కర్ణాటక ఎన్నికల పోలింగ్ కోసం కనీసం పది రోజుల టైమ్ కూడా లేకపోవటంతో ఓటర్లను ఆకట్టుకునేందుకు పార్టీలు విచిత్రమైన హామీలు ఇస్తున్నాయి. బీజేపీ ఇచ్చిన హామీలు ఇప్పుడు దేశవ్యాప్తంగా చర్చనీయాంశంగా మారాయి. తమ హామీలతో కూడిన లిస్టును బీజేపీ ప్రకటించింది. హామీలలో భాగంగా.. తాము అధికారంలోకి వస్తే దారిద్రరేఖకు దిగువన ఉన్న కుటుంబాలకు ప్రతి రోజు అర లీటర్ నందిని పాలను ఉచితంగా ఇస్తామని పేర్కొంది. అంతే కాకుండా సంవత్సరానికి 3 సిలిండర్లను ఉచితంగా అందిస్తామని కూడా మేనిఫెస్టోలో పేర్కొంది. గ్యాస్ మరియు పెట్రోలు ధరలు విపరీతంగా పెరిగాయంటూ ప్రతిపక్షాలు రాద్ధాంతం చేస్తున్న వేళ.. యేడాదికి మూడు ఫ్రీ గ్యాస్ సిలిండర్లు ఇస్తామని బీజేపీ చెప్పటం చర్చనీయాంశంగా మారింది. బీజేపీ మేనిఫెస్టో మిగతా పార్టీలకు శాపంగా మారింది. బీజేపీని మించిన ఉచిత హామీలు ఏం ఇవ్వాలో ఇప్పుడు మిగతా పార్టీలకు అర్ధం కాకుండా ఉంది.
పాలు, గ్యాస్ తో పాటు 5 కిలోల బియ్యం, 5 కిలోల తృణధాన్యాలు రేషన్ తో పాటు ఇస్తామని కూడా బీజేపీ మేనిఫెస్టోలో పేర్కొంది. సీనియర్ సిటిజన్లకు ఫ్రీ హెల్త్ చెకప్, 10 లక్షల మంది పేదలకు ఉచిత ఇళ్ళ స్థలాలు, ఎస్సీ, ఎస్టీ మహిళల కోసం ఫిక్స్ డిపాజిట్, రాష్ట్రవ్యాప్తంగా ప్రతి వార్డులో ఆహార కేంద్రాలు, 10 లక్షల ఉద్యోగాల కల్పన.. ఇలా బీజేపీ మేనిఫెస్టోలో ప్రజాకర్షక హామీలు భారీగానే ఉన్నాయి. కేంద్రంలో అధికారంలో ఉన్నందున గ్యాస్, ఇళ్ళ స్థలాలు, ఉద్యోగాలు.. ఇలాంటి హామీలు ఇచ్చేందుకు బీజేపీకి సానుకూలత ఉంది. కర్ణాటకలో బీజేపీ ప్రభుత్వం ఏర్పడితే కేంద్రం నుంచి ఇలాంటి విషయాల్లో సబ్సిడీలతో పాటు సాయాన్ని పొందవచ్చు. మిగతా పార్టీలు ఇలాంటి హామీలు ఇస్తే కేంద్రం ప్రభుత్వం కనుక సాయం చేయని పక్షంలో కర్ణాటక ప్రభుత్వానికి ఆ హామీలు గుదిబండగా మారి ప్రభుత్వం ఏకంగా దివాలా తీసే పరిస్థితి రావచ్చు. మే 10న ఎన్నికల పోలింగ్ నేపథ్యంలో కర్ణాటక రాజకీయాలు ఇంకా ఎన్ని మలుపులు తిరుగుతాయనేది ఆసక్తికరంగా మారింది.