రష్యా యుద్ధ విమానం వల్ల జరిగిన చిన్న పొరపాటు భారీ విధ్వంసానికి కారణమయ్యింది. ఉక్రెయిన్ సరిహద్దుకు దగ్గరగా ఉండే బెల్గోరాడ్ నగరంపై రష్యా యుద్ధ విమానం పొరపాటున బాంబును జారవిడవటంతో నగరంలో భారీ విధ్వంసం జరిగింది. బాంబు పడిన చోట సుమారు 40 మీటర్ల వ్యాసంలో భారీ గొయ్యి ఏర్పడింది. చుట్టుపక్కల భవనాలు భారీగా దెబ్బతిన్నాయి. వాహనాలు ఎగిరి చెల్లాచెదురుగా పడిపోయాయి. అయితే.. ఈ పేలుడులో ఎటువంటి ప్రాణనష్టం సంభవించలేదని రష్యా సైన్యం తెలిపింది. పేలుడు ధాటికి కొంత మంది చిన్న చిన్న గాయాలపాలైనట్టు చెప్తోంది.
ఉక్రెయిన్ తో యుద్ధం మొదలైన నాటి నుంచి రాత్రిపూట ఉక్రెయిన్ లోని కీలక స్థావరాలపై రష్యా వైమానిక దాడులు చేస్తోంది. ఇప్పటికే చాలా రకాల ఆయుధాలు వినియోగించిన రష్యా ఆయుధ డిపోల్లో వెపన్స్ సంఖ్య తగ్గిపోవటంతో రష్యా పెద్ద పెద్ద ఆయుధాలను కూడా బయటకు తీస్తోంది. తాజాగా సుఖోయ్-34 యుద్ధ విమానాలను రష్యా రంగంలోకి దించింది. ఇది యుద్ధంలో చాలా పెద్ద విధ్వంసాన్ని సృష్టించగల విధ్వంసకారి. రకరకాల ఆయుధాలతో పాటు భారీగా సైన్యాన్ని మోసకెళ్ళగలదు. కళ్ళు మూసి తెరిచేలోగా లక్ష్యాలపై దాడులు చేసి తిరిగి వచ్చేయటం దీని ప్రత్యేకత. అయితే.. రష్యా ఇలాంటి సుఖోయ్-34 యుద్ధ విమానాలను ఎన్నింటిని సైన్యానికి అందజేసిందో మాత్రం వెల్లడికాలేదు. అమెరికా, యూరప్ దేశాలు ఇంకా ఉక్రెయిన్ కు ఆయుధ సాయం చేస్తుండటం పుతిన్ కు ఆగ్రహం తెప్పిస్తోంది. ప్రస్తుత యుద్ధం పరిస్థితి చూస్తుంటే పుతిన్ ఏ క్షణంలోనైనా తీవ్ర నిర్ణయాలు తీసుకునే అవకాశాలున్నాయి.