bhalamedia.com

వరుస భూకంపాలతో అతలాకుతలం అవుతున్న టర్కీ కోసం భారత్ సరికొత్త ఆపరేషన్ ను చేపట్టింది. టర్కీని ఆదుకునేందుకు ఆపరేషన్ దోస్త్ పేరుతో ఆ దేశానికి అవసరమైన అన్ని రకాల సామాగ్రిని పంపిస్తోంది భారత్. భారత విదేశాంగ శాఖ మంత్రి జైశంకర్ ఈ విషయాన్ని వెల్లడించారు. ప్రత్యేక కార్గో విమానాల ద్వారా టర్కీకి కావాల్సిన ఎమర్జెన్సీ పరికరాలను మరియు మందులు, ఇతర మెడికల్ పరికరాలను పంపించింది భారత్. వీటితో పాటు అత్యుత్తమ వైద్యులతో కూడిన వైద్య బృందాన్ని కూడా టర్కీకి పంపించింది. భూకంపం సంభవించిన 24 గంటల్లోనే టర్కీకి 100 మంది సభ్యులతో కూడిన రెండు ఎన్డీఆర్ఎఫ్ బృందాలను హుటాహుటిన పంపిన భారత ప్రభుత్వం.. ఆ తర్వాత టర్కీలో వరుస భూకంపాలు సంభవించటం.. అగ్ని ప్రమాదాలు సంభవించటంతో టర్కీకి కావాల్సిన అన్ని రకాల సాయాన్ని చేస్తూ వస్తోంది. ఈ మొత్తం ఆపరేషన్ కు ఆపరేషన్ దోస్త్ అని నామకరణం చేసింది భారత్.
సోమవారం తెల్లవారుజామున సంభవించిన భారీ భూకంపంతో టర్కీలో భారీ ఆస్తి, ప్రాణ నష్టం సంభవించగా.. ఆ తర్వాత కూడా సుమారు 48 గంటల పాటు 5 సార్లు భారీ భూకంపాలు టర్కీని అతలాకుతలం చేశాయి. సుమారు 125 సార్లు రిక్టర్ స్కేలుపై 4 తీవ్రతను మించిన ప్రకంపనలు సంభవించాయి. దేశవ్యాప్తంగా ఉన్న గ్యాస్ పైప్ లైన్లు ధ్వంసం కావటంతో చాలా చోట్ల అగ్ని ప్రమాదాలు సంభవించాయి. ఒకే సమయంలో దేశంలోనే వందలాది చోట్ల ప్రమాదాలు సంభవించటంతో రెస్క్యూ సిబ్బంది సంఖ్య ఏమాత్రం సరిపోలేదు. పరిస్థితి అదుపులోకి తెచ్చేందుకు చాలా శ్రమించాల్సి వస్తోంది. ఈ క్రమంలో ప్రపంచ దేశాలు తమ ఆర్మీని టర్కీ, సిరియా దేశాలకు సాయం అందించేందుకు పంపించాయి. శతృదేశమైనా సరే ఆపదలో ఉన్నప్పుడు ఆదుకోవాలన్న ఉద్దేశంతో భారత్ టర్కీకి మిగతా దేశాలను మించిన సాయం అందిస్తోంది. ఎప్పుడూ టర్కీకి వంతపాడే పాకిస్తాన్ మాత్రం నోరు తెరవటం లేదు. పైగా.. టర్కీకి సాయం అందించటానికి బయల్దేరిన భారత విమానాలు తమ దేశ గగనతలం గుండా వెళ్ళకూడదంటూ అడ్డుపడుతోంది పాకిస్తాన్.

చైనా నిఘా బెలూన్ వివాదం తీవ్రరూపం దాల్చుతోంది. యావత్ ప్రపంచం ఈ విషయంలో చైనాపై కన్నెర్ర చేస్తోంది. కొద్ది రోజుల క్రితం అమెరికా గగనతలంలో చైనాకు చెందిన అనుమానాస్ఫద బెలూన్ ప్రత్యక్షమైన విషయం తెలిసిందే. జనావాసాల మీదుగా ఎగురుతున్న ఈ బెలూన్ ను సముద్రం మీదకు రాగానే గత ఫిబ్రవరి 4న అమెరికా వైమానిక దళం కూల్చివేసింది. చెల్లాచెదురైన బెలూన్ భాగాలు సుమారు 11 కిలోమీటర్ల మేర సముద్రభాగంలో పడిపోయాయి. ప్రస్తుతం అమెరికాకు చెందిన ఎఫ్ బీ ఐ.. ఈ భాగాలను జాగ్రత్తగా సేకరించే పనిలో ఉంది. అయితే.. ఈ బెలూన్ ఖచ్చితంగా నిఘా బెలూనే అని అమెరికాకు స్టేట్ డిప్యూటీ సెక్రెటరీ వెండీ షెర్మన్ అమెరికా ప్రభుత్వానికి రిపోర్ట్ చేశాడు. అమెరికాతో పాటు 40 దేశాల ఎంబసీలకు ఈ బెలూన్ కు సంబంధించిన సమగ్ర వివరాలను అందజేశాడు. ఆయా దేశాలు తమ మిత్రదేశాలతో ఈ సమాచారాన్ని పంచుకోవాలని సూచించాడు.
షెర్మన్ రిపోర్ట్ లో చైనా బెలూన్ గురించి ఊహకు అందని విషయాలు ఉండటం గమనార్హం. చాలా సంవత్సరాలుగా చైనా ఇలాంటి నిఘా బెలూన్లతో అమెరికా, జపాన్, భారత్, తైవాన్ సహా చాలా దేశాల కదలికలను నిశితంగా గమనిస్తోందని రిపోర్టులో పేర్కొన్నాడు. దేశాలకు చెందిన అంతర్గత రహస్యాలతో పాటు సైన్యం కదలికలను చైనా ఎప్పటికప్పుడు స్పై బెలూన్ల ద్వారా సేకరిస్తోందన్నాడు. చైనాలోని హెయినాన్ ప్రావిన్స్ లో ఏర్పాటు చేసిన రహస్య స్థావరానికి ఈ బెలూన్ల నుంచి సేకరించిన సమాచారం వెళ్తోందనీ.. ఇక్కడే రహస్య సమాచారాన్ని విశ్లేషిస్తారనీ షెర్మన్ రిపోర్టులో పేర్కొన్నాడు. భారత్, అమెరికా, జపాన్, ఫిలిపీన్స్, తైవాన్ వంటి దేశాలకు చెందిన అత్యంత రహస్య సమాచారాన్ని ఈ స్పై బెలూన్ల ద్వారా చైనా దొంగిలించిందంటూ షెర్మన్ పేర్కొన్నాడు.
మరోవైపు అమెరికా ఈ విషయంపై చాలా కోపంగా ఉంది. అధ్యక్షుడు బైడెన్ చైనాకు సూటిగా హెచ్చరిక చేశాడు కూడా. అమెరికా తన సార్వభౌమత్వాన్ని కాపాడుకోటానికి ఏదైనా చేస్తుందని చెప్పాడు బైడెన్. చైనా తమకు వ్యతిరేకంగా రహస్య కార్యకలాపాలు చేస్తున్నదని నిర్ధారణ జరిగితే తీవ్ర పరిణామాలు ఎదుర్కోవాల్సి వస్తుందని.. ఈ విషయంలో అమెరికా ఏమాత్రం ఆలోచించబోదనీ గట్టి హెచ్చరిక జారీ చేశాడు. కూల్చివేయబడిన బెలూన్ లో వాడిన పరికరాలను అమెరికా నిఘా అధికారులు విశ్లేషిస్తున్నారు. ఈ భాగాలను చైనాకు తిరిగి ఇచ్చేది లేదని స్పష్టం చేసిన అధికారులు.. వాటిని ఎవరు తయారు చేశారు.. ఏ టెక్నాలజీ వాడారు అనే విషయాలను తేల్చే పనిలో ఉన్నారు.

బాలీవుడ్ ప్రేమ పక్షులు కియరా అధ్వానీ, సిద్ధార్థ్ మల్హోత్రా ఎట్టకేలకు వివాహ బంధంతో ఒక్కటయ్యారు. మంగళవారం సాయంత్రం వీరి వివాహ వేడుక రాజస్థాన్ జైసల్మేర్ లోని సూర్యగ్రహ్ ప్యాలెస్ లో ఘనంగా జరిగింది. కుటుంబ సభ్యులు, కొద్ది సంఖ్యలో బంధుమిత్రులు, కొంత మంది బాలీవుడ్ స్టార్ల మధ్య ఈ ప్రేమజంట ఒక్కటైంది. నిన్న రాత్రి సంగీత్ ఫంక్షన్ లో ఆడి పాడి సరదాలు తీర్చుకున్న కియరా, సిద్ధార్థ్.. మంగళవారం సాయంత్రం వేళ దాంపత్య జీవితంలోకి అడుగుపెట్టారు. కానీ ఇప్పటి వరకూ కియరా గానీ సిద్ధార్థ్ గానీ వివాహం గురించిన ఏ చిన్న విషయాన్నీ ఎక్కడా చెప్పనేలేదు.
పెళ్ళి తంతు ఎలాగూ పూర్తైంది కాబట్టి ఇప్పుడు వీరిద్దరూ సోషల్ మీడియా వేదికగా రిసెప్షన్ గురించి వివరాలు పోస్ట్ చేస్తారని బాలీవుడ్ టాక్. రిసెప్షన్ ఎక్కడ జరిగేది.. ఎవరెవరు అటెండ్ అయ్యేది.. ఇలాంటి వివరాలను వీరిద్దరూ కలిసి ఇన్ స్టా లో పోస్ట్ చేస్తారట. అలాగే.. పెళ్ళి తర్వాత సుమారు 70 కోట్లు విలువ చేసే కొత్త ఇంట్లో కొత్త కాపురం స్టార్ట్ చేస్తారని కూడా బాలీవుడ్ లో టాక్ నడుస్తోంది. లస్ట్ స్టోరీస్ సినిమాతో ఒకరితో ఒకరికి ఏర్పడిన పరిచయం ప్రేమకు దారితీయగా.. చాలా రోజులు వీరిద్దరి ప్రేమ వ్యవహారం గురించి చర్చ జరిగింది. మొత్తానికి యువ ప్రేమ జంట ఒక్కటైందన్నమాట.

ప్రపంచంలోనే అతిపెద్ద మెసేజింగ్ ప్లాట్ ఫామ్ వాట్సాప్ రోజుకో అప్డేట్ తో యూజర్లను సర్ ప్రైజ్ చేస్తోంది. కొత్త సంవత్సరంలో ఇప్పటికే కొన్ని కొత్త ఫీచర్లను అందుబాటులోకి తెచ్చిన వాట్సాప్.. ఫోటోలు షేర్ చేసుకోవాలనుకునే వాళ్ళ కోసం మరో అదిరిపోయే అప్డేట్ ఇచ్చింది. ఎవరికైనా మీడియా ఫైల్స్ షేర్ చేసుకోవాలంటే ఇప్పటి దాకా దానికి ఓ లిమిట్ ఉంది. కేవలం 30 ఫోటోలు, లేదా ఫైల్స్ షేర్ చేసుకోవచ్చు. ఇప్పుడు ఆ సంఖ్యను 100కు పెంచింది వాట్సాప్. అంటే ఒకే సారి 100 ఫైల్స్ షేర్ చేసుకోవచ్చు. రోజంతా సెల్ఫీలు తీసుకునే లేడీస్ బ్యాచ్ కు ఇది గుడ్ న్యూసే. ఏ పని చేసినా ఓ సెల్ఫీ తీసుకొని కొంత మంది స్టేటస్ అప్డేట్ పెట్టుకుంటారు.. మరి కొంత మంది గ్రూప్స్ లేదా కాంటాక్ట్స్ కి డైరెక్ట్ గా షేర్ చేసుకుంటారు. ఇలాంటి వారికి ఇది పనికొచ్చే అప్డేట్.
ఈ ఫీచర్ మీ వాట్సాప్ వర్షన్ లో కనిపించకపోతే ప్లే స్టోర్ నుంచి వాట్సాప్ 2.23.4.3 వర్షన్ డౌన్లోడ్ చేసుకుంటే సరిపోతుంది. ప్రస్తుతం ఇది ఆండ్రాయిడ్ యూజర్లకు మాత్రమే. త్వరలోనే ఐఫోన్ యూజర్లకు అందుబాటులోకి రానుంది.

దేశంలో వేగవంతమైన ప్రయాణం కోసం ఇప్పటికే వందే భారత్ రైళ్లను వివిధ మర్గాల్లో అధునాతన హంగులతో… దూర ప్రాంతాలకు ప్రారంభించింది కేంద్ర ప్రభుత్వం. ఇప్పుడు తాజాగా వందే భారత్ తరహాలో వందే మెట్రో రైళ్లను పట్టాలెక్కించేందుకు ప్రణాళికలు సిద్ధం చేస్తోంది భారత రైల్వే శాఖ. దేశంలో అత్యంత వేగవంతమైన ప్రయాణం చేయడానికి ప్రవేశపెట్టిన వందే భారత్ రైళ్లు పట్టాలెక్కేశాయి. కీలక మార్గాల్లో ప్రయాణికులను గమ్యస్థానాలకు చేరుస్తున్నాయి. రాబోయే రోజుల్లో దేశవ్యాప్తంగా మరిన్ని రూట్లలో వందే భారత్ ఎక్స్‌ప్రెస్ రైళ్లు అందుబాటులోకి రాబోతున్నాయి. వీటికి అదనంగా వందే భారత్ తరహాలోనే వందే మెట్రో సర్వీసులను కూడా తీసుకురాబోతోంది భారత రైల్వే శాఖ.
వందేభారత్ ఎక్స్‌ప్రెస్ రైళ్లకు అదనంగా వందేభారత్ తరహాలోనే వందే మెట్రో సర్వీసులను కూడా తీసుకురాబోతోంది ఇండియన్ రైల్వేస్. నగరాలకు సమీపంలో ఉన్న ప్రాంతాల నుంచి రాకపోకలు సాగించేందుకు వీలుగా ప్రయాణాన్ని సులభతరం చేసేందుకు కేంద్ర ప్రభుత్వం ఈ నిర్ణయం తీసుకుందని రైల్వే శాఖ మంత్రి అశ్విని వైష్ణవ్ తెలిపారు. వందే భారత్ ఎక్స్‌ప్రెస్ రైళ్లకి మినీ వెర్షనే ఈ వందే మెట్రో రైలు. ఈ ఏడాది చివరి నాటికి వందే మెట్రో డిజైన్, ప్రొడక్షన్ పూర్తి కానుంది. శివారు ప్రాంత ప్రజలను నగరాలతో కనెక్ట్ చేయడమే వందే మెట్రో సర్వీస్ లక్ష్యం. పెద్ద నగరాల చుట్టు పక్కల ప్రాంతాల్లో వందే మెట్రో సర్వీసులు తీసుకురానున్నారు. నగరాలకు రాకపోకలను సులభతరం చేసేందుకే వందే మెట్రో రైళ్లను ప్రారంభించనున్నామని, దీంతో తక్కువ సమయంలో గమ్యాన్ని చేరుకోవచ్చని మంత్రి పేర్కొన్నారు. వందే మెట్రో రూట్‌లో చిన్న స్టేషన్లు కవర్ కానున్నాయి. 60 – 70 కిలో మీటర్ల మధ్య ఉన్న పట్టణాల మధ్య ఈ వందే మెట్రో రైళ్లు అందుబాటులోకి రానున్నాయి. వీటి ఉత్పత్తికి సంబంధించి ఇంటిగ్రల్ కోచ్ ఫ్యాక్టరీకి రైల్వే శాఖ ఆదేశాలు జారీ చేసింది. ప్రస్తుతం హైదరాబాద్ నగరంలో మెట్రోల ద్వారా తక్కువ సమయంలో, తక్కువ చార్జీలతో లక్షలాదిగా వివిధ గమ్యస్థానాలకు చెరుస్తున్నారు.. దీనికి ఆదర్శంగా వస్తున్న వందే మెట్రో రైళ్లు ఎంతవరకు ఫలితాలు ఇస్తాయో చూడాలి.