గత కొంత కాలంగా తీవ్ర అనారోగ్యంతో బాధపడుతూ వెంటిలేటర్ పై ఉన్న సీనియర్ నటుడు శరత్ బాబు కొద్ది సేపటి క్రితం తుదిశ్వాస విడిచారు. కిడ్నీలు, ఊపిరితిత్తులు, లివర్ పాడవటంతో శరత్ బాబు మరణించినట్టు హాస్పిటల్ వైద్యులు వెల్లడించారు. శరత్ బాబు మరణంతో టాలీవుడ్ లో విషాదం అలుముకుంది. ఆయన మృతిపట్ల టాలీవుడ్ ప్రముఖులు సోషల్ మీడియా వేదికగా సంతాపం వ్యక్తం చేస్తున్నారు. శరత్ బాబు భౌతిక కాయాన్ని చెన్నై తరలించేందుకు ఆయన కుటుంబ సభ్యులు ఏర్పాట్లు చేస్తున్నారు. అభిమానుల సందర్శన కోసం ఆయన దేహాన్ని హైదరాబాద్ లో ఉంచుతారా లేదా అనే దానిపై ఆయన కుటుంబ సభ్యులు ఏ విషయమూ చెప్పలేదు. విషయం తెలిసిన పలువురు సన్నిహితులు హాస్పిటల్ కు బయల్దేరారు.
శరత్ బాబు సొంతూరు శ్రీకాకుళం జిల్లాలోని ఆముదాలవలస. ఆయన తల్లిదండ్రుల పేర్లు విజయ శంకర దీక్షితులు, సుశీలా దేవి. పోలీస్ ఆఫీసర్ కావాలని జీవిత లక్ష్యంగా చదువు పూర్తి చేస్తున్న క్రమంలో అనుకోకుండా నాటకాల వైపు వచ్చిన శరత్ బాబు.. ఆ తర్వాత సినిమా రంగం వైపు అడుగులు వేశారు. 1973 లో విడుదలైన రామరాజ్యం సినిమాలో హీరోగా నటించారు శరత్ బాబు. ఆ రోజుల్లో శరత్ బాబుకు లేడీ ఫ్యాన్ ఫాలోయింగ్ విపరీతంగా ఉండేది. శోభన్ బాబు, మురళీ మోహన్ వంటి సీనియర్ నటులకు ధీటుగా మహిళా ప్రేక్షకుల్లో శరత్ బాబుకు ఆదరణ ఉండేది. హీరోగా విపరీతమైన పోటీ ఎదుర్కున్న శరత్ బాబు.. ఒకానొక దశలో సెకండ్ హీరోగానూ.. ఆ తర్వాత క్యారెక్టర్ నటుడిగానూ కూడా నటించాల్సి వచ్చింది. ముఖ్యంగా సీతకోక చిలుక సినిమా శరత్ బాబు కెరీర్ లో గుర్తుండిపోయే సినిమా. మరో చరిత్ర, ఇది కథ కాదు లాంటి ఓల్డ్ క్లాసిక్ సినిమాల్లో శరత్ బాబు గుర్తుండిపోయే పాత్రల్లో నటించారు. సితార సినిమాతో అవార్డులు అందుకున్నారు. ఇక సాగర సంగమం సినిమాలోని ఆయన పాత్ర కమల్ హాసన్ తో సరిసమానంగా ఉంటుంది. అన్వేషణ సస్పెన్స్ థ్రిల్లర్ సినిమా కూడా శరత్ బాబుకు మంచి పేరు తెచ్చింది. సంసారం ఓ చదరంగంలో స్వార్థపరుడైన కొడుకు పాత్రతో పాటు క్రిమినల్ సినిమాలో స్నేహితుడిని మోసం చేసే నెగెటివ్ రోల్ చేశారు. ఇలా రకరకాల పాత్రల్లో నటించిన శరత్ బాబు 250కు పైగా సినిమాల్లో నటించారు. సినిమాల్లో బిజీగా ఉన్నప్పుడే రమాప్రభతో ప్రేమవివాహం చేసుకొని కొద్ది సంవత్సరాలకే ఇద్దరూ విడిపోయారు.