bhalamedia.com

దేశవ్యాప్తంగా సంచలనం సష్టించిన గుజరాత్ గోద్రా అల్లర్ల కేసులో శనివారం ఉదయం గుజరాత్ హైకోర్టు కీలక నిర్ణయం తీసుకుంది. 2002లో జరిగిన ఈ అల్లర్ల పై ఇప్పటికీ పలు కేసులు విచారణలో ఉన్నాయి. ఈ అల్లర్లకు అసలు ఏమాత్రం సంబంధం లేని వారికి వ్యతిరేకంగా దొంగ సాక్ష్యాలు పుట్టించింది అంటూ సామాజిక కార్యకర్త అయిన తీస్తా సెతల్వాద్ ను పోలీసులు అరెస్టు చేశారు. ప్రస్తుత ప్రధానమంత్రి నరేంద్ర మోడీకి కూడా ఈ అల్లర్ల వెనుక ఉన్నారంటూ ఈమె సాక్ష్యాలు కోర్టుకు చూపించింది. అయితే.. ఈ సాక్ష్యాలు పుట్టించిన సాక్ష్యాలంటూ ఈమెపై కేసు నమోదు చేశారు సీబీఐ అధికారులు. ఇదే కేసులో అరెస్ట్ అయిన తీస్తా సెతల్వాద్ ఆ తర్వాత బెయిల్ పై విడుదలైంది. ప్రస్తుతం కూడా బెయిల్ పైనే ఉంది. అయితే.. తన బెయిల్ ను పొడగించాలంటూ ఈమె తరఫు లాయర్ వేసిన పిటిషన్ ను విచారించిన గుజరాత్ కోర్టు.. బెయిల్ ఇవ్వటం కుదరదనీ.. వెంటనే కోర్టు ఎదుట లొంగిపోవాలంటూ కీలక తీర్పునిచ్చింది. పిటిషన్ ను విచారించిన న్యాయమూర్తి నిజార్ దేశాయి.. తీస్తా బయట ఉంటే సాక్ష్యాలను మళ్ళీ తారుమారు చేయవచ్చన్న వాదనలో అంగీకరించారు. వెంటనే ఆమెను కోర్టు ఎదుట లొంగిపోవాలని.. ప్రస్తుతం ఉన్న బెయిల్ ను కూడా ఈ రోజుతో రద్దు చేస్తున్నామనీ తీర్పునిచ్చారు.

గత సంవత్సరం జూన్ 25న తీస్తా సెతల్వాద్ తో పాటు డీజీపీగా పనిచేసిన ఆర్బీ శ్రీకుమార్ లను కూడా గుజరాత్ పోలీసులు అరెస్టు చేసి జైళ్ళో వేశారు. ఆ తర్వాత సుప్రీంకోర్టుకు వెళ్ళిన సెతల్వాద్ 2022 సెప్టెంబర్ లో విడుదలై బెయిల్ పై ఉన్నది. గోద్రాలో అల్లర్లు జరిగిన సమయంలో ప్రస్తుత ప్రధాని మోడీ గుజరాత్ ముఖ్యమంత్రిగా ఉన్నారు. అయితే.. గోద్రా అల్లర్ల వెనుక అదృశ్య హస్తం గుజరాత్ ముఖ్యమంత్రి మోడీయేననీ అప్పటి డీజీపీ శ్రీకుమార్ తో కలిసి తీస్తా సెతల్వాద్ సాక్ష్యాలు పుట్టించింది. ముఖ్యమంత్రిపై వస్తున్న ఆరోపణలను నిజానిజాలు తేల్చాలంటూ సుప్రీంకోర్టు ఇచ్చిన ఆదేశాలతో అప్పటి సీబీఐ అధికారులు ఈ కేసును విచారించి.. తనకు ఉన్న అధికారాలతో డీజీపీ శ్రీకుమార్ మరియు తీస్తా సెతల్వాద్ దొంగ సాక్ష్యాలను పుట్టించారని తేల్చారు. దీంతో వీరిద్దరినీ గుజరాత్ పోలీసులు అరెస్టు చేశారు. ఆ తర్వాత చాలా రోజుల పాటు సాగిన సీబీఐ విచారణలో.. మోడీతో పాటు తీస్తా సెతల్వాద్ పేర్కొన్న ఎవ్వరికీ గోద్రా అల్లర్లతో ప్రమేయం లేదని తేల్చి క్లీన్ చిట్ ఇచ్చారు.

భారత విదేశాంగ శాఖక మంత్రి ఎస్.జైశంకర్ గురించి కొత్తగా పరిచయం అక్కర్లేదు. విదేశీ మీడియాకు చురకలంటించటం.. విదేశీ గడ్డపై భారత్ విమర్శించే వారికి నేరుగా ప్రతివిమర్శ చేయటం.. ఇందుకు సంబంధించిన వీడియోలు నిత్యం మనకు సోషల్ మీడియాలో కనిపిస్తూనే ఉంటాయి. ఇక ఆయన ఇంటర్వ్యూల సంగతి చెప్పాల్సిన అవసరమే లేదు.. ఆ ఇంటర్వ్యూలు చూస్తే చాలు.. ఎంతో ఇన్ఫర్మేషన్ దొరికిపోతుంది ప్రేక్షకులకు. భారత విదేశాంగ విధానాన్నే మార్చేశాడు జైశంకర్. అయితే.. ఇప్పుడు జైశంకర్ రాజ్యసభ సభ్యత్వం జూలై నెలతో పూర్తి కాబోతున్నది. దేశవ్యాప్తంగా మొత్తం 10 రాజ్య సభ స్థానాలకు ఎన్నికలు నిర్వహించనున్నారు. ఇప్పుడు రాజ్యసభ సభ్యత్వం ముగుస్తున్న వేళ.. వచ్చే ఎన్నికల్లో మళ్ళీ జైశంకర్ ను రాజ్యసభ సభ్యుడిగా మరోసారి విదేశాంగ శాఖ మంత్రిగా కొనసాగిస్తారా.. లేక ఎన్నికలు దగ్గర పడుతున్న వేళ మోడీ మంత్రి వర్గంలో మార్పులు ఏవైనా జరగబోతున్నాయా అనేది చర్చగా మారింది. ఈ రోజు ఉదయం ప్రధాని మోడీ మంత్రులతో ఉన్నత స్థాయి సమావేశం నిర్వహించగా.. క్యాబినెట్లో మార్పులపై చర్చించేందుకే ఈ సమావేశం జరిగిందన్న ఊహాగానాలు వెలువడ్డాయి. ఈ నేపథ్యంలోనే జైశంకర్ గురించి కూడా మీడియా సంస్థలు కథనాలు ప్రసారం చేశాయి.

భారతదేశ విదేశాంగ శాఖ మంత్రిగా సుబ్రమణ్యం జైశంకర్ 2019లో బాధ్యతలు స్వీకరించాడు. అంతకు ముందు విదేశాంగ కార్యదర్శిగా అనేక దేశాల్లో పనిచేశాడు జైశంకర్. మంత్రి పదవి చేపట్టక ముందు 2015 నుంచి 2018 వరకు ఫారిన్ సెక్రెటరీగానూ, 2013 నుంచి 2015 వరకూ అమెరికాలో భారత అంబాసిడర్ గానూ, 2009 నుంచి 2013 వరకూ చైనాలో ఇండియన్ అంబాసిడర్ గా.. ఇలా చాలా హోదాల్లో పనిచేశాడు జైశంకర్. చైనాలో పనిచేసిన రోజుల్లోనే అక్కడే చైనా యువతి క్యోకోను ప్రేమించి పెళ్ళి చేసుకున్నాడు. చైనాలో పనిచేసిన అనుభవంతోనే చైనా మీడియాకు చైనా భాష మాండరిన్ లోనే సమాధానం చెప్పి వార్తల్లోకెక్కాడు. ఒక ఫారిన్ డిప్లొమాట్ విదేశాంగ శాఖ మంత్రిగా పనిచేస్తే ఎలా ఉంటుందో చేసి చూపించాడు ఈయన. అంతర్జాతీయ వేదికలపై తరచూ భారతదేశాన్ని విమర్శించే విదేశీ మీడియాకు సమాాధానం చెప్పలేక దాటవేసే వాళ్ళు మన పూర్వపు విదేశాంగ శాఖ మంత్రులు.

ఒకప్పుడు మీడియా భారత మంత్రులను ప్రశ్నలతో ఉక్కిరిబిక్కిరి చేసేది. కానీ, జైశంకర్ వచ్చిన తర్వాత భారత విదేశాంగ విధానంతో పాటు విదేశీ మీడియాతో నడక కూడా మారింది. విదేశీ మీడియా ప్రతినిథుల ప్రశ్నకు ఘాటుగా సమాధానం చెప్పి.. వాళ్ళు సమాధానం చెప్పలేని నాలుగు ప్రశ్నలను ఎదురు సంధిస్తాడు జైశంకర్. ఈ మధ్య జైశంకర్ ను ప్రశ్నించేందుకు విదేశీ మీడియా వెనుకాడుతోంది.. ముఖ్యంగా యూరప్ మీడియా. మరి ఇలాంటి మంత్రిని మళ్ళీ రాజ్యసభ సభ్యత్వం ఇవ్వటం ద్వారా కొనసాగిస్తారా అంటే ఖచ్చితంగా కొనసాగిస్తారనే సమాధానమే వినిపిస్తోంది. ఇంత కాలం అద్భుత పనితీరుతో మెప్పించిన జైశంకర్ కు మరోసారి రాజ్యసభ సభ్యత్వంతో పాటు ఇదే విదేశాంగ మంత్రి పదవిని మోడీ కానుకగా ఇస్తారని మీడియా కథనాలు చెప్తున్నాయి. కానీ.. ఎన్నికలు దగ్గర పడుతున్న వేళ.. మోడీ జైశంకర్ కు ఏదైనా కీలకమైన టాస్క్ అప్పగించే అవకాశాలు కూడా ఉన్నాయని తెలుస్తోంది. ఏది ఏమైనా కొద్ది రోజుల్లో ఈ ప్రశ్నకు సమాధానం లభిస్తుంది.

జాతుల మధ్య వైరంతో మణిపూర్ రాష్ట్రం రావణకాష్టంలా రగులుతున్న విషయం తెలిసిందే. రాష్ట్రం మొత్తం ప్రస్తుతం పోలీసులు, ఆర్మీ అదుపులో ఉంది. ఎక్కడ చూసినా కత్తులు, ఏకే 47 తుపాకులతో జనం కాల్పులకు తెగబడుతున్నారు. ఇలాంటి సమయంలో కాంగ్రెస్ అగ్రనేత రాహుల్ గాంధీ మణిపూర్ లో పర్యటించేందుకు వెళ్ళారు. తొలుత హెలీకాప్టర్ లో మణిపూర్ కు వెళ్ళనున్నట్టు చెప్పిన రాహుల్.. ఆ తర్వాత రోడ్డు మార్గం ద్వారా మణిపూర్ లోని ఇంఫాల్ కు చేరుకునే ప్రయత్నం చేశారు. ఇంఫాల్ కు 20 కిలోమీటర్ల దూరంలో పోలీసులు రాహుల్ గాంధీ కాన్వాయ్ ను అడ్డుకున్నారు. ముందుకు వెళ్ళే పరిస్థితులు లేవని చెప్పిన పోలీసులు.. రాహుల్ కాన్వాయ్ తో సహా తిరిగి వెళ్ళిపోవాలని ఆదేశించారు. దీంతో అక్కడ కాస్త గందరగోళ పరిస్థితులు ఏర్పడ్డాయి. చాలా సేపు పోలీసులతో మాట్లాడిన రాహుల్.. చివరకు ఇంఫాల్ ఎయిర్ పోర్టుకు తిరిగి వెళ్ళిపోయారు. ఉద్రిక్త పరిస్థితులు ఉన్న మణిపూర్ రాష్ట్రంలో రాహుల్ పర్యటించాలని చూడటం సరికాదంటూ బీజేపీ నేతలు ఫైర్ అయ్యారు. అల్లర్లను, సంఘర్షణలను కూడా కాంగ్రెస్ నేతలు రాజకీయాలకు వాడుకోవాలని చూస్తోందని బీజేపీ నేతలు మండిపడ్డారు.

మణిపూర్ లో ఉంటున్న కుకీ,నాగా, మెతీ తెగల ప్రజల మధ్య తీవ్ర ఘర్షణలు జరగడం వల్ల చివరికి కర్ఫ్యూ విధించాల్సిన పరిస్థితి ఏర్పడింది అక్కడ. వేర్వేరు తెగల వారికి వేర్వేరు చట్టాలు అమలు చేయటమే ఈ సమస్యకు మూలం. కుకీ తెగ వాళ్ళను పొరుగున ఉన్న మణిపూర్ వేర్పాటు వాదులు రెచ్చగొట్టి అల్లర్లకు ఎగదోస్తున్నారు. మణిపూర్ ను అల్లకల్లోలం చేయటమే లక్ష్యంగా కుకీ తెగ వారికి ఏకే 47 తుపాకులను, గ్రెనేడ్ లను సప్లై చేస్తున్నారు మయన్మార్ తీవ్రవాదులు. ఎన్ని రోజులుగా ప్రయత్నించినా మణిపూర్ లో పరిస్థితి సద్దుమణగటం లేదు. ఒక్క నిముషం పాటు పోలీసులు, ఆర్మీ కళ్ళు మూసుకున్నా మళ్ళీ రణరంగంగా మారుతుంది మణిపూర్. ఈ నేపథ్యంలో రాహుల్ గాంధీ మణిపూర్ లో పర్యటించాలని వెళ్ళటం వివాదాన్ని మరింత పెంచటమే అవుతుందని బీజేపీ నేతలు అంటున్నారు. ఇంకా రాహుల్ ఇంఫాల్ లోనే ఉన్నాడు. వీలైతే హెలీకాప్టర్ లో మణిపూర్ లో పర్యటించాలని అనుమతుల కోసం ప్రయత్నిస్తున్నాడు.

కర్ణాటక కాంగ్రెస్ ప్రభుత్వానికి అప్పుడే కష్టాలు మొదలైనట్టు కనిపిస్తున్నది. గెలిచి ముచ్చటగా మూడు నెలలైనా కాకముందే కర్ణాటక పాలకులకు చుక్కలు కనిపిస్తున్నాయి. కాంగ్రెస్ అధికారంలోకి రావటానికి ప్రధాన కారణాలైన గ్యారంటీ హామీలు.. సిద్దరామయ్య ప్రభుత్వం మెడకు ఉరి తాడే బిగుస్తున్నాయి. తాజాగా.. అన్నభాగ్య పథకం ద్వారా ప్రజలకు అందజేయాల్సిన బియ్యం విషయంలో కర్ణాటక ప్రభుత్వానికి పెద్ద ఎదురుదెబ్బ తగిలింది. ప్రజలకు సరిపడా పంపిణీ చేసేందుకు బియ్యం సేకరించే ప్రయత్నాలు చేయగా.. అందుకు కావాల్సినంత మోతాదులో బియ్యం దొరకటం లేదు. దీంతో బియ్యం బదులు కిలోకు 34 రూపాయల చొప్పున లబ్ధిదారులకు బ్యాంకు అకౌంట్లో వేస్తామంటూ పథకంలో మార్పులు తీసుకొచ్చింది సిద్దరామయ్య సర్కార్. కుటుంబ సభ్యుల సంఖ్యను బట్టి కిలోకు 34 రూపాయల చొప్పున డబ్బులు బ్యాంకు ఖాతాలో ప్రతీ నెలా జమ చేస్తామని చెప్తున్నాడు సీఎం సిద్దరామయ్య.

అన్నభాగ్య పథకం సంగతి పక్కనపెడితే మిగతా గ్యారంటీ పథకాలు కూడా కర్ణాటక సర్కార్ కు గుదిబండలా పరిణమిస్తున్నాయి. పెళ్ళి అయిన ప్రతి మహిళకు ప్రతీ నెలా 2 వేల రూపాయలు అందజేస్తామని హామీ ఇచ్చింది కాంగ్రెస్ పార్టీ. తీరా చూస్తే ఇది ఎంత ఖర్చుతో కూడుకున్న వ్యవహారమో ఇప్పుడు అర్థమైంది కాంగ్రెస్ కు. ప్రతి నెలా కోట్లాది రూపాయలు ఇస్తూ పోతే ఆరు నెలల్లో కర్ణాటక దివాలా తీయటమే. ఐదేళ్ళలో కర్ణాటక అప్పుల కుప్పగా మారటం ఖాయం. ఇక రెండు వందల యూనిట్ల ఫ్రీ కరెంటు విషయంలో కర్ణాటక ప్రజల కక్కుర్తి మామూలుగా లేదు. ఎన్ని యూనిట్లు వాడినా సరే కరెంటు బిల్లు మాత్రం కట్టేదే లేదంటూ భీష్మించుకొని కూర్చున్నారు జనం. బిల్లు వసూలు చేసేందుకు కరెంటు అధికారులు జనం ఇళ్ళకు వెళ్తే ఏకంగా చెప్పులతో కొట్టేస్తున్నారు. ప్రతీ మహిళకు ఉచిత బస్సు ప్రయాణం అనే స్కీమ్.. మరీ దారుణం. ఎక్కడ ఏ బస్సు కనిపిస్తే ఆ బస్సు ఎక్కేస్తున్నారు.. దిగమంటే డ్రైవర్లను చితకబాదుతున్నారు కర్ణాటక మహిళలు. కేవలం గ్యారంటీ పథకాల హామీల వల్లనే కర్ణాటకలో కాంగ్రెస్ ప్రభుత్వం అధికారం సంపాదించిందనే విషయం అందరికీ తెలిసిందే. కాంగ్రెస్ పార్టీకి అధికారం లోకి రావటానికి దోహదం చేసిన అవే పథకాలు ఇప్పుడు ప్రభుత్వం పాలిట శాపంగా మారాయి.

ఉచితాలు దేశాన్ని నాశనం చేస్తాయనీ.. ఎన్నికల వేళ ఉచితాల హామీలు ఇవ్వటం సరికాదనీ బీజేపీ సర్కార్ నొక్కి చెప్తే.. లోకల్ పార్టీలు బీజేపీపై మండి పడ్డాయి. రైతులకు ఫ్రీ కరెంటు, విద్యార్థులకు ఫీజు రీఅంబర్స్ మెంట్.. ఇలాంటివైతే మంచిదే.. కానీ అన్నీ ఫ్రీగా ఇచ్చేస్తాం.. మీరు ఇంట్లో కూర్చొండి అని చెప్పటం ఎంత తప్పో కర్ణాటక సీన్ చూస్తే అర్థం చేసుకోవచ్చు. జనానికి విద్య, వైద్యంలాంటివి ఫ్రీగా ఇవ్వాలి.. అది ప్రభుత్వం బాధ్యత..! కానీ నెలకు 2 వేలు ఖర్చులకు ఇచ్చేస్తాం.. కరెంటు బిల్లు మాఫీ చేసేస్తాం.. బస్సులో ఫ్రీగా తిప్పేస్తామని చెప్తే ఇలాగే ఉంటుంది. ఏది ఏమైనా.. గ్యారంటీ హామీల ఎఫెక్ట్ ఇప్పుడే మొదలైంది సిద్దరామయ్య సర్కార్ కు.. రాను రాను ఇది కాంగ్రెస్ ను ఎక్కడికి తీసుకెళ్తుందో చూడాలి.