bhalamedia.com

ఖలిస్తాన్ వేర్పాటు వాద అంశాన్ని మరోసారి తెరపైకి తెచ్చుకొని తనకు తాను విప్లవకారుడిగా ప్రకటించుకున్న అమృత్ పాల్ సింగ్ దేశవ్యాప్తంగా సంచలనం సృష్టించిన విషయం తెలిసిందే. పోలీసు వ్యవస్థకే సవాల్ విసిరిన అమృత్ పాల్ సింగ్ మరియు అతని అనుచరులను ఎట్టకేలకు పంజాబ్ పోలీసులు కేంద్ర బలగాలతో కలిసి అరెస్ట్ చేసేందుకు ప్రయత్నించగా.. చివరి క్షణంలో అమృత్ పాల్ సింగ్ తప్పించుకొని పారిపోయాడు. పంజాబ్ రాష్ట్రం మొత్తం వంద కార్లు, వేలాది మంది పోలీసులు జల్లెడపట్టినప్పటికీ అతని ఆచూకీ తెలియటం లేదు. ఇప్పటికే సరిహద్దులు దాటి నేపాల్ గుండా కెనడాకు అమృత్ పాల్ సింగ్ తప్పించుకొని పారిపోయి ఉంటాడని భావిస్తున్నారు. అయినా సరే పోలీసులు సెర్చ్ ఆపరేషన్ ఆపటం లేదు.
పంజాబ్ లో శాంతి భద్రతలకే శరాఘాతంగా మారిన అమృత్ పాల్ సింగ్ ను పోలీసులు చూస్తూ ఊరుకున్నారే తప్ప ఏమీ చేయలేకపోయారు. తన అనుచరుడిని పోలీసులు అరెస్ట్ చేస్తే ఏకంగా పోలీస్ స్టేషన్ పైనే దాడి చేసి ఎఫ్ఐఆర్ కాపీని చించేసి.. తన అనుచరులను విడిపించుకొని పోయినా పోలీసులు కనీసం అడ్డుకునే ధైర్యం చేయలేదు. దీంతో కేంద్ర హోంశాఖ దీనిపై దృష్టి పెట్టింది. అమృత్ పాల్ సింగ్ ను అరెస్ట్ చేయకపోతే పంజాబ్ లో రాష్ట్రపతి పాలన విధించాల్సి ఉంటుందంటూ కేంద్ర హోంమంత్రి అమిత్ షా పంజాబ్ సీఎం భగ్వంత్ సింగ్ మాన్ ను హెచ్చరించి.. చివరికి 18 కంపెనీల కేంద్ర బలగాలను దించి.. అమృత్ పాల్ పై దాడి చేశారు. కానీ.. పోలీసుల దాడిని ముందే పసిగట్టిన అమృత్ పాల్ పారిపోయాడు. అతడి అనుచరులు సుమారు 120 మందిని పోలీసులు అరెస్ట్ చేశారు.

నోబెల్ పీస్ ప్రైజ్.. ప్రపంచంలోనే అత్యున్నత పురస్కారం. ఈ పురస్కారానికి నామినేట్ కావడమే ఓ చరిత్ర. ఇక సొంతం చేసుకున్నవారి పేరు హిస్టరీలో నిలిచిపోతుంది. అలాంటి నోబెల్‌ పీస్ ప్రైజ్ ఈసారి భారత ప్రధాని మోడీకి దక్కబోతుందనే చర్చ జోరందుకుంటుంది. దీనికి కారణం నార్వే నోబెల్ కమిటీ సభ్యులు ఇస్తున్న హింట్సే. ఇటీవల భారత్‌లో పర్యటించిన కమిటీ సభ్యులు ప్రపంచ అత్యున్నత పురస్కారం మోడీకి కాక మరెవరికి అని ఇంట్రెస్టింగ్ కామెంట్స్ చేశారు. ఇదే ప్రపంచ వ్యాప్తంగా చర్చకు కారణమైంది.
పెద్దన్న హోదా అంటే నచ్చనివారిని పబ్లిక్‌గా విమర్శించడం, మెచ్చేవారిని పక్కన పెట్టుకోవడం కాదు. ప్రపంచ శాంతిని దృష్టిలో పెట్టుకుని వ్యూహాత్మకంగా ముందుకెళ్లడం. ఆ పని చేయడంలో అమెరికా ఎప్పుడో విఫలమైంది. పైగా ఉక్రెయిన్-రష్యాలను తన్నుకుచావండని ఎంకరేజ్ చేసి ప్రపంచం మొత్తానికీ శాపంగా మారింది. అదే అమెరికా స్థానంలో ఇండియా ఉంటే ఏం జరిగుండేదో అనే చర్చ ఇటీవలికాలంలో జోరుగా సాగుతోంది. దీనికి కారణం భారత విదేశాంగ విధానాలే. ప్రపంచ ఉద్రిక్తతలపై ప్రధాని మోడీ నిత్యం చెప్పే మాట ఒక్కటే డైలాగ్ అండ్ డిప్లమసీ. వీటితో మాత్రమే ప్రపంచ శాంతి లభిస్తుందని చాలా సందర్భా ల్లో మోడీ ప్రకటించారు. ఉక్రెయిన్-రష్యా మధ్య యుద్ధంపైనా అంతర్జాతీయ వేదికలపై ఇదే అంశాన్ని ప్రస్తావించి ప్రపంచ దేశాల అటెన్షన్ సాధించారు. గతేడాది సమర్‌కండ్‌లో జరిగిన ఎస్‌సీఓ సమ్మిట్‌లో ఏకంగా పుతిన్‌తో సమావేశంలోనే ఇది యుద్ధ యుగం కాదన్న మోడీ కామెంట్‌కు ప్రపంచమే సెల్యూట్ చేసింది. ఆ క్షణం నుంచి అమెరికా స్థానంలో భారత్ ఉండుంటే ప్రపంచానికి ఈ పరిస్థితి వచ్చుండేది కాదనే చర్చలు జరుగుతూనే ఉన్నాయి. ఇప్పుడు ప్రపంచ శాంతి పురస్కారం నోబెల్ వార్తలతోనూ మరోసారి అలాంటి చర్చలే షురూ అయ్యాయి.
ఇటీవలే నోబెల్ బహుమతి కమిటీ బృందం నార్వే నుంచి భారత్‌కు వచ్చింది. నోబెల్ శాంతి బహుమతి విజేతను నిర్ణయించే ఈ కమిటీ డిప్యూటీ ఛైర్మన్ అస్లే టోజే ప్రధాని నరేంద్ర మోడీని ప్రశంసించారు. ప్రధాని మోడీ లాంటి శక్తివంతమైన నేతకు ప్రపంచంలో శాంతిని నెలకొల్పే అద్భుతమైన సామర్థ్యం ఉందని కితాబు ఇచ్చారు. మోడీ లాంటి నేత శాంతిని పెంపొందించడంలో కీలక పాత్ర పోషించగలరని నమ్ముతున్నట్లు అస్లే టోజే అన్నారు. నోబెల్ శాంతి బహుమతి విషయంలో ఇండియా నుంచి అధిక సంఖ్యలో నామినేషన్లు అందుతున్నాయన్నారు. ప్రపంచంలోని ప్రతిదేశ అగ్రనేతలు శాంతి కోసం అవసరమైన కృషి చేస్తారని ఆశిస్తున్నట్లు చెప్పారు. భారత ప్రధాని మోడీ లాంటి వ్యక్తిపై ప్రపంచ వ్యాప్తంగా నమ్మకం ఉందన్నారు. ప్రపంచ వ్యాప్తంగా శాంతిని నెలకొల్పడంలో మోడీ కీలకపాత్ర పోషిస్తారు, ఆయనకు ఆ సత్తా ఉందని అస్లే టోజే కీలక వ్యాఖ్యలు చేశారు. పెద్ద యుద్దాలను సైతం మోడీ తన నాయకత్వ ప్రతిభ, విశ్వసనీయతతో ఆపడానికి ప్రయత్నిస్తారని ఆశాభావం వ్యక్తం చేశారు.
మరోవైపు.. యుద్ధం ముఖ్యం కాదని భవిష్యత్తు అంతా శాంతితో ఉండాలని రష్యా, అమెరికా, చైనా లాంటి దేశాల అధినేతలతో ప్రధాని మోడీ చర్చలు జరిపారని అస్లే టోజే గుర్తుచేశారు. ప్రపంచంలో శాంతిని నెలకొల్పడానికి భారత్ చేస్తున్న ప్రయత్నాలను అభినందించారు. ఇండియాను చూసి ప్రపంచ దేశాలు ఎంతో నేర్చుకోవాలని, త్వరలోనే భారత్ సూపర్ పవర్‌గా అవతరించడం ఖాయమని ధీమా వ్యక్తం చేశారు. అస్లే టోజే ఈ వ్యాఖ్యలతోనే నోబెల్ శాంతి బహుమతి రేసులో ప్రధాని మోడీ గట్టిపోటీ ఇస్తారన్న చర్చ మొదలైంది. అయితే, నోబెల్ ప్రైజ్ కమిటీ డిప్యూటీ లీడర్.. మోడీకి నోబెల్ అందుకునే అర్హత ఉందని హింట్స్ ఇవ్వడానికి ఉక్రెయిన్-రష్యా యుద్ధంపై భారత వైఖరి ఒక్కటే కారణం కాదు. ప్రపంచానికి మోడీ సర్కార్ అంతకుమించి ఎంతో సాయం చేసింది. ప్రపంచం శాంతిని, స్నేహాన్ని కోరుకోవడంలో ప్రధాని మోడీ ఎప్పుడూ ముందుంటారు. కరోనా మహమ్మారిని తరిమి కొట్టి దేశాన్ని ఆర్థిక సంక్షోభంలో పడనీయకుండా కాపాడారు. అదే సమయంలో చాలా దేశాలకు కోవిడ్ టీకాలు అందించి ఆపద్భాంధవుడిగా నిలిచారు. ఇక ప్రకృతి వైపరీత్యాలతో విలవిల్లాడిన దేశాలకు కూడా తన మన అనే బేధాలు లేకుండా కొండంత అండగా నిలిచారు. ఇటీవల తుర్కియేకు చేసిన సాయమే దీనికి ఉదాహరణ. ఇలా ప్రపంచ శాంతి కోసం నిత్యం కృషి చేస్తున్న లీడర్‌గా అంతర్జాతీయంగా మోడీ మంచి పేరు తెచ్చుకున్నారు. అందుకే నోబెల్ ప్రైజ్ కమిటీ డిప్యూటీ లీడర్ సైతం ఇలాంటి వ్యాఖ్యలు చేశారనే విశ్లేషణలు వినిపిస్తున్నాయి.
భారత ప్రధాని మోడీని నోబెల్ వరిస్తుందా లేదా అనేది కాస్త పక్కనపెడితే.. ఈ ప్రతిష్టాత్మక పురస్కారంపై మరో దేశాధినేత కన్నేసినట్టు కనిపిస్తోంది. గతేడాది ఎస్‌సీఓ సమ్మిట్‌లో ప్రధాని మోడీ ఇది యుద్ధ యుగం కాదన్న తర్వాత.. తనకు అలవాటులేని శాంతి రాగం అందుకున్నారు చైనా అధ్యక్షుడు జిన్‌పింగ్. ఎలాంటి ప్రయోజనం లేకుండా జిన్‌పింగ్‌ ఏ పనీ చేయరనే అపవాదు ఉంది. అలాంటి వ్యక్తి ప్రపంచ శాంతికి కృషి చేస్తానని ప్రకటించడం ఏంటన్నదే అసలు ప్రశ్నంతా. వాస్తవానికి.. అంతర్జాతీయంగా జిన్‌పింగ్‌‌కు మంచి గుర్తింపు లేదు. కోవిడ్ తర్వాత చైనా అంటే ఓ డేంజర్ కంట్రీ అనేంతగా పరిస్థితులు మారిపోయాయి. దీనికితోడు తైవాన్‌తో పాటూ పొరుగు దేశాలపై కవ్వింపులు కూడా ఎక్కువయ్యాయి. ఫలితంగా చైనాకు ప్రపంచ విలన్‌గా గుర్తింపు వచ్చింది.దీని ప్రభావం క్రమంగా ఆ దేశ ఆర్ధిక వ్యవస్థపైనా పడుతోంది. ఇలాంటి సమయంలో జిన్‌పింగ్ తన పీస్ కామెంట్లతో ప్రపంచం దృష్టిని ఆకర్షించే ప్రయత్నం చేస్తున్నారు. ఇందులో భాగంగానే ఎన్నో ఏళ్లుగా బద్ధ శత్రువులుగా ఉంటున్న సౌదీ అరేబియా, ఇరాన్‌ మధ్య దౌత్య సంబంధాలు తిరిగి పట్టాలెక్కేలా జిన్‌పింగ్ పావులు కదిపారు. ఇప్పుడు ఉక్రెయిన్-రష్యా మధ్య శాంతికి కృషి చేస్తామని ప్రచారం చేసుకుంటున్నారు. ఈ పరిణామాల ద్వారా ప్రపంచ శాంతికి కృషి చేస్తున్న ఏకైక లీడర్‌గా తనను తాను ప్రొజెక్ట్ చేసుకునే ప్రయత్నాలు చేస్తున్నట్టుగా కనిపిస్తోంది. అయితే, సౌదీ అరేబియా, ఇరాన్‌ను కలిపినంత ఈజీగా ఉక్రెయిన్-రష్యా యుద్ధానికి చెక్ పెట్టడం సాధ్యం కాదు. ఇదే సమయంలో ఈ రెండు అంశాలతోనే జిన్‌పింగ్ ప్రపంచ శాంతి స్థాపకులు అయిపోరు. నోబెల్ శాంతి పురస్కారం వరకూ వెళ్లే సీన్ అసలే ఉండకపోవచ్చు.
జిన్‌పింగ్‌‌ పీస్ డ్రామాను కాస్త పక్కనపెడితే.. మోడీకి నోబెల్ ఛాన్సెస్ మెండుగా ఉన్నాయనే వార్త కాషాయ శ్రేణుల్లో కావాల్సినంత జోష్ నింపుతోంది. అయితే, ఈ వార్తలపై ప్రతిపక్ష పార్టీలు మాత్రం మోడీకి నోబెల్ అందుకునే అంత సీన్ లేదని విమర్శిస్తున్నాయి. అయితే, గతంలోనూ మోడీకి నోబెల్ డిమాండ్లు బలంగా వినిపించాయి. అంతర్జాతీయ యోగా దినోత్సవం, ఇంటర్నేషనల్ సోలార్ అలయన్స్ వంటి అనేక కార్యక్రమాల ద్వారా ఆర్థిక వృద్ధిని ప్రోత్సహించడంలో, పేదరికాన్ని తగ్గించడంలో అంతర్జాతీయ సంబంధాలను మెరుగుపరచడంలో మోడీ చేసిన కృషికి ప్రతిష్టాత్మక అవార్డు పొందే అర్హత ఉందని చాలా మంది వాదించారు. ఇక.. 2018లో అంతర్జాతీయ సహకారానికి, ప్రపంచ ఆర్ధిక వృద్ధిని పెంపొందించడానికి చేసిన కృషికి ప్రతిష్టాత్మక సియోల్ శాంతి బహుమతి మోడీని వరించింది. అప్పటికి 28 సంవత్సరాలలో ఈ అవార్డును అందుకున్న మొదటి భారతీయుడిగా మోడీ నిలిచారు.
ఈ ప్రతిష్టాత్మక పురస్కారాన్ని 2002లో అమెరికా మాజీ అధ్యక్షుడు జిమ్మీ కార్టర్‌, 2009లో అమెరికా మాజీ అధ్యక్షుడు బరాక్ ఒబామా అందుకున్నారు. 2001లో ఐక్యరాజ్యసమితి, ప్రధాన కార్యదర్శి కోఫీ అన్నన్, 2012లో యూరోపియన్ యూనియన్, 2014లో భారత బాలలహక్కుల ఉద్యమకారుడు కైలాష్ సత్యార్థి, పాకిస్తాన్‌కు చెందిన మలాలా యూసఫ్‌జాయ్‌‌లను ప్రతిష్టాత్మక శాంతి బహుమతి వరించింది. మదర్ థెరిసా మానవ సేవకు గాను 1979లో నోబెల్ శాంతి పురస్కారాన్ని అందుకున్నారు. ఇక అన్ని అనుకూలిస్తే.. ఈ ఏడాది భారత పీఎం మోడీ కూడా నోబెల్‌ శాంతి పురస్కారం అందుకుంటారు అనే ప్రచారం జోరుగా సాగుతోంది. అదే జరిగితే భారత కీర్తి విశ్వవ్యాప్తం కావడంతోపాటూ ప్రపంచానికి మార్గనిర్దేశం చేసే స్థానంలో ఇండియా నిలుస్తుందనే చర్చ జరుగుతోంది. మరి నిజంగానే మోడీని నోబెల్‌ శాంతి బహుమతి వరిస్తుందేమో చూడాలి.

ఎల్ సాల్వెడార్.. ఈ లాటిన్ అమెరికా దేశం క్రైమ్‌కు కేరాఫ్ అడ్రస్. 65 లక్షల జనాభా, వేలల్లో జరిగే క్రైమ్స్, లక్షల సంఖ్యలో క్రిమినల్స్. చీకటిపడిందంటే కత్తులు నెత్తురు చిందిస్తాయి. తుపాకులు అమాయకుల ప్రాణాలు తీసేస్తాయి. సిల్లీ రీజన్లతో సీరియస్‌గా మర్డర్లు జరుగుతాయి. సింపుల్‌గా చెప్పాల్సి వస్తే.. భూమ్మీద ప్రత్యక్ష నరకం చూడాలని ఎవరైనా ఆశపడితే ఎల్ సాల్వెడార్‌కు వెళితే సరిపోతుంది. అది కూడా తిరిగొద్దామనే ఆలోచన లేకపోతేనే. అలాంటి క్రిమినల్ హిస్టరీ ఉన్న ఎల్‌ సాల్వెడార్‌ ఓ గ్యాంగ్‌స్టర్‌కు విధించిన శిక్షతో టాక్ ఆఫ్ ది వరల్డ్‌గా మారిపోయింది. ఆ క్రిమినల్‌కు ఎన్నేళ్ల జైలు శిక్ష విధించారో తెలుసా? అక్షరాలా 13వందల 10 సంవత్సరాలు. వినడానికి కాస్త విచిత్రంగా ఉన్నా ఇదే నిజం.
కేవలం 65లక్షల జనాభా ఉండే ఈ దేశంలో క్రిమినల్స్ సంఖ్య ఎంతో తెలుసా? అక్షరాలా లక్షా 50వేలు. అదికూడా అంచనా మాత్రమే. అంతకుమించి ఉంటారనేందుకు ఇటీవల అరెస్టవుతున్న క్రిమినల్స్ సంఖ్యే తేల్చేస్తోంది. అలా అరెస్ట్ అయిన వారిలో ఓ గ్యాంగ్‌స్టర్‌కు విధించిన జైలు శిక్ష ఇప్పుడు ప్రపంచ వ్యాప్తంగా చర్చనీయాంశం అవుతోంది.ఇక్కడ కనిపిస్తున్న వ్యక్తి ఎల్ సాల్వెడార్‌లోనే మోస్ట్ వాంటెడ్.పేరు విల్మేర్‌ సెగోవియా. ఇతడి క్రిమినల్ యాక్టివిటీస్ తెలిస్తే నిలువునా వణుకుపుట్టడం ఖాయం. 33 మందిని నిర్ధాక్షిణ్యంగా చంపేశాడు. మరో తొమ్మిది మంది హత్యకు కుట్రలు పన్నాడు. దొమ్మీలూ, దోపిడీల గురించయితే ఎంత తక్కువ మాట్లాడుకుంటే అంత మంచిది. మాదకద్రవ్యాల చీకటి ప్రపంచంలో ఇతడు సృష్టించిన అలజడి అంతా ఇంతా కాదు. అందుకే ఈ ప్రమాదకర గ్యాంగ్‌స్టర్‌కు ఎల్ సాల్వెడార్‌ న్యాయస్థానం ఏకంగా 1310 ఏళ్ల జైలు శిక్ష విధించింది. ఈ నరహంతకుడు మారా సాల్వట్రుచ గ్యాంగ్‌కు చెందిన షల్టన్‌ సెల్‌ సభ్యుడు. ఈ గ్యాంగ్‌ ఎల్‌ సాల్వెడార్‌లో ఎన్నో క్రూరమైన నేరాలకు పాల్పడింది. ఈ గ్యాంగ్‌నే ఎంఎస్-13 అని కూడా పిలుస్తారు.
ఇతగాడి క్రిమినల్ హిస్టరీ ఎలా ఉన్నా ఒక నేరస్తుడికి ఏకంగా 13 శతాబ్దాలకుపైగా శిక్ష విధించడం మాత్రం ప్రపంచాన్నే ఆశ్చర్యపరుస్తోంది. అయితే, ఎల్ సాల్వెడార్‌లో ఇలాంటి భారీ శిక్షలు విధించడం కొత్తేం కాదు. విల్మేర్‌ సెగోవియా కంటే ముందే మరో గ్యాంగ్‌స్టర్‌కు ఈ తరహా జైలు శిక్ష విధించింది ఎల్ సాల్వెడార్ కోర్టు. మిగ్వెల్‌ ఏంజిల్‌ పోర్టిల్లో అనే గ్యాంగ్‌స్టర్‌ మొత్తం 22 క్రూరమైన హత్యా నేరాలు చేశాడు. అంతేగాక పలు హత్యాయత్నాలు, దాడులు, బలవంతపు వసూళ్లలో అతని పాత్ర ఉంది. దాంతో మిగ్వెల్‌కు అక్కడి న్యాయస్థానం ఏకంగా 945 సంవత్సరాల జైలుశిక్ష విధించింది. అయితే, వందేళ్లు కూడా జీవించని వ్యక్తులకు ఇలా సుదీర్ఘ జైలు శిక్షలు విధించడం వెనుక ఓ ఆశక్తికర అంశం ఉంది. ఇలా సుదీర్ఘ శిక్ష పడిన నేరస్తులు శిక్షాకాలం పూర్తి కాకుండా మరణిస్తే.. ఆ శిక్ష పూర్తయ్యే వరకూ మృతదేహాలను నిందితుడి ఫ్యామిలీకి ఇవ్వరు. వాటిని ఫ్రీజర్లలోనే ఉంచి శిక్షాకాలం పూర్తయిన తర్వాతే కుటుంబ సభ్యులకు అందజేస్తారట. దీంతో నేరాల సంఖ్య తగ్గుతుందనేది ఎల్ సాల్వెడార్ నమ్మకంగా చెబుతున్నారు. ఈ విషయాన్ని కాస్త పక్కనపెట్టి ఎంఎస్-13 గ్యాంగ్ విషయానికొస్తే.. ఈ గ్యాంగ్‌లో ఏకంగా 60 వేల మంది వరకు సభ్యులు ఉన్నారని ఎల్ సాల్వెడార్ ప్రభుత్వం చెబుతోంది. ఇప్పుడు వాళ్లందరినీ జైల్లో పెట్టేందుకు ఒక పక్కా ప్రణాళికను రచిస్తోంది. ఇప్పటికే కొన్ని వేల మంది గ్యాంగ్‌ సభ్యులు ఎల్‌ సాల్వెడార్‌ జైళ్లలో ఉన్నారు. అందుకే ఎల్ సాల్వెడార్ రీసెంట్‌గా ఓ భారీ జైలును నిర్మించి వార్తల్లోకి ఎక్కింది. వందల మంది క్రిమినల్స్‌ గుంపులుగా వచ్చిపడుతున్న ఈ జైలును ఎల్ సాల్వెడార్ రీసెంట్‌గా నిర్మించింది. ఈ జైలు రాజధాని శాన్‌ సాల్వెడార్‌ నుంచి గ్నేయ దిశగా 74 కిలోమీటర్ల దూరంలో ఉంది. దీన్ని భూమ్మీద నిర్మించిన నరకంగా అభివర్ణిస్తారు. ఇప్పటికే వేలమంది ఖైదీలను ఈ జైలుకు పంపారు.
ఇందులో 40వేల మంది క్రిమినల్స్‌ను ఉంచే వీలుంది. అలాంటి జైలు ముందు కూడా హౌస్ ఫుల్ బోర్డ్‌ పెట్టాల్సిన పరిస్థితులు కనిపిస్తున్నాయి. ఎందుకంటే.. 60వేల మంది క్రిమినల్స్ ఉన్న మారా సాల్వట్రుచ గ్యాంగ్‌‌లో ఇప్పటివరకూ అరెస్ట్ అయింది దాదాపు రెండువేల మంది మాత్రమే. మిగిలిన క్రిమినల్స్ అందరినీ అరెస్ట్ చేసి జైలుకు తరలించాలంటే కొత్తగా నిర్మించిన జైలు లాంటివి మరిన్ని అవసరం అవుతాయి. ఇప్పుడు ఎల్ సాల్వెడార్ అదే పనిలో ఉన్నట్టు ప్రకటించింది. ఉగ్రవాద నిర్బంధ కేంద్రంగా పేరు పెట్టిన కొత్త జైలుకు తొలుత 2వేల మంది ఖైదీలను తరలించారు. వారంతా హత్యలు, దాడులు, వంటి ఘోర నేరాలకు పాల్పడే గ్యాంగ్‌స్టర్లుగా ఎల్‌ సాల్వెడార్‌ ప్రకటించింది. మరోవైపు.. ఎల్ సాల్వెడార్‌ ప్రభుత్వం యాక్షన్‌పై ప్రతిపక్షాలతో పాటూ మానవహక్కుల సంఘాలు ఆగ్రహం వ్యక్తం చేస్తున్నాయి. కేవలం రాజకీయ కక్షతోనే పలువురిని అరెస్టు చేస్తున్నారంటూ ప్రతిపక్షాలు విమర్శిస్తున్నాయి. ప్రజల హక్కులను బుకెలే సర్కార్ కాలరాస్తోందని మండిపడుతున్నారు. అయితే ఖైదీలకు కోర్టుల్లో తమ వాదనలను వినిపించేందుకు న్యాయవాదులను నియమించుకునే ఛాన్స్ కల్పిస్తామని అధ్యక్షుడు నయీబ్‌ బుకెలే తెలిపారు. ఇదే సమయంలో ప్రభుత్వం అమాయకులను అరెస్టు చేస్తుందని, ఎందరో పోలీసు కస్టడీలో మరణించారని మానవ హక్కుల సంఘాలు ఆరోపిస్తున్నాయి. ఎలాంటి వారెంట్లు లేకుండా అరెస్టు చేసినట్టు విమర్శిస్తున్నాయి. కానీ, ప్రభుత్వ చర్యలను ప్రజలు మాత్రం స్వాగతిస్తున్నారు. ఇలాంటి నిర్ణయాలు తీసుకోకపోతే ఎల్ సాల్వెడార్‌పై వరల్డ్ క్రైమ్ కేపిటల్‌ అనే ముద్ర చెరిగిపోదంటున్నారు. ఎన్నో సంవత్సరాల తర్వాత స్వేచ్ఛగా రోడ్లు తిరుగుతున్నామంటున్నారు. మరి గ్యాంగ్‌స్టర్లపై బుకెలే సర్కార్ ఇదే దూకుడు కొనసాగిస్తుందేమో చూడాలి.