తరచూ ఏవేవో పోస్టులు, పోల్స్ తో ఎప్పుడూ వార్తల్లో ఉండే ట్విటర్ కొత్త ఓనర్ ఎలాన్ మస్క్.. మరో ట్విస్ట్ ఇచ్చాడు. ట్విటర్ ను టేకోవర్ చేసిన తర్వాత సీఈఓను ఇంటికి పంపించేసిన మస్క్.. ఆ తర్వాత కొత్త సీఈఓగా ఎవరినీ అనౌన్స్ చేయలేదు. సగం మంది ఉద్యోగులతో పాటు సీఈఓను కూడా పీకేసిన మస్క్.. కొత్త సీఈఓను ఎప్పుడు నియమిస్తాడా అని అందరూ ఎదురు చూస్తున్న వేళ.. సీఈఓ కుర్చీలో తన పెంపుడు కుక్కను కూర్చోబెట్టి ఫోటో తీసి తన ట్విటర్ అకౌంట్ లో పోస్ట్ చేశాడు. అసలే కొత్త సీఈఓగా ఎవరు వస్తారోనని ఇన్వెస్టర్లు గగ్గోలు పెడుతుంటే.. ఆ కుర్చీలో కుక్కను కూర్చోబెట్టడం వాళ్ళకు ఆగ్రహం తెప్పిస్తోంది. ప్రస్తుతం తాత్కాలిక సీఈఓగా పనిచేస్తూ ట్విటర్ ను నడిపిస్తున్న ఎలాన్ మస్క్.. ఈ విషయంపై జోకులు చేయటం అందరినీ ఆగ్రహానికీ, ఆశ్చర్యానికీ గురి చేస్తోంది.
ట్విటర్ ను టేకోవర్ చేసిన సమయంలో కొత్త సంవత్సరంలో తెలివి తక్కువ వాడు దొరికే వరకూ సీఈఓ స్థానం ఖాళీగానే ఉంటుందనీ.. అప్పటి దాకా తానే సీఈఓా ఉంటానని ఎలాన్ మస్క్ చెప్పాడు. అప్పట్లో దీనిపై కూడా సర్వత్రా ఆగ్రహం వ్యక్తమైంది. సీఈఓ పోస్ట్ పై వివాదం జరుగుతున్న సమయంలో.. నేను ట్విటర్ సీఈఓగా ఉండాలా.. రాజీనామా చేయాలా అని కూడా మస్క్ ఓ పోల్ నిర్వహించాడు. ఇందులో ఎక్కువ మంది మస్క్ వైదొలగాలంటూ ఓటు వేశారు. కానీ మస్క్ అలాగే ఉన్నాడు. ఇప్పుడు కుర్చీలో కుక్కను కూర్చోబెట్టి మరో వివాదానికి కారణమయ్యాడు.