మణిపూర్ రాజధాని ఇంఫాల్ లో శక్తివంతమైన పేలుడు చోటు చేసుకుంది. శనివారం ఉదయం ఆరున్నర గంటల ప్రాంతంలో ఓ ఫ్యాషన్ ఈవెంట్ వేదికకు వంద మీటర్ల దూరంలో బాంబు పేలుడు సంభవించింది. ఇదే ఈవెంట్ కు రేపు నటి సన్నీ లియోన్ హాజరు కావాల్సి ఉంది. అయితే.. ఖాదీ వస్త్రాల ప్రచారం కోసం ఏర్పాటు చేసిన ఈ ఫ్యాషన్ ఈవెంట్ జరగటం కొంత మంది స్థానికులకు ఇష్టం లేదు. సన్నీ లియోన్ ఈ వేడుకకు అటెండ్ కావటం కూడా కొన్ని స్థానిక సంఘాల నేతలకు నచ్చలేదు. బహుశా వీళ్ళే ఈ పేలుడుకు పాల్పడి ఉంటారని పోలీసులు భావిస్తున్నారు.
పేలుడులో ఎవరికీ ఎలాంటి గాయాలు కాలేదు. పేలుడు జరిగిన ప్రాంతం మొత్తాన్ని పోలీసులు స్వాధీనంలోకి తీసుకొని క్షుణ్ణంగా తనిఖీ చేశారు. ఐఈడీ పేలుడా లేక గ్రనేడ్ పేలుడా అనేది ఇంకా గుర్తించలేదు. లోకల్ మిలిటెంట్ గ్రూపులు కూడా ఎవరూ ఈ ఘటనకు తామే బాధ్యులమని ప్రకటించలేదు. ఈ ఘటనతో రాజధాని ఇంఫాల్ ఉలిక్కిపడింది. పూర్తి వివరాలు తెలిసే వరకూ నగరం మొత్తం అలర్ట్ ప్రకటించారు పోలీసులు.