తరచూ నోరు పారేసుకొని వివాదాస్ఫదం అయ్యే బాబూ మోహన్.. తాజాగా మరో వివాదంలో ఇరుక్కున్న విషయం తెలిసిందే. ఓ బీజేపీ కార్యకర్త బాబూ మోహన్ కు ఫోన్ చేయగా.. ఆయన తిట్ల దండకం అందుకున్న కాల్ ఆడియో రెండు రోజుల నుంచి సోషల్ మీడియాలో వైరల్ గా మారింది. బండి సంజయ్ ఎవడ్రా అంటూ ఏకంగా బీజేపీ రాష్ట్ర అధ్యక్షుడినే తిట్టేసిన బాబూ మోహన్ ఫోన్ కాల్ సంభాషణ బీజేపీలో కలకలం సృష్టించింది. బాబూ మోహన్ మాట్లాడిన తీరు చూస్తుంటే ఆయన పీకలదాకా తాగేసి ఉన్నట్టు అర్థం చేసుకోవచ్చు. అయితే.. ఈ ఫోన్ కాల్ రికార్డ్ పై బాబూ మోహన్ స్పందించాడు. అసలు ఆ కాల్ రికార్డు తనది కానే కాదంటూ ట్విస్ట్ ఇచ్చాడు బాబూ మోహన్.
“అసలు ఆ రోజు నేను ఏ ఫోన్ కాల్ మాట్లాడనే లేదు. తెల్లవారితే పార్టీ మీటింగ్ ఉంది కాబట్టి ఆ రోజు త్వరగా నిద్రపోయాను.. ఆసలు నేను మాట్లాడిన కాల్ కాదు.. కావాలంటే నా ఫోన్ ఇస్తాను చెక్ చేస్కోండి.. కావాలనే నాపై ఎవరో కుట్ర చేసి ఈ విధంగా బద్నం చేస్తున్నారు.. బండి సంజయ్ ఎప్పుడూ నా తమ్ముడే..” అంటూ పేర్కొన్నాడు బాబూ మోహన్. ఆందోల్ నియోజకవర్గానికి చెందిన వెంకట రమణ అనే కార్యకర్త బాబూ మోహన్ కు ఫోన్ చేయగా.. ఆయన స్పందించిన తీరుతో ఆగ్రహించిన ఆ వ్యక్తి.. కాల్ రికార్డును సోషల్ మీడియాలో లీక్ చేసినట్టు సమాచారం. ఇదిలా ఉంటే.. బాబూ మోహన్ కు ఇదేం కొత్త కాదు. గతంలో కూడా ఆయన సహచరులపైనా.. సాధారణ జనాలపైనా.. ప్రభుత్వ అధికారులపైనా చాలా సార్లు నోరు పారేసుకొని విమర్శలపాలయ్యారు. టీఆర్ఎస్ టిక్కెట్ దొరకక బీజేపీలో చేరిన బాబూ మోహన్.. వచ్చే ఎన్నికల్లో ఆందోల్ నుంచే బీజేపీ టికెట్ పై పోటీ చేసేందుకు సిద్ధమవుతున్నారు. తాజా పరిణామాలు చూస్తుంటే అసలు బాబూ మోహన్ కు టికెట్ దొరుకుతుందో లేదో అనుమానమే.