మతమార్పిడి చేసి తీవ్రవాదం వైపు మళ్ళించటం అనే కాన్సెప్టుతో తెరకెక్కి దేశవ్యాప్తంగా తీవ్ర చర్చనీయాంశంగా మారిన ది కేరళ స్టోరీ సినిమా రికార్డులు క్రియేట్ చేస్తోంది. చాలా రాష్ట్రాల్లో ఈ సినిమాపై నిషేధం విధించినా.. థియేటర్లు బాయ్ కాట్ చేసినా.. కలెక్షన్లలో ఈ సినిమా ఏమాత్రం తగ్గటం లేదు. విడుదలైన ఫస్ట్ డే నే కంట్రీ వైడ్ గా సుమారు 7 కోట్లు ఈ సినిమా కలెక్ట్ చేసిందట. ఇప్పటి వరకు ఇండియా వైడ్ గ్రాస్ సుమారు 60 కోట్ల వరకు ఉంటుందని సినీ ట్రేడ్ వర్గాల అంచనా. త్వరలోనే ఈ సినిమా 75 కోట్ల వసూళ్ళు రాబట్టడం ఖాయమని చెప్తున్నారు. అన్ని రాష్ట్రాల్లో ఎలాంటి నిషేధం లేకుండా విడుదల అయి ఉంటే రెండు వారాల్లో వంద కోట్లు కలెక్షన్లు సాధించే సత్తా ఉన్న సినిమా అని సినీ వర్గాల విశ్లేషణ. రిలీజ్ కు ముందే కాంట్రవర్సీ కావటం.. సొంత రాష్ట్రం కేరళలోనే సినిమా బ్యాన్ కావటంతో దేశవ్యాప్తంగా ఈ సినిమాపై భారీ బజ్ ఏర్పడింది. ఇక ఇప్పుడు ఈ సినిమా కశ్మీర్ ఫైల్స్ ను మించి ఉందంటూ వస్తున్న ఓరల్ పబ్లిసిటీ కలెక్షన్ల వర్షం కురిపిస్తోంది.
కేరళలో అమాయక హిందూ అమ్మాయిలను ఇస్లామిక్ తీవ్రవాదులు మాయమాటలతో ఏమార్చి ఇస్లాం మతంలోకి మార్చి.. ఆ తర్వాత వాళ్ళను ఐఎస్ఐఎస్ తీవ్రవాద సంస్థ కోసం పనిచేసే విధంగా మార్చటం ఈ సినిమాలో ప్రధాన సబ్జెక్ట్. కేరళలో కొన్ని వేల మంది ఇలా మత మార్పిడికి గురయ్యారనీ.. వారిలో చాలా మంది ఐఎస్ఐఎస్ కోసం ఇస్లామిక్ దేశాలకు పంపించబడ్డారనీ చెప్తోంది ది కేరళ స్టోరీ. ఇది ఓ వర్గాన్ని కించపరిచేలా అవమానపరిచేలా ఉందంటూ కేరళ ప్రభుత్వం బ్యాన్ చేయగా.. చాలా వరకు రష్ట్రాల్లో సినిమా విడుదలైంది. సినిమా చూసిన జనం ఏ వర్గాన్ని కూడా అవమానపరిచేలా సినిమా కథ లేదనీ.. కేవలం బలవంతపు మత మార్పిడి, ఇస్లామిక్ తీవ్రవాదం గురించి మాత్రమే ఉన్నది ఉన్నట్టు చూపించారనీ అంటున్నారు. ఇన్ని నిషేధాలు, బాయ్ కాట్ లు ఉంటేనే ఇంత కలెక్షన్ సాధించిందంటే.. అవన్నీ లేకపోతే ఇది భారీ వసూళ్ళే రాబట్టి ఉండేదనేది మాత్రం నిజం.