సొంత పార్టీ బీఆర్ఎస్ పై తిరుగుబాటు చేసి పార్టీ నుంచి సస్పెన్షన్ కు గురైన పొంగులేటి శ్రీనివాస్ రెడ్డి బీజేపీలో చేరనున్నారంటూ ఉదయం నుంచి చర్చ జరుగుతోంది. తెలంగాణ బీజేపీ నేతలు ఈటెల రాజేందర్, రఘునందన్ రావు, కొండా విశ్వేశ్వర్ రెడ్డి, ఏనుగు రవీందర్ రెడ్డి తదితరులు పొంగులేటితో సమావేశమయ్యారు. బీజేపీలో చేరాలంటూ పొంగులేటిని ఆహ్వానించారు. కానీ ఆయన నుంచి మాత్రం ఇప్పటి వరకూ స్పష్టమైన ప్రకటన రాలేదు. బీజేపీ నేతలంతా పొంగులేటిని పార్టీలోకి ఆహ్వానించినా ఆయన ఎటూ తేల్చకుండా ఎందుకు ఉన్నారో ఎవరికీ అర్థం కాని విషయం. కొద్దిరోజుల క్రితం తెలంగాణ కాంగ్రెస్ నేతలు కూడా పొంగులేటిని కాంగ్రెస్ పార్టీలో చేరాలంటూ ఆహ్వానించారు. రాహుల్ గాంధీ కూడా పొంగులేటిని పార్టీలోకి ఆహ్వానించగా.. ఆయన డిమాండ్లు విన్న రాహుల్ ఎటూ తేల్చకుండా ఇది జరిగేలా లేదని పెదవి విరిచి వెళ్ళిపోయారు. ఇప్పుడు బీజేపీ నేతలు పిలుస్తున్నా పొంగులేటి క్లారిటీ ఇవ్వటం లేదు. పొంగులేటి వ్యవహారం ఇలాగే కొనసాగితే చివరకు ఎటూ కాకుండా మిగిలిపోతారనే భయం ఆయన కార్యకర్తల నుంచే వ్యక్తమవుతోంది.
బీఆర్ఎస్ నుంచి సస్పెండ్ కాక ముందే పొంగులేటి వైఎస్ఆర్ తెలంగాణ పార్టీలో చేరబోతున్నాడని వార్తలొచ్చాయి. వైఎస్ విజయమ్మ కూడా ఆయన తమ పార్టీలో చేరుతున్నాడని చెప్పిందే కానీ అది జరగనేలేదు. ఆ తర్వాత కాంగ్రెస్ పార్టీతో సంప్రదింపులు.. ఇప్పుడు బీజేపీ నేతలతో మంతనాలు.. ఇలా జరుగుతూనే ఉన్నాయే తప్ప పొంగులేటి శ్రీనివాస్ రెడ్డి మాత్రం ఎటూ తేల్చకుండా మితిమీరిన డిమాండ్లు చేస్తున్నాడు. కేవలం ఖమ్మం జిల్లాలో కొంత పట్టు ఉన్న కారణంగా పొంగులేటిని తమ పార్టీలో చేర్చుకోటానికి ప్రతిపక్షాలు ఆసక్తి చూపిస్తుంటే.. ఆయన మాత్రం ఖమ్మం జిల్లాలో తాను ఏది చెప్తే అదే శాసనం అనే రేంజ్ లో తన గురించి తాను చాలా ఎక్కువగా ఊహించుకొని.. ఏ పార్టీలోనూ చేరకుండా కార్యకర్తలను గందరగోళానికి గురి చేస్తున్నారు. ఏ పార్టీ నేతలైనా తమ పార్టీలో చేరాలని అడిగినప్పుడే ఏదో నిర్ణయం తీసుకోవాలి గానీ.. ఇలా నాన్చితే చివరకు విసుకొచ్చి వస్తే రా.. పోతే పో అనే సందర్భం వస్తుందంటూ పొంగులేటికి దగ్గరి వ్యక్తులు సలహా ఇస్తున్నారట. అయినా ఇప్పటికీ ఏటూ తేల్చడం లేదు. చివరికి పొంగులేటి విషయంలో ఏం జరుగుతుందో చూడాలి.