ఉక్రెయిన్ యుద్ధం మొదలైన తర్వాత మొదటి సారి పెను విధ్వంసం జరిగింది. ఖేర్సన్ కు 30 కిలోమీటర్ల దూరంలో ఉన్న హైడ్రోపవర్ డ్యామ్ పై బాంబుల వర్షం కురిసింది. ఫలితంగా డ్యామ్ ఆనకట్ట తెగి నీరు కట్టలు తెంచుకొని ఉధృతందా నగరంవైపు ప్రవహిస్తోంది. దీంతో లక్షల మంది ప్రాణాలు అరచేతిలో పట్టుకొని అక్కడి నుంచి పరుగులు తీస్తున్నారు. కొన్ని వేల కుటుంబాలు ఆపదలో చిక్కుకున్నాయి. ఇంత దారుణ ఘటనకు బాధ్యులు ఎవరు అనేది మాత్రం తెలియరాలేదు. ఉక్రెయిన్ తీవ్రవాదులే ఈ చర్యకు పాల్పడ్డారని రష్యా ఆరోపిస్తుంటే.. రష్యా బలగాలే డ్యామ్ కూల్చివేసాయని ఉక్రెయిన్ ప్రభుత్వం ఆరోపిస్తోంది. మంగళవారం తెల్లవారుజామున నీపర్ నదిపై ఉన్న కఖోవ్కా డ్యామ్ ఆనకట్ట పూర్తిగా తెగిపోయిన విషయాన్ని ఉక్రెయిన్ వెల్లడించింది. అర్థరాత్రి 2 గంటల ప్రాంతం నుంచి డ్యామ్ గోడలు, వాల్వ్, గేట్లపై బాంబుల వర్షం కురుస్తోందనీ.. తెల్లవారే సమయానికి డ్యామ్ ఆనకట్ట పూర్తిగా తెగిపోయి వరద నగరంవైపు దూసుకొస్తున్నదనీ ఉక్రెయిన్ ప్రకటించింది.
వరద ప్రభావిత ప్రాంతాలైన మైఖోలావికా, ఓల్హికా, లివొ, టియాంగికా, పోనియాటివ్కా, ఇవానివ్కా, టోకరివ్కా వంటి చుట్టుపక్కల పది గ్రామాల ప్రజలు వెంటనే ఇళ్ళు ఖాలీ చేసి వెళ్ళిపోవాలని ఉక్రెయిన్ ప్రభుత్వ అధికారులు హెచ్చరించారు. ముబైల్ ఫోన్ వంటి అత్యవసర ఎలక్ట్రానిక్ పరికరాలు, తిండి సామాగ్రి, దుస్తులు వెంట పెట్టుకొని వెంటనే అక్కడి నుంచి వెళ్ళిపోవాలనీ.. లేకపోతే భయంకరమైన ప్రాణనష్టం తప్పదనీ హెచ్చరికలు జారీ చేశారు. కఖోవ్కా హైడ్రోపవర్ ప్రాజెక్ట్‌లో భాగంగా 1956లో ఈ డ్యామ్ నిర్మించారు. 30 మీటర్లు ఎత్తు, కొన్ని వందల మీటర్ల పొడవు ఉండే ఈ రిజర్వాయర్‌లో 18 క్యూబిక్‌ కిలోమీటర్ల నీటిని నిల్వ ఉంచే సామర్థ్యం ఉంది. ఈ పరిమాణం గ్రేట్‌ సాల్ట్‌ లేక్‌లోని నీటికి సమానం. నగరాలకు విద్యుత్ ను సప్లై చేసే హైడ్రోపవర్ ప్లాంట్ కూలిపోవటంతో ఉక్రెయిన్ కు కరెంట్ కష్టాలు మరింత పెరగనున్నాయి. ఇప్పటికే పవర్ సప్లైలో కీలక పాత్ర పోషించే జపోరిజియాలోని న్యూక్లియర్ పవర్ ప్లాంట్ ను రష్యా స్వాధీనం చేసుకుంది.