ప్రస్తుతం రాజకీయాల్లో బిజీగా ఉన్న జనసేన అధినేత పవన్ కళ్యాణ్.. రాజకీయాలతో పాటు సినిమాలను కూడా ప్యార్లల్ గా మెయింటెన్ చేస్తూ వస్తున్నాడు. పార్టీని నడిపించటానికి తనకు సినిమాలు తప్ప మరో ఆదాయమార్గం లేదని పదే పదే చెప్పే పవన్ తన సినిమా కెరీర్ కొనసాగిస్తాననీ.. వరుస సినిమాలు చేస్తాననీ ఇదివరకే క్లారిటీ ఇచ్చాడు. ప్రస్తుతం పవన్ హరిహర మీరమల్లు సినిమా చేస్తున్నాడు. అయితే.. క్రిష్ దర్శకత్వంలో తెరకెక్కుతున్న ఈ సినిమాను డబ్బు కష్టాలు చుట్టుముట్టాయంటూ టాలీవుడ్ లో ఓ వార్త బలంగా వినిపిస్తోంది. చాలా రోజుల క్రితమే పట్టాలెక్కిన హరిహర వీరమల్లు సినిమా కోసం పవన్ డేట్స్ దొరకటం కాస్త కష్టంగా మారిన నేపథ్యంలో ఫైనాన్షియర్ లు కష్టాలు ఎదుర్కోవాల్సి వస్తోందని సమాచారం.
మామూలుగా సినిమా ఫైనాన్షియర్లు సినిమా కోసం సొంత డబ్బుతో పాటు బ్యాంకుల నుంచి తీసుకున్న లోన్ డబ్బులనే ఎక్కువగా ఖర్చు చేస్తుంటారు. సినిమా నిర్మాణం కోసం చేసిన అప్పులు.. వాటి వడ్డీలు ఫైనాన్షియర్లను భయపెడుతుంటాయి. అనుకున్న సమయానికి సినిమా పూర్తి కాకపోతే ఈ వడ్డీ కష్టాలు మరింత ఎక్కువ అవుతాయి. ప్రస్తుతం పవన్ కళ్యాణ్ సినిమా కూడా ఇలాంటి కష్టాన్నే ఎదుర్కుంటున్నట్టు తెలుస్తోంది. టాలీవుడ్ నెంబర్ వన్ స్టార్ సినిమాకు డబ్బు కష్టాలు రావటం అనేది నమ్మలేని నిజంగా విచిత్రమే. కాకపోతే.. దీనిపై ఎలాంటి అఫీషియల్ వార్తలూ రాలేదు.