బీజేపీ ఎమ్మెల్యే రాజాసింగ్.. హైదరాబాద్ రాజకీయాల్లో సంచలన నేత. హిందుత్వమే ప్రధాన ఎజెండాగా రాజకీయం చేసే కట్టర్ హిందుత్వ వాది. మతంపై ఎవరు ఏ తప్పు మాట మాట్లాడినా వెంటనే వారికి కౌంటర్ ఇచ్చేస్తాడు రాజాసింగ్. అవసరమైతే పార్టీ లైన్ కూడా దాటేందుకు రెడీ అవుతుంటాడు. బీజేపీ పార్టీ కార్యకర్తల ఫాలోయింగ్.. సొంత అనుచరుల సపోర్ట్ రాజాసింగ్ కు ఫుల్లుగా ఉంటుంది. ఎప్పుడు ఆయన రోడ్డెక్కిన ఆయన వెంట చాలా మంది ఉంటారు. కానీ కొద్ది రోజుల క్రితం జరిగిన పరిణామాలు బీజేపీని రాజాసింగ్ కు దూరం చేశాయి. ఓ సందర్భంలో ఆయన చేసిన వ్యాఖ్యలు రాద్ధాంతానికి దారి తీసి ఏకంగా పీడీ యాక్టుకు గురై జైలు శిక్ష అనుభవించటమే కాకుండా బీజేపీ అధిష్టానం ఆగ్రహానికి గురై పార్టీ నుంచి కూడా సస్పెన్షన్ ను ఎదుర్కోవాల్సి వచ్చింది. ప్రస్తుతం ఆయన బీజేపీలో ఉన్నాడా లేడా అన్న విషయంలో అందరికీ తికమకే.

సరైన వివరణ ఇస్తేనే పార్టీలోకి తీసుకుంటామని తేల్చి చెప్పిన బీజేపీ.. ఇంకా ఆ విషయంలో క్లారిటీ ఇవ్వటం లేదు. తెలంగాణ సీఎస్ సోమేష్ కుమార్ విషయంలో కోర్టు తీర్పుపై లేఖ ద్వారా స్పందించిన రాజాసింగ్ కు బీజేపీ సపోర్ట్ చేసింది. బీజేపీ అఫీషియల్ నోట్ లో రాజాసింగ్ పేరు ఉంది. కానీ రాజాసింగ్ బీజేపీలోనే ఉన్నారా లేరా అన్నదానిపై మాత్రం కన్ఫ్యూజన్ అలాగే ఉంది. క్రమశిక్షణ చర్య పేరుతో ఇన్ని రోజులు రాజాసింగ్ ను పార్టీకి దూరంగా ఉన్న బీజేపీ.. ఇప్పటికైనా మళ్ళీ పార్టీలోకి తీసుకుంటున్నట్టు ప్రకటిస్తే మంచిదన్న వాదన వినిపిస్తోంది. అప్పుడే పాతబస్తీలో బీజేపీ బలపడే అవకాశం ఉంటుంది.