2 వేల నోటును ఉపసంహరిస్తూ ఆర్బీఐ ఇటీవల నిర్ణయం తీసుకున్న విషయం తెలిసిందే. సెప్టెంబర్ 30 లోగా ప్రజలు తమ వద్ద ఉన్న 2 వేల నోట్లను బ్యాంకులో మార్చుకోవచ్చు మరియు కావాలంటే అకౌంట్లలో డిపాజిట్ చేసుకోవచ్చని ఆర్బీఐ ఇదివరకే చెప్పింది. ఈ విషయంలో ఆర్బీఐ గవర్నర్ శక్తికాంత దాస్ స్పష్టమైన మార్గదర్శకాలు వెల్లడించారు. తమ వద్ద ఎన్ని నోట్లు ఉన్నా అకౌంట్లలో డిపాజిట్ చేసుకోవచ్చనీ.. కేవలం మార్చుకోవటం విషయంలో మాత్రమే 20 వేల పరిమితి ఉందనీ చెప్పారు. అయితే.. అకౌంట్లలో డిపాజిట్ చేసే విషయంలో డిపాజిట్ మొత్తం 50 వేలకు పైన ఉంటే పాన్ నెంబర్ తప్పనిసరి అనే రూల్ యధావిధిగా అమలు అవుతుందని చెప్పారు. ప్రజలు కంగారు పడాల్సిన అవసరం లేదనీ.. 2 వేల నోట్ల మార్పిడి కోసం నాలుగు నెలల సుదీర్ఘ సమయం ఉందనీ శక్తికాంతదాస్ పేర్కొన్నారు.
చాలా కాలంగా వ్యాపారులు 2 వేల నోటును తీసుకోటానికి నిరాకరిస్తున్నారనీ.. మొత్తం 2 వేల నోట్లలో ప్రస్తుతం చలామణిలో ఉన్నవి కేవలం 10 శాతం మాత్రమేనని చెప్పారు. మిగతా కరెన్సీ నోట్లు బ్లాక్ చేయబడ్డాయని గుర్తు చేశారు. 2 వేల నోటు రద్దు తర్వాత మార్చుకోవటానికి కావాల్సినంత మిగతా కరెన్సీ నోట్లు అందుబాటులో ఉన్నాయన్నారు. మార్కెట్లో 2 వేల నోటు చలామణి విషయంలో అన్ని విషయాలు పూర్తిగా గమనించి, సామాన్యులకు ఇబ్బందులు ఎదురవుతాయా అన్న విషయంపై పూర్తిగా చర్చించిన తర్వాతనే ఉపసంహరణ నిర్ణయం తీసుకున్నామని స్పష్టం చేశారు. దీని వల్ల సామాన్యుడికి, మధ్య తరగతి వారికి ఎలాంటి ఇబ్బందులూ రావన్నారు. అయితే.. మళ్లీ వెయ్యి నోటు ముద్రిస్తారన్న వార్తలు మాత్రం పూర్తిగా అవాస్తవం అని చెప్పారు.
కొత్త వెయ్యి నోటు ప్రతిపాదన ఏమీ లేదని చెప్పిన దాస్.. 2 వేల నోట్లు మార్పిడి కోసం కావాల్సిన ఇతర డినామినేషన్ సిద్ధం చేశామన్నారు. బ్లాక్ చేయబడిన నల్లధనం బ్యాంకుల్లోకి చేరితే ఆ విషయాన్ని చూసుకోటానికి ఇన్ కమ్ ట్యాక్స్ శాఖ సిద్ధంగా ఉందని చెప్పారు. 2 వేల నోట్లు మార్చుకోటానికి బ్యాంకులకు వచ్చే ప్రజలకు పూర్తి సౌకర్యాలు కల్పించాలని బ్యాంకులకు సూచించారు. 2 వేల నోట్ల ఉపసంహరణ వల్ల భారత దేశ ఆర్థిక వ్యవస్థకు నామమాత్రపు ఇబ్బందులు కూడా రావనీ.. బ్లాక్ మనీ బ్యాంకులకు రావటం వల్ల ఆర్థిక వ్యవస్థ బలపడే అవకాశం ఉందని చెప్పారు.