హోం మంత్రి అమిత్ షా తెలంగాణ పర్యటనకు సంబంధించిన షెడ్యూల్ ఖరారైంది. ఈ నెల 23న అమిత్ షా హైదరాబాద్ రానున్నారు. అదే రోజు సాయంత్రం ఆర్ఆర్ఆర్ టీమ్ తో పార్టీలో పాల్లొని ఆస్కార్ దక్కించుకున్నందుకు వారిని సన్మానించనున్నారు. ఈ పార్టీకి ఎన్టీఆర్, రామ్ చరణ్, రాజమౌళి, చంద్రబోస్, కీరవాణి తదితరులకు అఫీషియల్ గా ఇన్విటేషన్ అందిందని సమాచారం. ఆ తర్వాత తెలంగాణ బీజేపీ నేతలతో పార్టీ సమావేశంలో పాల్గొని ఆ తర్వాత సాయంత్రం చేవెళ్ళలో జరిగే పార్టీ బహిరంగ సభలో పాల్గొని ప్రసంగించనున్నారు. ప్రధాని మోడీ వచ్చి వెళ్ళిన కొద్ది రోజులకే అమిత్ షా తెలంగాణలో పర్యటించటం రాజకీయంగా ఆసక్తికరంగా మారింది.
కర్ణాటక ఎన్నికలు జరుగుతున్న వేళ ప్రస్తుతం బీజేపీ జాతీయ నేతలంతా ఆ ఎన్నికలపై ఫోకస్ చేయటంతో పాటు అదనంగా తెలంగాణపై కూడా దృష్టి సారిస్తున్నట్టు కనిపిస్తోంది. అందుకే తరచుగా జాతీయ నేతలు తెలంగాణలో పర్యటిస్తున్నారు. అమిత్ షా సభ కోసం బీజేపీ నేతలు భారీ ఏర్పాట్లు చేస్తున్నారు. కొండా విశ్వేశ్వర్ రెడ్డి, ప్రేమేందర్ రెడ్డి తదితర బీజేపీ నేతలు అమిత్ షా సభ ఏర్పాట్లను పర్యవేక్షిస్తున్నారు. బీఆర్ఎస్ పార్టీలోని పలువురు అసంతృప్త నేతలు అమిత్ షా సమక్షంలో బీజేపీలో చేరబోతున్నారనే వార్తలు వినిపిస్తున్నాయి. బీఆర్ఎస్ మాజీ మంత్రి ఒకరు ఇదే బాటలో ఉన్నారంటూ బీజేపీ నేతలు హింట్స్ ఇస్తున్నారు. ఏపీలో విశాఖ ఉక్కు చుట్టూ తిరిగిన రాజకీయాల్లో తెలంగాణ బీఆర్ఎస్ పార్టీ ఎంటర్ కావటం.. తెలుగు రాష్ట్రాల్లో రాజకీయాలు హాట్ హాట్ గా ఉన్న నేపథ్యంలో అమిత్ షా పర్యటన ఆసక్తికరంగా మారింది.