నాని హీరోగా సింగరేణి బ్యాక్ డ్రాప్ కథతో తెరకెక్కిన దసరా సినిమా ఓటీటీ డేట్ ఖరారు చేసుకుంది. థియేటర్లలో రిలీజైన ఆరు రోజుల్లోనే వందకోట్ల కలెక్షన్లు రాబట్టి నాని కెరీర్ లోనే బిగ్గెస్ట్ హిట్ గా నిలిచిన దసరా సినిమా ఏప్రిల్ 27 నుంచి నెట్ ఫ్లిక్స్ లో స్ట్రీమింగ్ కానుంది. ఇప్పటికే దసరా ట్రైలర్ ను నెట్ ఫ్లిక్స్ లో స్ట్రీమ్ అవుతుండగా.. ట్రైలర్ చివర్లో 27 నుంచి ఫుల్ సినిమా స్ట్రీమింగ్ కానుందని కనిపిస్తోంది. నాని, కీర్తి సురేష్, దీక్షిత్ శెట్టి లీడ్ రోల్స్ తో తెరకెక్కిన దసరా.. అచ్చ తెలంగాణ యాసలో గోదావరిఖని బొగ్గు గనులపై ఆధారపడి బతికే ఊరి నేపథ్యంలో అద్భుతంగా తెరకెక్కించాడు డైరెక్టర్ శ్రీకాంత్ ఓదెల. తెలంగాణ ప్రజలతో పాటు తెలుగు ప్రేక్షకులందరినీ ఆకట్టుకోవటంలో శ్రీకాంత్ సక్సెస్ అయ్యాడని చెప్పాలి.
నిజానికి దసరా సినిమా మరిన్ని రోజులు థియేటర్లో ఆడినా జనం చూసే అవకాశాలు లేకపోలేదు. నాని సినిమాకు ఫ్యామిలీ ఆడియన్స్ ఎక్కువగా వస్తుంటారు. సమ్మర్ హాలిడేస్ లో జనం థియేటర్ కు రావటానికి ఇంట్రస్ట్ చూపించటంతో పాటు ప్రస్తుతం పెద్ద హీరోల సినిమాలు కూడా ఏమీ లేవు. సాయి ధరమ్ తేజ్ విరూపాక్ష రిలీజ్ కు రెడీగా ఉండగా.. ఇక పెద్ద సినిమాలేవీ విడుదలకు సిద్ధంగా లేవు. కానీ సినిమా యూనిట్ మాత్రం మరో వారం రోజుల్లోనే దసరా సినిమాను ఓటీటీ రిలీజ్ చేయటానికి నిర్ణయించుకుంది.