రవితేజ కొత్త సినిమా రావణాసుర ఓటీటీలో స్ట్రీమింగ్ కు రెడీ అయ్యింది. బ్లాక్ బస్టర్ హిట్ గ్యారంటీ అనుకుంటే పెద్దగా కలెక్షన్లు లేకుండా ఫ్లాట్ టాక్ తెచ్చుకున్న రావణాసుర సినిమాను మే 5న అమేజాన్ ప్రైమ్ లో స్ట్రీమింగ్ చేయాలని నిర్ణయించుకున్నారు. నిజానికి ఈ సినిమా ఓటీటీ స్ట్రీమింగ్ కు ఇంకా చాలా టైమ్ ఉంది. కానీ థియేటర్లలో ఇక ప్రేక్షకులు చూసే అవకాశం లేదు కాబట్టి వీలైనంత తొందరగా సినిమాను స్ట్రీమింగ్ చేస్తే బాగుంటుందని రిలీజ్ డేట్ మార్చారట. అభిషేక్ పిక్చర్స్, ఆర్‌టీ టీమ్ వర్క్స్ బ్యానర్లపై అభిషేక్ నామా, రవితేజ కలిసి ఈ సినిమాను నిర్మించారు. భారీ బడ్జెట్ తో మంచి యాక్షన్ ఎంటర్టైనర్ కథతో తెరకెక్కిన రావణాసుర.. మాస్ వర్గం ప్రేక్షకులను ఆకట్టుకున్నప్పటికీ గట్టి కలెక్షన్లు రాబట్టలేకపోయింది.
రవితేజ కాస్త కొత్త కథలో నెగెటివ్ షేడ్స్ ఉన్న క్యారెక్టర్లో కనిపించాడు ఈ సినిమాలో. భీమ్స్ సిసిరోలియో, హర్షవర్ధన్ రామేశ్వర్ పాటలు కంపోజ్ చేయగా.. నేపథ్య సంగీతాన్ని హర్షవర్ధన్ రామేశ్వర్ సమకూర్చారు. కథ బాగానే ఉన్నా స్క్రీన్ ప్లే మరియు డైరెక్టర్ టేకింగ్ అప్ టు ది మార్క్ లేకపోవటం వల్లనే రావణాసుర పెద్దగా ఆడలేదనేది సినీ క్రిటిక్స్ రివ్యూ. దక్ష నగర్కర్, మేఘా ఆకాశ్, ఫరియా అబ్దుల్లా, పూజిత పొన్నాడ, అనూ ఇమాన్యుయెల్..ఇలా ఐదుగురు హీరోయిన్లను సినిమాలో చూపించినా.. అందరి క్యారెక్టర్లూ లిమిటెడ్ క్యారెక్టర్లే. ధమాకా, వాల్తేరు వీరయ్య సినిమాలతో వరుస హిట్లు కొట్టిన రవితేజకు హ్యాట్రిక్ దక్కలేదు. ఏది ఏమైనా.. సినిమాలో రవితేజ క్యారెక్టరైజేషన్ మాత్రం చాలా డిఫరెంట్ అని చెప్పాలి.