bhalamedia.com

బీఎస్పీ ఎమ్మెల్యే రాజుపాల్ హత్య కేసులో సాక్షి ఉమేశ్ పాల్ ను హత్య చేసిన నేరానికి గ్యాంగ్ స్టర్ అతీక్ అహ్మద్ కు జీవిత ఖైదు విధిస్తూ ఉత్తర్ ప్రదేశ్ స్పెషల్ కోర్టు సంచలన తీర్పు వెలువరించింది. నిందితుడిని పోలీసులు ప్రయాగ్ రాజ్ జైలుకు తరలించారు. ప్రస్తుతం ఈ ఘటన ఉత్తర ప్రదేశ్ లోనే కాకుండా దేశవ్యాప్తంగా సంచలనంగా మారింది. ఎమ్మెల్యే రాజుపాల్ ను 2005లో దుండగులు హత్య చేశారు. ఈ ఘటనలో ఉమేష్ పాల్ ప్రధాన సాక్షిగా ఉన్నాడు. కోర్టులో తన వాంగ్మూలాన్ని ఇచ్చిన అనంతరం ఉమేష్ పాల్ ను గ్యాంగ్ స్టర్ అతీక్ అహ్మద్ మరియు అతని అనుచరులు కిడ్నాప్ చేసి వాంగ్మూలాన్ని ఉపసంహరించుకోవాలని బెదిరించారు. ఇదిలా ఉంటే.. కొద్ది రోజుల క్రితం ఇదే ఉమేష్ పాల్ ను మరియు అతడి ఇద్దరి అనుచరులను అతీక్ అహ్మద్ తన అనుచరులతో కలిసి హత్య చేశాడు. ఇది ఉత్తర్ ప్రదేష్ లో సంచలనంగా మారింది.
ఉత్తర్ ప్రదేశ్ లో హత్య రాజకీయాలు జరుగుతున్నాయనీ.. ఉమేష్ పాల్ హత్యకు ముఖ్యమంత్రి యోగీ ఆదిత్యనాథ్ సర్కారే కారణమంటూ యూపీ అసెంబ్లీలో ప్రతిపక్షాలు తీవ్రమైన ఆరోపణలు చేశాయి. దీనికి సమాధానంగా సీఎం యోగీ తీవ్రంగా స్పందించాడు. ఎక్కడో ఎవరో హత్య చేస్తే దానికి ప్రభుత్వం ఎలా కారణమవుతుందని ప్రశ్నించిన యోగీ.. మొత్తం గ్యాంగ్ స్టర్లను మట్టిలో కలిపేస్తానంటూ అసెంబ్లీలోనే ప్రకటించాడు. చెప్పినట్టుగానే ఈ ఘటనతో సంబంధం ఉన్న ఇద్దరు రౌడీలను పోలీసులు ఎన్ కౌంటర్ చేశారు. ఇప్పుడు ఆ హత్యకు సూత్రధారి అతీక్ అహ్మద్ కు జైలు శిక్ష పడింది.

మోదీ పేరున్న వాళ్ళంతా దొంగలే అంటూ కాంట్రవర్సీ చేసి ఏకంగా జైలు శిక్షకు గురైన మాజీ ఎంపీ రాహుల్ గాంధీ.. ఇప్పుడు మరోసారి అలాంటి మాటలే మాట్లాడి మరో పెద్ద తేనెతుట్టెను కదిలించాడు. మోదీ అనే పేరున్న వాళ్ళకు క్షమాపణ చెప్తారా అంటూ మీడియా వ్యక్తి అడిగిన ప్రశ్నకు సమాధానంగా నేను సావర్కర్ ను కాదు.. గాంధీని.. గాంధీలు క్షమాపణలు చెప్పరు.. అంటూ మాట్లాడాడు రాహుల్. దీంతో సావర్కర్ వారసులు దీనిపై రియాక్ట్ కావాల్సి వచ్చింది. స్వాతంత్ర సమరయోధుడు వీర్ దామోదర్ సావర్కర్ మనవడు రంజిత్ సావర్కర్ దీనిపై స్పందిస్తూ.. రాహుల్ పై తీవ్ర ఆగ్రహం వ్యక్తం చేశారు. తన తాత దేశ స్వాతంత్రం కోసం ప్రాణాలు ఇచ్చిన దేశభక్తుడు అనీ.. అలాంటి వాళ్ళపై మాట్లాడే ముందు కనీసం ఇంగిత జ్ఞానం ఉండాలి కదా అంటూ రంజిత్ వ్యాఖ్యానించారు.
“చిన్న పిల్లల్లా నోటికి ఏది వస్తే అది మాట్లాడటం మంచిది కాదు. మా తాత బ్రిటిష్ వారికి ఎప్పుడు క్షపమాణ చెప్పారో రాహుల్ గాంధీ నిరూపించాలి. అందుకు సంబంధించిన ఆధారాలు నీ దగ్గర ఉన్నాయా రాహుల్..?” అంటూ తీవ్రంగా స్పందించారు. దేశభక్తులపై కూడా రాజకీయాల కోసం తప్పుడు మాటలు మాట్లాడటం చాలా పెద్ద నేరంగా పరిగణించాలని కోరారు. రాహుల్ పై చట్టపరమైన చర్యలు తీసుకోవాలంటూ ప్రభుత్వాన్ని కోరారు. మోదీ వ్యాఖ్యల వివాదంలో ప్రస్తుతం రాహుల్ గాంధీ లోక్ సభ సభ్యత్వాన్ని కోల్పోవటమే కాకుండా నెల రోజుల్లో స్టే తెచ్చుకోకపోతే రెండేళ్ళు జైళ్ళో ఉండాల్సిందే.

దశాబ్దాలుగా ఇండియన్ సాఫ్ట్ డ్రింక్స్ మార్కెట్లో ఏకఛత్రాధిపత్యం వహిస్తున్న కోకాకోలాతో పాటు మరో విదేశీ సాఫ్ట్ డ్రింక్ కంపెనీ పెప్సీకి రిలయన్స్ జియో భారీ షాకిచ్చింది. సుమారు యాభై సంవత్సరాల క్రితం నాటి ఇండియన్ బ్రాండ్ ను జియో మళ్ళీ మార్కెట్లోకి తీసుకొచ్చింది. అప్పట్లో ఇండియన్ మార్కెట్ ను ఏలేసిన ప్యూర్ దేశీ డ్రింక్ కంపాను కొద్ది నెలల క్రితం ముకేష్ అంబానీ కొనుగోలు చేసిన విషయం తెలిసిందే. ఇప్పుడు ఆ సాఫ్ట్ డ్రింక్ ను అదే పేరుతో మళ్ళీ ఇండియన్ మార్కెట్లో రీ లాంచ్ చేశాడు ముకేష్. వచ్చీ రావటంతోనే అన్ని విదేశీ సాఫ్ట్ డ్రింక్స్ కు చెక్ పెట్టే విధంగా మాస్టర్ మార్కెట్ స్ట్రాటజీతో ఎంటరైంది కంపా. కేవలం 49 రూపాయలతో 2 లీటర్ల పెట్ బాటిల్ కస్టమర్లకు అందజేస్తోంది. ప్రస్తుతానికి కంపా కోలా లెమన్ మరియు ఆరెంజ్ ఫ్లేవర్లలో మార్కెట్లోకి వచ్చింది. త్వరలో మరిన్ని ఫ్లేవర్లు రాబోతున్నాయని జియో ప్రకటించింది.
ప్రస్తుతానికి ఫారిన్ బ్రాండ్లకు పూర్తి పోటీ ఇవ్వలేకపోయినా.. మరిన్ని ధరలు, ఫ్లేవర్లతో త్వరలో మార్కెట్లోకి పూర్తి స్థాయిలో ఎంటరై మార్కెట్ ను వశం చేసుకునేందుకు ప్లాన్ చేస్తోంది జియో. ఏడేళ్ళ క్రితం ఫ్రీ అన్ లిమిటెడ్ డాటా మరియు కాల్స్ అంటూ టెలీకాం మార్కెట్లోకి వచ్చిన రిలయన్స్ జియో.. ఇప్పుడు ఇండియన్ టెలీకాం మార్కెట్లో నెంబర్ వన్ స్థానంలో ఉంది. కస్టమర్లకు నచ్చే విధంగా మార్కెట్లోకి ఎంట్రీ ఇచ్చి.. క్రమంగా విస్తరించి మొత్తం మార్కెట్ ను శాసించే స్థాయికి రావటం మొదటి నుంచి రిలయన్స్ సంస్థ అనుసరిస్తున్న ప్లాన్. ప్రస్తుతం సాఫ్ట్ డ్రింక్స్ మార్కెట్లో భారతీయులకు ఎంతో ఇష్టమైన కంపా దేశీ బ్రాండ్ ను లాంచ్ చేసిన జియో.. త్వరలో సాఫ్ట్ డ్రింక్స్ మార్కెట్ లో నెంబర్ వన్ అయ్యేందుకు ప్రణాళికతో సిద్ధంగా ఉంది.

కాంగ్రెస్ నేత రాహుల్ గాంధీకి మరో షాక్ తగిలింది. వివాదాస్ఫద వ్యాఖ్యలు చేసిన కేసులో సూరత్ కోర్టు రాహుల్ కు 2 సంవత్సరాల జైలు శిక్ష విధించిన మరుసటి రోజే.. అంటే ఈ రోజు లోక్ సభ సచివాలయం సంచలన నిర్ణయం తీసుకుంది. రాహుల్ పై అనర్హత వేటు వేస్తూ లోక్ సభ సచివాలయం నిర్ణయం వెలువరించింది. 2013లో రూపొందించిన ఆర్టికల్ 102 లోని సబ్ క్లాస్ ప్రకారం జైలు శిక్ష పడిన వారు మరియు నేరం రుజువైన వారు చట్టసభల్లో ఉండటానికి అనర్హులవుతారు. రెండు లేదా అంతకంటే ఎక్కువ జైలు శిక్షకు గురైన వాళ్ళు శిక్షాకాలం మరియు శిక్ష ముగిసిన ఆరేళ్ళ వరకూ చట్టసభలకు పోటీ చేయటానికి అనర్హులుగా పరిగణించబడతారు. దీని ప్రకారం రాహుల్ పై వెంటనే లోక్ సభ సచివాలయం చర్యలు తీసుకుంది.
2019 కర్ణాటకలోని కోలార్ ఎన్నికల ప్రచారంలో భాగంగా మాట్లాడుతున్న క్రమంలో రాహుల్ వివాదాస్ఫద వ్యాఖ్య చేశాడు. దొంగలందరికీ చివర మోడీ అనే పేరు ఉంటుంది ఎందుకో మరి.. అంటూ పరోక్షంగా ప్రధానమంత్రి నరేంద్రమోడీని ఉద్దేశించి వ్యాఖ్యానించాడు. దీనిపై గుజరాత్ కు చెందిన బీజేపీ ఎమ్మెల్యే పూర్ణేష్ మోడీ పరువునష్టం కేసు దాఖలు చేశాడు. ఇందుకు సంబంధించిన వీడియో సాక్ష్యాధారాలను కూడా సూరత్ కోర్టు ముందుంచగా.. అన్నింటినీ పరిశీలించిన న్యాయమూర్తి రాహుల్ ను ప్రశ్నించాడు. మీరు ఈ వ్యాఖ్యలు చేసినట్టు ఒప్పుకుంటున్నారా అని ప్రశ్నించగా.. రాహుల్ అవునని సమాధానం ఇవ్వటంతో న్యాయమూర్తి విచారణ పూర్తిచేసి జైలు శిక్ష ఖరారు చేశాడు. కాకపోతే.. హైకోర్టు లేదా సుప్రీంకోర్టులో అప్పీలు చేసుకునే అవకాశంతో పాటు శిక్షను నెల రోజుల పాటు నిలుపుదల చేస్తూ తీర్పునిచ్చాడు. ఈ తీర్పుపై స్టే తెచ్చుకోలేకపోతే మరో 30 రోజులలో రాహుల్ జైలుకు వెళ్ళాటం ఖాయమే.

ఖలిస్తాన్ వేర్పాటుపాద నాయకుడిగా తనను తాను ప్రకటించుకున్న అమృత్ పాల్ సింగ్ ప్రస్తుతం పోలీసులకు చిక్కకుండా తప్పించుకొని తిరుగుతున్న విషయం తెలిసిందే. పంజాబ్ వదిలి పారిపోయిన అమృత్ పాల్ మహారాష్ట్రలో ఉన్నట్లు పోలీసులు అనుమానిస్తున్నారు. దీంతో మహారాష్ట్ర మొత్తం హై అలర్ట్ ప్రకటించి అతడి కోసం ఏటీఎస్ పోలీసులు గాలిస్తున్నారు. ఈక్రమంలో అమృత్ పాల్ సింగ్ గురించి చేసిన విచారణలో అతడు పాల్పడిన నేరాల చిట్టా బయటపడింది. ఖలిస్తాన్ వేర్పాటువాదం పేరుతో వారిస్ పంజాబ్ దే సంస్థకు తనకు తాను నాయకుడిగా ప్రకటించుకున్న అమృత్ పాల్ సింగ్ కు పాకిస్తాన్ నుంచి ఖచ్చితమైన ఆదేశాలతో పాటు భారీ ఆర్థిక సహాయం అందుతోంది. పాకిస్తాన్ ఐఎస్ఐ సింగ్ కు డబ్బులు, ఆయుధాలను సరఫరా చేస్తున్నట్టు పోలీసులు గుర్తించారు.
అమృత్ పాల్ సింగ్ ఖలిస్తాన్ సానుభూతిపరుల నుంచి వసూలు చేసిన చందా డబ్బులతో లెక్కకు మించిన కార్లు కొనుగోలు చేసి కాన్వాయ్ లో తిరుగుతూ శాంతి భద్రతలను నాశనం చేసేందుకు పథకాలు వేస్తున్నట్టు ఇంటలిజెన్స్ అధికారి ఒకరు మీడియాతో చెప్పారు. ఓ ట్రక్ డ్రైవర్ గా బతుకు వెల్లదీసే ఇతడిని పాకిస్తాన్ ఐఎస్ఐ కావాలనే భారత్ కు రప్పించి పంజాబ్ లో అశాంతిని రగిల్చేందుకు తయారు చేసిందని చెప్పారు. అతడి ఇల్లు, అనుచరులను విచారించటంతో పాటు ఫోన్లను, సోషల్ మీడియా అకౌంట్లను పరిశీలించిన పోలీసులకు అతడి అక్రమ సంబంధాలు, ఇతర నేరాలకు సంబంధించి వివరాలు లభ్యమయ్యాయి. అనేక మంది మహిళలతో అక్రమ సంబంధాలు నడుపుతున్నట్టు తెలిసింది. మతాల మధ్య చిచ్చు పెట్టి.. దేశంలో మతకల్లోలాలు సృష్టించటమే లక్ష్యంగా అతడితో పాకిస్తాన్ ఐఎస్ఐ పనిచేయిస్తోంది. భారీగా సొమ్మును కూడా అందజేసినట్టు తెలుస్తోంది. రెచ్చగొట్టే ఉపన్యాసాలు చేయటం.. రాత్రి పూట తిరుగుతూ మతాలకు వ్యతిరేకంగా ప్రచారం చేయటం.. ఖలిస్తాన్ వైపు యువతను రెచ్చగొట్టడం ఇవి అమృత్ పాల్ సింగ్ ప్రధాన లక్ష్యాలని పోలీసులు చెప్తున్నారు. ప్రస్తుతానికి అతడు ఇంకా పోలీసులకు చిక్కలేదు సరికదా.. ఇతరుల సాయంతో నేపాల్ గుండా కెనడా లేదా అమెరికా పారిపోయి ఉండవచ్చని సమాచారం.