తెలంగాణ రాజకీయాల్లో తీవ్ర వేడి రాజేసిన కామారెడ్డి మాస్టర్ ప్లాన్ పై ఎట్టకేలకు ప్రభుత్వం వెనక్కి తగ్గింది. తాజాగా కామారెడ్డిలో జరిగిన మున్సిపల్ సమావేశంలో మాస్టర్ ప్లాన్ ను రద్దు చేస్తున్నట్టు అధికారులు ప్రకటించారు. ప్రజల అభిప్రాయాలను పరిగణలోకి తీసుకున్నామని.. పాత మాస్టర్ ప్లాన్ ను రద్దు చేస్తున్నామనీ అధికారులు తెలిపారు. దాని స్థానంలో కొత్త మాస్టర్ ప్లాన్ ను సిద్ధం చేస్తామన్నారు. ఇందుకు ప్రజలు, రైతుల అభిప్రాయాలు సేకరిస్తామనీ.. అన్ని అభ్యంతరాలు పరిగణలోకి తీసుకొని ప్రజాభిప్రాయం మేరకే కొత్త మాస్టర్ ప్లాన్ రూపొందిస్తామనీ కామారెడ్డి మున్సిపల్ ప్రత్యేక ప్రధాన కార్యదర్శి వెల్లడించారు.
కామారెడ్డితో పాటు కామారెడ్డిలో విలైనమైన గ్రామాల్లోని వ్యవసాయ పొలాలను కలుపుతూ ఇండస్ట్రియల్ పార్క్ రూపొందించాలంటూ ప్రభుత్వం మాస్టర్ ప్లాన్ ను రూపొందించింది. అయితే.. సంవత్సరానికి రెండు పంటలు పండే వ్యవసాయ భూములను ఫ్యాక్టరీల కోసం ఇచ్చేయాలన్న ప్రభుత్వ నిర్ణయాన్ని వ్యతిరేకించిన రైతులు.. నెల రోజులకు పైగా ఆందోళనలు చేస్తున్నారు. ఈ వివాదంలో కామారెడ్డి మున్సిపల్ కౌన్సిలర్లు రాజీనామాలు కూడా చేశారు. బీజేపీ ఎమ్మెల్యే రఘునందన్ రావు, బండి సంజయ్ రైతులకు మద్దతు తెలపటం.. ఆందోళన తీవ్రరూపం దాల్చి అరెస్టులకు దారి తీయటం.. రాములు అనే రైతు ఆత్మహత్య చేసుకోవటం.. ఇలా అంతకంతకూ వివాదం పెద్దదైంది. ఇక చేసేది ఏమీ లేక.. చివరికి ప్రభుత్వం మాస్టర్ ప్లాన్ ను రద్దు చేయాల్సి వచ్చింది.