అమెరికన్ మాజీ ప్రెసిడెంట్ డోనాల్ట్ ట్రంప్ శృంగారలీలల గురించి ఇదివరకే ఆరోపణలు రావటం.. అవి తప్పని వాదించి అరెస్టు తప్పించుకొని ట్రంప్ బెయిల్ సంపాదించటం సంచలనం రేకెత్తించిన విషయం తెలిసిందే. తాజాగా మాజీ ప్రెసిడెంట్ పై మరో భారీ అలెగేషన్ దుమారం రేపుతోంది. అమెరికాలో కాలమిస్ట్ గా పనిచేసిన జీన్ కెరోల్ అనే మహిళ.. ట్రంప్ తనను రేప్ చేశాడంటూ సంచలన ఆరోపణ చేసింది. పాతికేళ్ళ క్రితం మాన్ హట్టన్ లోని ఫిఫ్త్ ఎవెన్యూలో గల ఓ డిపార్ట్మెంటల్ స్టోర్ లో షాపింగ్ చేస్తున్న తరణంలో ట్రయల్ రూమ్ లో తనను ట్రంప్ రేప్ చేశాడంటూ రచ్చ రచ్చ చేస్తోంది కెరోల్. ట్రయల్ రూమ్ బయట తనతో మాట కలిపిన ట్రంప్.. బలవంతంగా రూమ్ లోకి తీసుకెళ్ళి మానభంగం చేశాడని చెప్తోంది 79 యేళ్ళ కెరోల్. వచ్చే ఎన్నికల్లో మళ్ళీ అమెరికా అధ్యక్ష పదవికి పోటీ చేసేందుకు సిద్ధమవుతున్న ట్రంప్ కు ఇది మరో భారీ ఎదురుదెబ్బ.
ఇంతకు ముందే సీక్రెట్ ఫైల్స్ విషయంలోనూ.. మహిళపై లైంగిక ఆరోపణల విషయంలోనూ ట్రంప్ ను లోకల్ మీడియా ఆడేసుకుంది. ఈ ఆరోపణల మరకల నుంచి బయటపడేందుకు ట్రంప్ నానా తంటాలు పడ్డాడు. దొరికిందే అవకాశంగా డెమోక్రాటిక్ పార్టీ నేతలు ట్రంప్ ను ఇరకాటంలో పడేసేందుకు గట్టిగానే ప్రయత్నించారు. ప్రెసిడెంట్ బైడెన్ మద్దతుదారులు ట్రంప్ ను వచ్చే ఎన్నికల్లో పోటీ చేయనివ్వకుండా అడ్డుకునేందుకు దీన్ని బాగానే వాడుకున్నారు. ఇప్పుడు వారి చేతికి మరో అస్త్రం దొరికినట్టైంది. ట్రంప్ తరఫున లాయర్ మాత్రం కెరోల్ రేప్ ఆరోపణలను కొట్టి పారేస్తున్నాడు. వచ్చే ఎన్నికల్లో పోటీ చేయకుండా అడ్డుకునేందుకు డెమోక్రాట్లు ఆడిస్తున్న డ్రామాగా ట్రంప్ వర్గం దీన్ని పేర్కొంటోంది. 2019లోనే జీన్ కెరోల్ ట్రంప్ పై కేసు వేసింది. కానీ.. ఆధారాలు సరిగ్గా లేవంటూ కేసును కోర్టు కొట్టివేయగా.. ఇప్పుడు మళ్లీ కెరోల్ పాత పాటే పాడుతోంది. దీన్ని ట్రంప్ ఎలా ఎదుర్కోబోతున్నాడో చూడాలి.