ఈటెల రాజేందర్ కు కీలక పదవి అప్పజెప్తారంటూ కొద్ది రోజులుగా జరుగుతున్న ప్రచారం ఎట్టకేలకు నిజమైంది. బండి సంజయ్ ఒంటెద్దు పోకడలతో కొత్తగా తెలంగాణ బీజేపీలోకి చేరేందుకు ఎవ్వరూ ఇష్టపడటం లేదన్న ప్రచారాన్ని పరిగణలోకి తీసుకున్న ఢీల్లీ బీజేపీ.. ఈటెల రాజేందర్ కు కీలక పదవి కట్టబెట్టింది. ఎన్నికల ముందు రాష్ట్ర అధ్యక్ష స్థానంలో ఉన్న వారిని మార్చటం రిస్క్ అని భావించిన బీజేపీ ఢిల్లీ పెద్దలు బండి సంజయ్ పదవికి సమాన స్థాయి పదవిని ఈటెల రాజేందర్ కు కట్టబెట్టి ఆయనకు పార్టీపై అధ్యక్షుడితో సమాన హోదా కల్పించారు. ఎన్నికల ప్రచార సారధిగా ఈటెల రాజేందర్ ను నియమిస్తూ బీజేపీ అధిష్టానం సంచలన నిర్ణయం తీసుకుంది. వచ్చే ఎన్నికల్లో బీజేపీ అధికారంలోకి వస్తే ఈటెల రాజేందర్ ముఖ్యమంత్రి అవుతాడని స్పష్టం చేస్తూ ఈటెలనే తమ సీఎం క్యాండిడేట్ అని బీజేపీ నిర్ణయం తీసుకుంది. ఈ నిర్ణయంతో బండి సంజయ్ వర్గానికి కళ్ళెం వేసినట్టైంది.
తెలంగాణ రాష్ట్రవ్యాప్తంగా మంచి ఫాలోయింగ్ ఉన్న నేతలతో పాటు.. బీజేపీ గురించి ప్రజల్లోకి లోతుగా తీసుకెళ్ళి, తమ సొంత చరిష్మాతో బీజేపీకి ఓట్లు సంపాదించి పెట్టే కీలక నాయకులు ఇప్పుడు బీజేపీకి అవసరం. ఈటెల రాజేందర్, రఘు నందన్ రావు, రాజాసింగ్ లాంటి ఫాలోయింగ్ ఉన్న నేతలను ముందుంచితేనే బీజేపీకి ఓట్లు రాలతాయనేది మొత్తానికి బీజేపీ ఢిల్లీ అధిష్టానం గ్రహించినట్టైంది. ఈ నిర్ణయం తెలంగాణ బీజేపీకి మంచి చేయటంతో పాటు చెడు చేసే అవకాశాలు కూడా కనిపిస్తున్నాయి. ఒక బీసీ నేతకు కీలక పదవి ఇచ్చామని చెప్పుకొని బీసీల ఓట్లు కొల్లగొట్టేందుకు ఈ నిర్ణయం పనికొస్తుంది. అలాగే బీఆర్ఎస్ లోని కీలక నేతలతో మంచి సంబంధాలున్న ఈటెలకు పెద్ద పదవి కట్టబెట్టడం వల్ల పార్టీలోకి చేరికలు జరుగుతాయని ఢిల్లీ అధిష్టానం భావిస్తున్నట్టు కనిపిస్తోంది. కాకపోతే.. అధికార పార్టీ వదిలి కేవలం ఈటెల రాజేందర్ కోసం బీజేపీ పార్టీలో చేరే వాళ్ళు ఎంత మంది ఉంటారు అన్నది ఇక్కడ అసలు ప్రశ్న. ఈటెలకు ఉన్న చరిష్మా పార్టీకి పనికొస్తుందని కూడా ఢిల్లీ పెద్దలు భావించినట్టు తెలుస్తోంది. ఇక్కడి వరకు బీజేపీకి మంచే అయినా.. ఈ నిర్ణయంతో తెలంగాణ బీజేపీ రెండు వర్గాలుగా చీలిపోతే మాత్రం పార్టీకి తీరని నష్టం జరుగుతుంది.