విడుదలకు ముందే వివాదాస్ఫదమైన ది కేరళ స్టోరీ.. ఎట్టకేలకు నిన్న థియేటర్లలోకి వచ్చేసింది. కొన్ని రాష్ట్రాల్లో ఈ సినిమాపై నిషేధం విధించినా.. అక్కడక్కడా అభ్యంతరాలు వ్యక్తమైనా మొత్తానికి ప్రేక్షకుల ముందుకు వచ్చింది ఈ సినిమా. మతమార్పిడి, ఇస్లామిక్ టెర్రరిజమే మెయిన్ కథాంశాలుగా తెరకెక్కిన ది కేరళ స్టోరీ.. అందరూ అనుకున్నట్టు ఏమాత్రం అభ్యంతరకరంగా లేదు. 32 వేల మంది ఆడపిల్లలను మతం మార్చినట్టు అసలు ఈ సినిమాలో ఎక్కడా చూపించనే లేదు. మతమార్పిడి చేసి తీవ్రవాదంలోకి లాగే కథను.. ఓ అమాయకమైన అమ్మాయి చుట్టూ జరిగే కథలా వివరించారు అంతే. నర్సిగ్ కాలేజీలో చేరిన అమ్మాయికి ఇస్లాంలోకి మారిన ఇద్దరు అమ్మాయిలతో పరిచయం ఏర్పడుతుంది. ఆ తర్వాత వాళ్ళిద్దరూ ఆమెను బ్రెయిన్ వాష్ చేసి ఇస్లాంలోకి మార్చి తీవ్రవాదిగా మార్చేస్తారు. అలా బలవంతంగా మతం మారి తీవ్రవాది అవతారమెత్తిన ఆ అమ్మాయి జీవితంలో జరిగేదే సినిమా కథ.
కేరళలో ఎన్నో యేళ్ళుగా అమాయక యువతులను లవ్ జీహాద్ పేరుతో మోసం చేసిన ఘటనలు చాలా ఉన్నాయి. బలవంతంగా మత మార్పిడి, లవ్ జీహాద్, ఇస్లామిక్ కన్వర్షన్, ఐఎస్ఐఎస్ సంస్థలోకి చేరేలా యువతను ప్రోత్సహించటం.. ఇవే సినిమాలోని అంశాలు. వీటిపై డైరెక్టర్ సుదీప్తో సేన్ అద్భుతంగా కథ రాసుకున్నాడని చెప్పాలి. నిజానికి.. ఇలాంటి కథను రాసుకోవటానికి ఎంతో ధైర్యం, అవగాహన కావాలి. సినిమాలో ఎక్కడా ఎవరినీ టార్గెట్ చేసి కించపరచడమో లేక విలన్లు గా చూపించటమో జరగలేదు. కేవలం ఒక రాష్ట్రంలో జరిగిన కొన్ని సంఘటనలను కలుపుతూ జరిగింది జరిగినట్టు చెప్పారంతే. కాకపోతే.. కొంత మంది అనవసరంగా దీనికి ముస్లిం మతానికీ ముడిపెట్టడం వల్లే వివాదాస్ఫదమైంది. ఇస్లామిక్ టెర్రరిజానికీ.. హిందూ ముస్లిం మతాల మధ్య స్నేహానికీ సంబంధం లేదనేది ముందు అర్థం చేసుకుంటే సినిమా కథ నచ్చుతుంది. మొత్తానికి.. ది కశ్మీర్ ఫైల్స్ ఎలాగైతే చీకట్లో మగ్గిపోయిన నిజాన్ని నేటి తరానికి చెప్పిందో.. ది కేరళ స్టోరీ సినిమా కూడా తీవ్రవాదం గురించి నిజాన్ని చెప్పింది.