ప్రపంచానికి తెలుగు సినిమా సత్తా ఏమిటో చాటిన ఆర్ఆర్ఆర్ సినిమా యూనిట్ ను ఓ చేదువార్త విషాదంలో ముంచేసింది. ఈ సినిమాలో స్కాట్ దొర క్యారెక్టర్లో విలన్ గా అద్భుతంగా నటించిన ఐరిష్ నటుడు రే స్టీవెన్సన్ గుండెపోటుతో కొద్ది గంటల క్రితం మరణించాడు. 58 సంవత్సరాల స్టీవెన్సన్ మరణ వార్తతో ఆర్ఆర్ఆర్ సినిమా యూనిట్ తో పాటు టాలీవుడ్ ప్రముఖులు షాక్ కు గురయ్యారు. నిన్న మొన్నటి దాకా వార్తల్లో నిలిచిన మనిషి సడన్ గా మన మధ్య లేరని తెలియటంతో యావత్ సినీ ప్రపంచం దీనిపై విచారం వ్యక్తం చేస్తోంది. ఈ వార్తను విని నమ్మలేకపోయాననీ.. 58 యేళ్ళ వయసులో కూడా స్టీవెన్సన్ కుర్రాళ్ళతో పోటీ పడేంత ఆరోగ్యంగా ఉండేవాడనీ పేర్కొన్నారు. ఆర్ఆర్ఆర్ సినిమా క్లైమాక్స్ లో కారులో నుంచి పైకి లేచి తుపాకీతో కాల్చే సీన్ చేయటానికి ఏమాత్రం సంకోచం లేకుండా ఒప్పుకున్నారనీ.. ఆయన అంత డెడికేటెడ్ నటుడనీ రాజమౌళి చెప్పారు.
స్టీవ్ మరణ వార్త విని షాక్ కు గురయ్యాననీ.. ఆయనకు ఇంకా చాలా సినిమా కెరీర్ మిగిలి ఉండగానే మనందరినీ వదిలి వెళ్ళిపోవటం చాలా బాధాకరమనీ ఎన్టీఆర్ ట్వీట్ చేశాడు. ఆయనతో పని చేయటం చాలా గొప్ప అనుభవం అని చెప్పిన ఎన్టీఆర్.. ఆయన ఆత్మకు శాంతి చేకూరాలని ప్రార్థిస్తున్నానన్నారు. ఆయన కుటుంబ సభ్యులకు సానుభూతి తెలిపారు. హాలీవుడ్ బ్లాక్ బస్టర్ థోర్ సిరీస్ ద్వారా ప్రపంచవ్యాప్తంగా అభిమానులను సంపాదించుకున్న రే స్టీవెన్సన్ ఐర్లాండ్ నటుడు. 1964 మే 25న జన్మించిన ఈయన.. తొలుత టీవీ రంగంలో ఆ తర్వాత సినీ రంగంలో రాణించి.. ప్రస్తుతం హాలీవుడ్ స్థాయిలో విశేష గుర్తింపు ఉన్న నటుడిగా మారారు. ఆర్ఆర్ఆర్ స్కాట్ క్యారెక్టర్ కు అచ్చుగుద్దినట్టు సరిపోతాడని భావించిన రాజమౌళి అంచనా నిజమై.. సినిమాలో ఆయన క్యారెక్టర్ కు మంచి గుర్తింపు వచ్చింది.