను గజగజ వణికిస్తోంది.
ఓ కంపెనీలో ఉద్యోగం పోతే మరో కంపెనీలో ఉద్యోగం వెతుక్కునే పరిస్థితైనా ఉండేది గతంలో.. కానీ ఇప్పుడు పరిస్థితి వేరు. అన్ని కంపెనీలూ లేఆఫ్స్ పర్వం కొనసాగిస్తుంటే ఇక ఉద్యోగం దొరికేదెలా.. కరోనా పాండమిక్ సమయంలో ఉద్యోగాల కోత జరిగినా అది చాలా చాలా తక్కువ. చాలా మంది వర్క్ ఫ్రమ్ హోమ్ కు మారిపోయారే తప్ప పెద్దగా ఉద్యోగాల కోతల్లేవ్. కానీ ఇప్పుడు పరిస్థితి చాలా తీవ్రంగా ఉంది. అయితే.. ఈ ఐటీ రెసిషన్ కు కారణం అమెరికా తీసుకున్న నిర్ణయాలే. రష్యా ఉక్రెయిన్ యుద్ధానికి పెద్దన్న స్థాయిలో అడ్డు చెప్పాల్సింది పోయి.. రష్యా మీద ప్రతీకారం తీర్చుకోవాలన్న కోరికతో ఉక్రెయిన్ కు కోట్లాది డాలర్లను సాయంగా ప్రకటించి తన వినాశనాన్ని తానే కొని తెచ్చుకుంది అమెరికా. దాని ఫలితమే ప్రస్తుతం ప్రపంచం పాలిట శాపంగా పరిణమించింది. వినాశనం దిశగా అమెరికా పోతూ పోతూ తన వెంట మిగితా ప్రపంచాన్ని కూడా ఈడ్చుకెళ్ళింది. దాని ఫలితమే అమెరికా కేంద్రంగా పనిచేసే దిగ్గజ కంపెనీలైన గూగుల్, అమేజాన్, మెటా, మైక్రోసాఫ్ట్, స్ట్రైప్, హెచ్ పీ, ట్విటర్, గోల్డ్ మెన్ సాక్స్, అడోబ్.. ఇలా చాలా కంపెనీలు సుమారు లక్ష మంది సాఫ్ట్ ఉద్యోగులను రోడ్డున పడేశాయి. అందులో మనోళ్ళు కూడా ఉన్నారు. ఈ మాంద్యం కోరలు విరిచే బ్రహ్మాస్తం ఎవరి దగ్గర ఉందో.. ఎప్పుడు వస్తుందో.. ఎదురు చూడాలంతే.