గతంలో వివాదాస్ఫద వ్యాఖ్యలు చేసి బీజేపీ నుంచి సస్పెన్షన్ వేటుకు గురైన మహిళా నేత నుపుర్ శర్మ.. మరోసారి వార్తల్లోకెక్కారు. తనకు ప్రాణ హాని ఉందనీ.. తుపాకీ లైసెన్స్ ఇవ్వాలన్న ఆమె అభ్యర్థనకు ఢిల్లీ పోలీసులు గ్రీన్ సిగ్నల్ ఇచ్చారు. ఆత్మరక్షణ కోసం తుపాకీ వాడేందుకు లైసెన్స్ ఇవ్వటం ఢిల్లీలో టాక్ ఆఫ్ ది టౌన్ అయ్యింది.

కొద్ది నెలల క్రితం ఓ టీబీ డిబేట్ లో పాల్గొన్న నుపుర్ శర్మ.. డిబేట్ లో అవతలి వాళ్ళకు కౌంటర్ ఇస్తూ మహ్మద్ ప్రవక్త గురించి ఓ వ్యాఖ్య చేసింది. ఈ వ్యాఖ్యలు వారి మతాన్ని కించపరిచే విధంగా ఉన్నాయంటూ ముస్లింలు ఆందోళన చేశారు. పలు ఇస్లాం దేశాలు కూడా నుపుర్ శర్మ వ్యాఖ్యలను నిరసిస్తూ భారత్ ను విమర్శించాయి. దీంతో బీజేపీ నుపుర్ శర్మను పార్టీ నుంచి సస్పెండ్ చేస్తూ నిర్ణయం తీసుకుంది. ఆ తర్వాత తనకు ప్రాణహాని ఉన్నదనీ.. తనను చంపేస్తామంటూ బెదిరింపులు వస్తున్నాయనీ ఆమె సుప్రీంకోర్టును ఆశ్రయించగా.. కోర్టు కూడా నుపుర్ శర్మపై మండిపడింది. నుపుర్ శర్మ వల్లే దేశానికి హాని ఉందంటూ సుప్రీంకోర్టు న్యాయమూర్తులు వ్యాఖ్యానించగా.. ఈ న్యాయమూర్తులపై పలువురు ఇతర న్యాయమూర్తులు.. న్యాయాధికారులు మండిపడ్డారు. అప్పటి నుంచి నుపుర్ శర్మ నిశబ్ధంగా ఉన్నారు.